އަހަރެމެން އިންސާނުން އަބަދުވެސް އެމީހުންގެ މައިންބަފައިންގެ ވާހަކަ ދައްކާނެއެވެ. މި ފަނާކުރަނިވި ދުނިޔެއާއި އެމީހުން ވަކިވުމުންވެސް އެމީހުންގެ މަތިން ހަނދާންކުރާނެއެވެ. އެހެންނަމަވެސް އަހަރެމެންނަށް އެކަން ކުރެވެނީ އެމީހުންނަށް އެކަމުން ހެވެއް ލިބޭނޭ ގޮތައްތޯ ސުވާލުކޮށްލުން މުހިންމެވެ. އަދި އެމީހުންނަށް ފައިދާކުރާނެ އެއްވެސް ކަމެއް އަހަރެމެންނަށް އެބަކުރެވޭތޯވެސް ސުވާލުކޮށްލުން އަމުދުން މުހިންމެވެ.

ކޮންމެ މީހަކު މަރުވުމުންވެސް އެމީހާގެ އަމަލުތަކުގެ ފަތް އެހިސާބުން އެމީހަކަށް ބަންދުވެގެން ދިއައީއެވެ. ދެން އެމީހަކަށް ސަވާބާއި ޢަޒާބު ދެއްވާނޭ އޮތީ ވަރަށް މަދު މަގުތަކެކެވެ. އެގޮތުން ސަވާބު ދެއްވާނޭ ތިންކަމެއް ވަނީ އިސްލާމްދީނުގައި ފާހަގަކުރައްވާފައެވެ. އޭގެތެރެއިން އެއްކަމަކީ ހެޔޮލަފާ ދަރިންގެ ދުޢާއެވެ. 

އެމީހަކަށް ޢަޒާބު އިތުރުވާ ކަންކަމުގެ ތެރޭގައި އެމީހާ ދުނިޔޭގައި ހުރެ ކޮށްފައިވާ އަމަލެއްގެ ސަބަބުން މީސްތަކުން ފާފަވެރިވަމުން ދިއުން ހިމެނެއެވެ. މީސްމީޑިއާގެ އެކިއެކި މަންސަތަކަށް އެކި އެކި އެއްޗެހި ދޫކޮއްލާއިރު، ބިރުވެތިވާންޖެހެންވީ މިސަބަބަށްޓަކައެވެ. ބެލުމުން ފާފަވެރިވާ ފަދަ ތަކެތި ލާފައި ހުރުމުން އެތަކެތި ބަލައި، މީހުން ކުރާފާފައިން، އެތަކެތި ޢާންމުކުރި މީހާވެސް ދާނީ ފާފަވެރިވަމުންނެވެ.

އަހަރެމެން ކޮންމެ މީހަކީވެސް އަހަރެމެންނަށްޓަކައި ކޮންމެ ދުވަހަކުވެސް އެތައް ބައިވަރު ދުޢާތައް ކުރާ ބައެކެވެ. އަހަރެމެންނަށްޓަކައި އަހަރެމެން ދުޢާކުރާ ފަދައިން އަހަރެމެންގެ މައިންބަފައިންނަށްޓަކައި ވެސް ދުޢާކުރަންވާނެއެވެ. ކޮންމެ ނަމާދެއްގައިވެސް ދުޢާކުރަންވާނެއެވެ. ކޮންމެ ހިނދެއްގައިމެ އެމީހުންގެ މަތިން ހަނދާންކޮށް އެމީހުންނަށް ހެޔޮ އެެދެންވާނެއެވެ.

رَبِّ ارْحَمْهُمَا كَمَا رَبَّيَانِیْ صَغِيْرًا

"އަޅުގެވެރި ރަސްކަލާކޯއެވެ! ކުޑަކުއްޖެއްކަމުގައި މިއަޅާވީ ދުވަހު އެދެމީހުން މިއަޅާ ބަލައި ބޮޑުކުރިފަދައިން، އެދެމީހުންނަށް ރަޙްމަތް ލައްވަވައިފާނދޭވެ!" ނުވަތަ "ޔާ ﷲ! މިއަޅާ އާއި މިއަޅާގެ މައިންބަފައިންގެ ފާފަތައް ފުއްވަވައިދެއްވަވާނދޭވެ!" މިއިން ކޮންމެ މިންވަރެއްވެސް އެންމެ ރަނގަޅެވެ. ކޮންމެ ނަމާދަކަށް ފަހު ކޮންމެވެސް އިބާރާތަކުން ނަމަވެސް އެމީހުންނަށް ހެޔޮދުޢާ ކުރައްވާށެވެ. އެމީހުންގެ ފާފަ ފުއްސެވުން އެކި ކޮންމެ ނަމާދަކަށްފަހު ދެތިން އިބާރާތުން ނަމަވެސް ދުޢާ ކޮށްދޭށެވެ. މި ކަމުގައި އަހަރެމެންނާއި އަހަރެމެންގެ މައިންބަފައިންނަށް ހެވެއް ވާނޭކަން ހަމަ ޔަގީނެވެ.

މައިންބަފައިން މަރުވުމުން މައިންބަފައިންނަށް އެންމެ ފަސޭހައިން ދެވޭނެ އެންމެ އަގުބޮޑު ހަދިޔާއަކީ އެމީހުންނަށްޓަކައި ހެޔޮދުޢާކުރުމެވެ. އަތްމަތި ދަތިވެ ޞަދަޤާތް ނުކުރެވޭ މީހުން ތިބޭނެއެވެ. ނަމަވެސް ދޫހެލޭނަމަ ދުޢާކުރެވޭނެއެވެ. ވިސްނުމާއި ހިޔާލު ކުރެވޭނަމަނަމަވެސް ދުޢާކުރެވޭނެއެވެ. 

ވީމާ މައިންބަފައިންނަށްޓަކައި ހެޔޮދުއާކުރުން ގިނަކުރާށެވެ. އެކަމުގައި ދެމި ހުންނާށެވެ. ދަރިންގެ ހެޔޮދުޢާއިން ސުވަރުގޭގައި މައިންބަފައިންގެ ދަރަޖަ އުފުލިގެންދިއުން އެއީ މައިންބަފައިިންނަށް ދެވޭނެ އެންމެ އަގުބޮޑު ހަދިޔާއަށް ނުވާނެ ހެއްޔެވެ؟