ދުނިޔެއަށް އުފަންވާ ކޮންމެ އިންސާނަކީވެސް އޭނާއަށް މާދަރީބަހެއް ލިބިގެންވާ މީހެކެވެ. އެގޮތުން އަޅުގަނޑުމެން ދިވެހީންގެ މާދަރީ ބަހަކީ ދިވެހި ބަހެވެ. އެހެންކަމުން ދިވެހީންނީ، ދިވެހިބަހަށް އަހުލުވެރި ބަޔަކު ކަމުގައިވާން އެބަޖެހެއެވެ. ދިވެހިބަހަށް އަހުލުވެރި ދިވެހީން ދަރީންތަކެއް ތަރުބިއްޔަތު ކުރުމުގައި އެންމެ ބޮޑު ސަމާލުކަމެއް ދޭންޖެހޭނީ މިއަދުގެ ކުޑަކުދީންނަށެވެ. އެހެނީ އެއީ މާދަމާގެ ޒުވާނުންނެވެ. މާދަމާ ގައުމުގެ ހުންގާނުގައި ހިފާންތިބި އަބުޠާލުންނެވެ. އެހެންކަމުން ކުޑަކުދިންގެ ހިތްތަކުގައި ދިވެހިބަހަށް ލޯބިޖައްސާ، ދިވެހިބަހަށް އަހުލުވެރި ކުރުމަށް އެތައްބައިވަރު މަސައްކަތްތަކެެއް މިއަދު މިވަނީ ކުރަން ޖެހިފައެވެ.

އަދުގެ ކުޑަކުދީން މިދަނީ ބަވަނަވެފައިވާ މި ދުނިޔޭގެ ޓެކްނޮލޮޖީގެ އެކި ވަސީލަތްތައް ބޭނުންކުރަމުންނެވެ. މީސްމީޑިއާގެ އެކި އެކި މަންސަތަކުގެ ތެރެއަށް އެކުދިން ފީނައެވެ. ޔޫޓިއުބު ފަދަ މަޝްހޫރު އެޕްލިކޭޝަންތަކަކީ އެކުދީންގެ މުނިފޫހިފިލުވުމުގެ ބައިވެރީން ކަމުގައި ހަދައިފިއެވެ. ނަތީޖާއަކަށް ވެގެން މިދަނީ ދިވެހިބަހާ ބީރައްޓެހި، އިނގިރޭސިބަހަށް ދޯޅަ، ދިވެހި ދަރިންތަކެއް ބޮޑެތިވަމުން އައުމެވެ. 

ކަންމިހެން ހުރުމާއިއެކު ދިވެހިބަހަށް ލޯބިޖެހިފައިވާ، ދިވެހިބަހަށް އަހުލުވެރި ކުދިބައެއް، ތަރުބިއްޔަތު ކުރުން ވަރަށްވެސް މުހިންމެވެ. އެގޮތުން ކުޑަކުދިންގެ ހިތްތަކުގައި ދިވެހިބަހަށް ލޯބިޖެއްސުމަށްޓަކައި އެކުދިންގެ ގޭތެރޭގެ މާހައުލުގައި ދިވެހިބަހުން ވާހަކަދައްކަން އާދަކުރުވަން ޖެހޭނެއެވެ. އެހެނީ އެ ކުއްޖާ ސުކޫލުގައި ހޭދަކުރާ ވަގުތުތަކުގެ ތެރެއިން ދިވެހި އިސްލާމް ނޫން ކޮންމެ މާއްދާއަކީ އިނގިރޭސި މީޑިއަމަށް ފައްކާކޮށް ކިޔަވައިދޭ މާއްދާތަކެކެވެ. އެހެންކަމުން އެކުދީން ސުކޫލު މަދަރުސާގައި ތިބޭނީ އިނގިރޭސިބަހަށް ދޮންވެ ފައްކާވެފައެވެ. އެއާއި އެކު އެކުދީންގެ ދިވެހީގެ ފެންވަރު ރަނގަޅު ކުރުމާއި ދިވެހި ބަހަށް އަހުލުވެރިކަމުގެ މުގާބިލު ފަރާތަކީ އެކުދީންގެ މައިންބަފައިންނެވެ. ބެލެނިވެރީންނެވެ. ވީ ހިނދު އެ ބެލެނިވެރީންގެ ބަހުރުވަ ނުވަތަ އެ މީހުން މޮށެ އުޅޭ ބަހަކީ އިނގިރޭސި ބަސްކަމަށްވާނަމަ އެ ކުދީންގެ ދޫތަކަށް ފަރިތަ ވާނީ އިނގިރޭސި ބަހެވެ. އެކުދީންގެ ހިތްތަކަށް ފަސޭހަވާނީވެސް އިނގިރޭސި ބަހެވެ. އެހެންކަމުން ބެލެނިވެރިން ނުވަތަ މައިންބަފައިން އެކުދީންނާއި އެކު ހޭދަކުރާވަގުތުތަކުގައި ދިވެހިބަހުން ވާހަކަދެއްކުން ވަރަށްވެސް މުހިންމެވެ.

މީގެ އިތުރުން ކުޑަކުދީންގެ ޝައުގެވެރިކަން ލިއްބައިދޭ، ކާޓޫނު ފަދަ ތަކެތި ދިވެހި ބަހުން އުފެއްދުން ވަރަށްވެސް މުހިންމެވެ. އެކުދީން މުނިފޫހިފިލުވުމަށް ގެންގުޅޭ ވަސީލަތްތަކުން އަބަދުމެ ފެންނަނީ އިނގިރޭސި ކާޓޫނު ތަކެވެ. އޭގެ ބަދަލުގައި ދިވެހި ކާޓޫނުތަކެއް އުފައްދާ އެކުދީންނަށް ފެންނާނޭހެން އާންމު ކުރުމަކީ އެކުދީންގެ ހިތްތަކުން ދިވެހިބަހަށް ކުރާ ލޯބި އިތުރުވެގެންދާނޭ ކަމެކެވެ. އަދި އެކުދީންނީ ދިވެހިބަހަށް އަހުލުވެރި ބަޔަކުކަމުގައިވެސް ވާނެއެވެ.

ދިވެހި ބަހުން ލިޔެފައިވާ ކުޑަކުދީންގެ ވާހަކަތަކާއި "ކޮމިކް" ފަދަ ތަކެއްޗަކީވެސް އެކުދީން ދިވެހި ބަހަށް އަހުލުވެރިކުރުމަށް ބޭނުން ކުރެވިދާނޭ ވަރަށްވެސް އަގުބޮޑު ތަކެއްޗެވެ. ކުޑަކުދީންނަކީ ފޮތް ކިޔަން އާދަވެފަައިތިބި ބަޔަކު ކަމުގައި ހެދުމަށް ބެލެނިވެރިން ކުރާ މަސައްކަތުގައި، އެކުދީންނަކީ ދިވެހި ބަހުން ލިއެފައިހުންނަ ލިއުންތައް ކިއުމަށްވެސް ޝައުގުވެެރިކަން ހުރި ކުދިބައެއްކަމުގައި ހެދުމަށް މަސައްކަތް ކުރަންވާނެއެވެ.

ސުކޫލު މަދަރުސާތަކުގެ ދައުރުވެސް އަމުދުން ކުޑައެއް ނޫނެވެ. ސުކޫލުތަކުގެ ކުދިންނަށް ސުކޫލުގެ މާހައުލުން، ދިވެހި ބަހަށް އަހުލުވެރިވުމަށްވުރެ އިނގިރޭސިބަހަށް އަހުލުވެރިވުން މުހިންމު ކަމުގައި ހީކުރެވެއެވެ. ހަގީގަތުގައި ކަންވަނީވެސް މިހެންނެވެ. ނަމަވެސް ސުކޫލުތަކުން، އެ ކުދީންގެ މި ވިސްނުން ބަދަލު ކުރަން މަސައްކަތް ކުރާންޖެހެއެވެ. ސުކޫލުތަކުގެ ކުތުބުހާނާތަކުގައި ދިވެހިބަހުން ލިޔެވިފައިހުންނަ ފޮތްތަށް ފަސޭހަކަމާއި އެކު ކިޔޭނޭ މަގު ފަހިވެފައި ހުންނަންވާނެއެވެ.

ކުޑަކުދިންގެ މެދުގައި ދިވެހި ބަހަށް އަހުލުވެރިކަން އިތުރުކުރުމަށްޓަކައި މައިންބަފައިންގެ ދައުރު ވަރަށްވެސް ބޮޑެވެ. އަދި މީސްމީޑިއާގެ އެކި އެކި މަންސަތަކުގެ ދައުރުވެސް އެހާމެ ބޮޑެވެ. އަދި ކިއެއްތަ ތަފާތު ގޮތަކަށް ކުޑަކުދިން ޝައުގުވެރިކުރުވާނޭ ނިޒާމަކުން ލިޔުންތައް އުފައްދާ އެކުދީންނަށް ފޯރުކޮށްދިނުމަކީވެސް ކުރާންޖެހޭނެ ކަމެކެވެ. ދިވެހިބަހަކީ މުހިންމު ބަހެއްކަން ސުކޫލުތަކުން އެކުދީންނަށް ބުނެދޭންވެސް އެބަޖެހެއެވެ. މިފަދަ ކިތައްމެ ކަމެއް އަދިވެސް ކުރެވިދާނެއެވެ. ދިވެހިބަހަށް އަހުލުވެރި ޖީލެއް ބިނާ ކުރުމަކީ ކޮންމެ ދިވެހި ދަރިއެއްގެ ގައުމީ ވާޖިބެކެވެ.