ލިޔަން ކިޔަން ދަންނަ ކޮންމެ މީހަކަށް ލިޔެވިދާނެއެވެ. ކޮންމެ އެއްޗެއްވެސް ލިޔެވިދާނެއެވެ. މިގޮތަށް ލިޔާ ކޮންމެ މީހަކީ އަދި ލިޔުންތެރިއެއް ނޫނެވެ. ލިޔުންތެރިންނަކީ އަދި ވަކި ބައެކެވެ. އެމީހުންނަކީ އެމީހުންގެ ލިޔުންތަކުގައި ވަކި ހަމައެއް ގެންގުޅޭ ބައެކެވެ. ލިޔުންތެރިޔާ ލިޔުންތެރިއަކަށްވަނީ އޭނާ ލިޔާ ލިޔުންތަކުގެ ފެންވަރު އޭނާ ހިފަހައްޓާތީއެވެ. މިހެންގޮސް ލިޔުންތެރިންގެ ކިބައިގައި ކިތަންމެ ސިފައެއް ހުންނަން ވާނެއެވެ.

ހާލަތާއި ޒަމާން ބައްދަލު ކުރީ ތަފާތު ވިސްނުންތަކާއި ތަނަވަސް ހިޔާލުތަކުން ފުރިގެންވާ ދުނިޔެއަކައިގެންނެވެ. މި ދުނިޔޭގެ ރާސްތާ އަކީ އޮއްވަޅުގޮނޑިއެއްފަދަ އެއްޗެވެ. ބައެއްގެ ނުވަތަ މީހެއްގެ ވިސްނުން އެއްބަޔަކަށް ކަމުދާއިރު އަނެއްބަޔަކު އެ ވިސްނުންތަކާއި ދެކޮޅުވެރިވެއެވެ. ހިޔާލާ ވިސްނުމުގެ ސަބަބުން ބޮޑެތި އެތައް މުޖުތަމައެއް ބައިބައިވެފައިވާ އިރު، ހަމަ މި ދެންނެވި ހިޔާލާއި ވިސްނުމުގެ ސަބަބުން އެެތައް މުޖުތަމައެއްގެ ގުޅުން ބަދަހިވެފައިވެސް އެބަހުއްޓެވެ. މި ދެ ހާލަތުގައިވެސް އެންމެ ނުފޫޒުގަދަ މީހުންނަނީ މޮޅެތި ވާހަކަދެއްކުންތެރިންނާއި ހުނަރުވެރި ލިޔުންތެރިންނެވެ.

ދަންނަވަން މިއުޅޭ ވާހަކައަކީ އިޖްތިމާއީ ފޭރާން އައުކޮށް، އެ ގުޅުންތައް ބަދަހިކޮށް ދެމެހެއްޓުމުގައި ލިޔުންތެރިންގެ ދައުރު ބޮޑު ވާހަކައެވެ. މުޖުތަމައުގައި އެއިރެއްގައި ހިނގަމުންދާ ރަނގަޅު އަދި ނުރަނގަޅު އާދަތަކަށް ލިޔުންތެރިން ފާރަވެރިވާން ވާނެއެވެ. އެފަދަ އާދަކާއި ބެހޭ ގޮތުން ހެވާއި ނުބައި ބުނެދީ ކަމުގެ އަސްލު ރައްޔިތުންނަށް ހާމަކޮށްދޭންވާނެއެވެ. މުޖުތަމައުގެ އަމާންކަމާއި ސުލްހަމަސަލަސްކަން ބިނާވާނީ މިފަދަ މޮޅެތި ލިޔުންތަކުގެ ސަބަބުންނެވެ. ނަމަވެސް އެފަދަ ހާލަތްތަކުގައިވެސް ތިމާގެ މޮޅުކަމާއި މަޝްހޫރުކަން ހޯދުމަށް، ފިތުނަ އުފެދޭ ގޮތައް ލިޔުންތައް ލިޔެވޭލެއް މަދެއް ނޫނެވެ. ކާއްޓާއި ނާއްޓާ ދޭތެރެއަށް ވަދެވޭލެއް އަމުދުން މަދެެއްނޫނެވެ. މިފަދަ ލިޔުންތައް ލިޔާމީހުންނަށް ލިޔުންތެރިންގެ ދުވަހުގެ ހެޔޮއެދުން އެދޭނީ ކިހިނަކުން ހެއްޔެވެ؟

ލިޔުންތެރިންގެ ލިޔުންތަކުން، ހާއްސަކޮށް ސިއްހީ ލިޔުންތަކުގައި، އިލްމީ ހެއްކާއި އިލްމީ ވާހަކަތަކަށް ރިއާޔަތް ކުރުމެއް ނެތި މައުލޫމާތު ފޯރުކޮށްދީފައި ހުންނަތަންފެނެއެވެ. ނަމަވެސް އެފަދަ ކަންކަމުގައި މައުލޫމާތާއި އިލްމުގެ ތަފާތަކީ ކޮބައިކަނަ ލިޔުންތެރިން ދަންނަންޖެހޭނެއެވެ. ލިޔުމެއްގެ އޮއްޓަރާއި، އެ ލިޔުމެއްގެ މޮޅުކަން ބިނާވާނީ އޭގައި މައުލޫމާތަށްވުރެ ބޮޑަށް އެ ލިއުމެއްގައި އެކުލެވިގެންވާ އިލްމެއްގެ މައްޗަށެވެ. އެހެނީ އިލްމާއި މައުލޫމާތުގެ ތަފާތަކީ މިއިން ކޮންމެ އެއްޗެއްގެވެސް މަސްދަރު ތަފާތުވާތީއެވެ. މައުލޫމާތަކީ ވަރަށް ފަސޭހައިން ކޮންމެ ތާކުންވެސް ލިބިދާނެ އެއްޗެކެވެ. ހަމަ އެއާއިއެކު ލިބިފައިވާ މައުލޫމާތެއްގެ ހިކުމަތް ހޯދުމަކީ ދަތިކަމެކެވެ. އެއާއި ހިލާފަށް އިލްމަކީ ވަކި ހާއްސަ މަސްދަރުތަކަކުން ނޫނީ ނުހޯދޭނޭ އެއްޗެކެވެ. އަދި ކޮންމެ އިލްމަކީ އޭގެ ހިކުމަތް ހޯދާ ބުނެވޭނޭ އެއްޗެކެވެ. މިފަދަ އިލްމީ ލިޔުންތަކަކީ މާދަމާގެ މުސްތަގުބަލު އުޖާލާކުރުމަށް ކޮންމެހެންވެސް ބޭނުންތެރި ލިޔުންތަކެކެވެ.

ލިޔުންތެރިންނާއި ކިޔުންތެރިންނާއި ދެމެދު އުފެދޭ ގުޅުމަކީ ބާރުގަދަ ގުޅުމެކެވެ. އެ ގުޅުން އުފެދުމުގައި ލިޔުންތެރިންގެ ދައުރު ވަރަށްބޮޑެވެ. މުޖުތަމައު ތަކުގެ އެކުވެރިކަމާއި ގުޅުންތައް ބަދަހި ވުމުގައި ލިޔުންތެރިންގެ މޮޅު ލިޔުންތައް އަދާކުރާ ދައުރު ވަރަށްވެސް ބޮޑެވެ. ލިޔުންތެރިންގެ ބާރާއި ހިތްވަރާއި ބުންވަރު ނެތް ގައުމެއް، ކުރިއަރާ ދިއުމަކީ ހިކިފަސްތަނެއްގައި ބަކަތެޅުންފަދަ ކަމެކެވެ.