ރަސޫލާ ﷺ ޙަދީޘް ކުރައްވާފައިވާ ހަދީޘެއްގެ މާނައިގައި ވެއެވެ. "ތިމަން ކަލޭގެފާނުގެ ފުރާނަފުޅު އެކަލާނގެ އަތްޕުޅުގައިވާ މާތް ރަސްކަލާނގެ ޛާތުފުޅު ގަންދެއްވައި ވިދާޅުވަމެވެ. ހަމަކަށަވަރުން، ތިއަބައިމީހުން ހެޔޮ ކަންތަކަށް އަމުރުކުރާ ހުށިކަމެވެ. އަދި މުންކަރާތް ނަހީކުރާ ހުށިކަމެވެ. އެހެންނޫން ނަމަ، ހަމަކަށަވަރުން، الله ގެ ޙަޟްރަތުން ތިއަބައިމީހުންގެ މައްޗަށް ކޯފާއެއް ބާވައި ނުލައްވައި ނުދާހުއްޓެވެ. އެއަށްފަހު ތިއަބައިމީހުން އެކަލާނގެ ޙަޟުރަތަށް ދުޢާ ދެންނެވުމުން ފަހެ، އެހައިރުން ތިއަބައިމީހުންގެ ދުޢާ އިޖާބައެއް ނުކުރެއްވޭ ހުއްޓެވެ."

އަބަދުހެންމެ ދެކެނީ ކޮންމެވެސް މުޞީބާތެއް ކުރިމަތިވެގެން އުޅޭ ވާހަކަތަކެވެ. ރިޒްޤު ދަތިވާ ވާހަކައެވެ. ކޮންމެވެސް މީހަކު ނުވަތަ ބައަކު ބަލިވެ އުޅޭ ވާހަކައެވެ. ދެމީހެއް ނުވަތަ ދެބައެއްގެ މެދުގައި ދެބަސްވެ އަރައިރުންވުމާއި އެފަދަ ކޮންމެވެސް ކަންތައްތަކެއް އުޅޭ ވާހަކަތަކެވެ. ހަމަޖެހޭ ސާދާސީދާ، އަބުރުވެރި ދިރިއުޅުމެއް ނޫޅެވޭ ވާހަކައެވެ.

ދެމީހަކު އެއްވެއްޖެނަމަ ދައްކަނީ ސަރުކާރުން ކޮންމެވެސް ކަމެއް ކޮންމެވެސް ގޮތަކަށް ކުރާތީ އެކަމެއްގެ ވާހަކަތަކެވެ. ކޮންމެވެސް މީހެއްގެ ގޭގައި ކަމެއް ގޯސްކޮށް ހިންގާ ވާހަކަތަކެވެ. މިފަދަ ވާހަކަތައް ދައްކާއިރު އަމިއްލަ ގެދޮރުގައި ހުރި މިފަދަ އުނިކަންތައް އިސްލާހުކުރަނީ މަދު މީހެކެވެ. އެމީހެއްގެ ބެލެހެއްޓުމުގެދަށުގައި ތިބި މީހުން މުންކަރާތްތަކުން ދުރުކުރަން މަސައްކަތްކުރެވެނީވެސް މަދު މީހަކަށެވެ.

އެއްވެސް މީހަކު މުންކަރާތްތައް މަނާނުކުރާނަމަ އެއީ ކަންބޮޑުވާންޖެހޭނެ ކަމެކެވެ. ކޮންމެ ތާކު ހިނގާ ކޮންމެ މުންކަރާތެއްނަމަވެސް މެއެވެ. އެމީހަކަށް ކެރިކުޅަދާނަވީ މިންވަރަކުން އެކަމެއް މަނާކުރަން ވާނެއެވެ. އެހެނަސް ފުރަތަމަ އޮތީ ތިމާ މުންކަރާތްތަކުން ދުރުހެލިވުމެވެ. ތިމާ އެފަދަ ކަންކަން ނަހީކުރަންޖެހޭ މީހުންނަށް އަމުރުކުރުމެވެ. އަމިއްލަ ގެދޮރު މުންކަރާތްތަކުން ސަލާމަތްކުރުމެވެ. އަމިއްލަ ޢާއިލާގެ މީހުން އިޞްލާޙްކުރަން މަސައްކަތްކުރާށެވެ. ބަލަން ނުވާ މަންޒަރުތައް ދައްކާ ޓީވީ ޗެނެލްތަކާއި އެނޫންވެސް މީސްމީޑިއާގެ ޗެނަލްތައް "ތަޅު އަޅުވާށެވެ". ތިބާގެ ގޭގެ އަހުލުވެރީން ނަމާދުކުރާކަން ޔަޤީންކުރާށެވެ. ޤުރްއާން ކިޔަވައި ޛިކުރުކުރާކަންވެސް ޔަޤީންކުރާށެވެ.

އިސްވެ ދެންނެވުނު ޙަދީޘްފުޅުގައި އެވާ އިންޒާރަށް ބިރުވެތިވެވޭނީ މިމޭރުމުން ޢަމަލުކޮށްގެންނެވެ. އެންމެ މީހެއް ކުރާ ފާފައިގެ ސަބަބުން، ގިނަބައެއްގެ މައްޗަށް ކޯފާ އައިސްދާނޭކަންވެސް ހަނދާންކޮށްގެންނެވެ.