ކުދި ކުދި ކަންކަމާއި ބަދަލުހިފަން ބޭނުންވާ މީހުން މިއަދު ގިނަވެއްޖެއެވެ. މާފުކުރަން ބޭނުންވާ މީހުން މިއަދުގެ މުޖުތަމައުތަކުގައި މަދުވެއްޖެއެވެ. އެކަމުގެ ސަބަބުން ވަރި ގިނަވެއްޖެއެވެ. ޢާއިލީ ގުޅުންތައް ދުރުވެއްޖެއެވެ. މިތުރުން ހަތުރުންނަށް ވެއްޖެއެވެ. އެހެންކަމުންް މިކަމުގެ މައްޗަށް ނަޒަރެއް ހިންގާލުން މިއަދު މިވަނީ މަޖުބޫރުވެފައެވެ.

މީހެއްގެ ކިބައިން އަނިޔާއެއް ނުވަތަ ގެއްލުމެއް ލިބިއްޖެ ނަމަ ކަން ވެދާނޭ ގޮތުގެ 3 ގޮތެއް އެބައޮތެވެ. ފުރަތަމަ ގޮތަކީ އެމީހަކު ކުރި އަނިޔާއެއް ނުވަތަ ދިން ގެއްލުމެއްގެ ބަދަލު މިދުނިޔޭގައި އެމީހަކަށް ލިބުމަށް، އަނިލާ ލިބުނު މީހާއަށް އެދެވުމެވެ. ދެވަނަ ގޮތަކީ އެ އަނިޔާގެ ބަދަލު އާޚިރަތް ދުވަހު އެމީހަކަށް ލިބުމަށް އެދުމެވެ.

އާދޭހެވެ! ތިންވަނައީ އޭގައި އެންމެ ފައިދާހުރި ގޮތެވެ. އެންމެ ފަސޭހައިން ކުރެވޭނެވެސް ކަންތަކެވެ. ނަމަވެސް ގިނަ މީހުން ފަސް ޖެހެނީ މިކަން މިގޮތަށް ކުރުމަށެވެ. އާދޭހެވެ! އެއީ އަނިޔާކުރި މިހާއަށް މާފުކުރުމެވެ. ބައެއް މީހުންނަށް ޤަބޫލުކުރެވެނީ މާފުކުރުމުން ދެން އެކަމުގެ ސަބަބުން އެމީހާއަށް އެއްވެސް ފައިދާއެއް ނުކުރާނެ ކަމަށެވެ. އެހިސާބުން އެކަން އެ ނިމުނީ ކަމަށެވެ. ތިމާއަށް ބަދަލެއް ލިބުނީ ކަމުގެ އިހުސާސެއް ނުކުރެވެއެވެ. އެހެނަސް މާފުކުރުމަކީ ހަގީގަތުގައިވެސް އެ އަނިޔާގެ ބަދަލެއް އެމީހަކަށް ލިބުންފަދަ ކަމެކެވެ.

މާފު ނުކޮށް ޤިޔާމަތް ދުވަހު ބަދަލު ހިފަން މަޑުކުރުމުން ލިބޭނެ ފައިދާއަށްވުރެ މާފުކުރުމުން ލިބޭނެ ފައިދާ މާބޮޑެވެ. އެހެނީ މާފުކުރުމުން އެމީހަކަށް އެކަމުގެ ސަވާބު ދެއްވަވާނީ ﷲ ތަޢާލާއެވެ. ﷲ ތަޢާލާ ދެއްވަވާނެ ސަވާބުގެ އަދަދު އެއީ ގުނައި ހިސާބު ޖެހޭނެ އަދަދެއް ނޫނެވެ. އެކަން ދެނެވޮޑިގެންވަނީ ހަމައެކަނި ﷲ ތަޢާލާއެވެ. އެމީހަކަށް އެކަން ހިސާބު ބެއްލެވޭ ދުވަހުގައެވެ.

ގިނަ މީހުން މާފު ނުކުރަނީ، އަދި ބަދަލު ހިފަން ބޭނުންވަނީ މިދުނިޔެއަކީ މާބޮޑު ތަނެއް ކަމަށް ހަދައި ދުނިޔޭގައި އަނެކާއަށްވުރެ މޮޅުވުމަށެވެ. ހައްގު ތަކެއް ނުވަތަ ހައްގެއް ނިގުޅިގެން ދަނީކަމަށް ވިސްނިގެންނެވެ. ކުޅަނދުރު ހަތައަށް އޮށްގައު އުކީކަން ސާބިތުކޮށްދޭށެވެ. ވިސްނައިލާށެވެ! ދުނިޔެއަކީ ކޮން އެއްޗެއް ހެއްޔެވެ؟ މިއީ ވަގުތީ ގޮވައްޗެކެވެ. ﷲ ތަޢާލާގެ ޙަޟްރަތުގައި ދުނިޔޭގެ އެއްވެސް އަގެއް ނެތެވެ. އެހެންކަމަށްވާއިރު އަހަރެމެންގެ ކުރިމަތީގައި ދުނިޔޭގެ އަގު އެހައި ބޮޑުވާންވީ ކީއްވެގެން ހެއްޔެވެ؟

މަގާމުގެ ގޮތުން ބޮޑު މީހަކު، ތިބާގެ ގާތު މީހަކަށް މާފުކުރާށޭ އެކަމަށް ތިމަންނާ އިނާމު ދޭނަމޭ ބުނެފިނަމަ، ލިބޭނެ އިނާމުގެ ދަހިވެތިކަމުގައި މާފު ނުކުރާނީ ކާކުހެއްޔެވެ؟ އެއިގެ ބަދަލުގައި އަނިޔާކުރި މީހާއަށް މާފުކުރުމުން އެކަމަށް ސަވާބު ދެއްވަވާނެކަން ވަހީ ކުރައްވަވާފައި އެވަނީ އެންމެހައި މަތިވެރިކަމެއް ލިބިވޮޑިގެންވާ ﷲ ތަޢާލާއެވެ! އެކަލާނގެ ދެއްވަވާނެ ސަވާބުގެ މިންވަރު ވަޒަން ކުރެވޭނީ ވެސް ކިހިނަކުން ހެއްޔެވެ؟ ވީއިރު މާފުކުރަން ފަސް ޖެހެވެނީ ކީއްވެތޯ އަމިއްލަ ނަފްސާއި ސުވާލުކުރާށެވެ.

މާފުނުކުރެވޭ ސަބަބެއް ކަމަށް މި ޒަމާނުގައި ހީވެފައި އޮންނަ އެއް ސަބަބަކީ މާފު ކުރުމުން އެމީހެއްގެ ކިބައިގައި އާރެއް ބާރެއް ނެތުނީއެވެ. މާފު ކުރި މީހަކީ ބަލި ނިކަމެތި މީހެއްކަމަށް މުޖުތަމައު ބަލައިގަންނާތީއެވެ. މިއީ ތަހުޒީބުގެ ނުބައި ބިންގަލުގެ ސަބަބުން މުޖުތަމައު ތަކުގައި ގަބޫލުކުރާ ނުބައި މިންގަނޑެކެވެ.

ހެޔޮވިސްނުން އިސްކުރާށެވެ! ޢާއިލީ ކަންކަމުގައިވެސް މާފުކުރާށެވެ. ޒަވާޖީ ޙަޔާތުގެ ކަންކަމުގައިވެސް މާފުކުރުމަށް އަވަސްވެގަންނާށެވެ. އުފާވެރިކަމާއި ހަމަޖެހުން ލިބޭނީ އެއިރުންނެވެ. ބަދަލު ހިފުމުގެ ރޫޙުގައި ކަންކަން ކުރުމުން ލިބޭނީ އިތުރު އަނިޔާތަކެކެވެ. ބަރުދާސްތު ކުރަން ޖެހޭނީ އިތުރު ތަކްލީފުތަކެކެވެ. މިދުނިޔޭގައި ކެތްތެރިވެލާށެވެ. މާފުކޮށްލާށެވެ. އެކަމުގެ ސަވާބާއި ދަރަޖަ އާޚިރަތުން އެދޭށެވެ. ހަގީގީ ކާމިޔާބުވެރިންނަކީ އެއީ އެވެ.