ދިވެހި ނޫސްތަކުގައި ނިކަން މޮޅު ސުރިހީތައް ހުންނާތީ ދެކެމެވެ. އެވެނި މިވެނި ދުވަހެއްގެ ތެރޭގައި އެވެނި މިވެނި ކަމެއް ކުރެވިދާނޭ ބުނެ ލިޔެފައި ހުންނަ މޮޅު ސުރުހީތައް ފެނެއެވެ. އެހެން ނަމަވެސް އެއީ އެކަންކަން ވެދާނޭ ގޮތެއް ބާއެވެ. މިފަދަ ސުރުހީއެއް އަޅުގަނޑު އަމިއްލަ އަށް ލިޔެލާނަމެވެ. "ދުވާލަކު 2 ކިލޯ ލުއިކޮށްދޭ ބުއިމެއް!"

އާދޭހެވެ! މިއީ މޮޅު ސުރުހީއެކެވެ. ނިކަން ޝައުގުވެރި ކުރުވާވެސް ސުރުހީއެކެވެ. އަދި އެބުނާ ބުއިމަކީ ކޮބައިކަން ކިތަންމެ ބަޔަކު ހޯދަން ބޭނުން ވާނެއެވެ. އެ ބުއިމެއް ތައްޔާރުކޮށް ބޯންވެސް ބޭނުން ވާނެއެވެ. އެހެން ނުވާންވީ ކީއްވެހެއްޔެވެ؟ ބަރުދަނުގައި ކިލޯއެއް ހިފާލިޔަސް، ހިކެން ނުވަތަ ލުއިވާން ބޭނުން މީހުން އެހާމެ ގިނައެވެ.

އެންމެ ރަނގަޅެވެ! ހިކުމަށާއި ބަރުދަން ލުއިކުރުމަށް މޮޅެތި ކިތަންމެ "ޑައިޓެއް" އެކަމުގެ މާހިރުން ހޯދާފައި ހުރެއެވެ. އަދި އޭގެ މައުލޫމާތު އެތަން މިތަނުގައި ހުރެއެވެ. ނަމަވެސް ހިތާމަކީ އެފަދަ މީހެއްގެ ފަރާތުން (ޑައިޓީޝަނެއްގެ ފަރާތުން) އާންމު ކޮންމެ ރައްޔިތަކަށް ބޭނުންވާ މިފަދަ މައުލޫމާތު ނުލިބޭކަމެވެ. ބަލި މީހާ ބަލިވެ، ބަލި އެނދުގައި އެނދުމަތިވުމުން ނުވަތަ ޑަކްޓަރަކަށް ދެއްކުމުން ނޫނީ އެފަދަ މައުލޫމާތު އެފަދަ މާހިރެއްގެ ފަރާތުން އާންމު މީހަކަށް ފަސޭހަކަމާއެކު ލިބޭނޭ ގޮތެއް ނުހުރެއެވެ. މިއީ ހަގީގަތުގައި ހިތާމަ ހުރި ކަމެކެވެ.

ކަން އޮތީ މިހެން ކަމުން މިދެންނެވި ޑައިޓު ތަކުގެ ވާހަކަ ދެކެވެނީ ނޫސްތަކުގައެވެ. އެވާހަކަ ދައްކަނީ ކަމާ ނުބެހޭ ނޫސްވެރިންނެވެ. ހަގީގަތަކީ އެ ނޫސްވެރިއަކު އެ ލިޔުމެއް ލިޔަނީ ނިކަން ހެޔޮ ނިޔަތުގައެވެ. ބަޔަކަށް މައުލޫމާތެއް ފޯރުކޮށްދިނުމުގެ މާތް މަގުސަދުގައެވެ. އެ ލިޔުމެއް ލިޔުމަށް ގައިމު އެ ނޫސްވެރިއަކު ބުރަ މަސައްކަތެއް ކުރާނެއެވެ. އެކަމަށް އެ ނޫސްވެރިއަކަށް ޝުކުރު ހައްގެވެ.

މިފަދަ ލިޔުންތަކަކީ ގިނަ ފަހަރަށް ކޮންމެވެސް ފަރަންޖީ ލިޔުމެއްގެ ދިވެހި ތަރުޖަމާއެކެވެ. މިކަމުގައިވެސް އެއްވެސް މައްސަލައެއް އަދި ޝަކުވާއެއްވެސް ނެތެވެ. ނަމަވެސް ޝަކުވާ ކުރެވެނީ ރައްޔިތުންނަށް "ޑައިޓު" ކިޔައިދޭންވީވެސް އާންމު ނޫސްވެރިޔާ ކަމަށްވާތީއެވެ. އޭގެ ނަތީޖާ އަކީ ގަބޫލުކުރަން ދަތި ބައެއް މައުލޫމާތުވެސް ފޯރު ކުރެވުމެވެ. އެހެން ކަމުން މިފަދަ މައުލޫމާތުތައް ރައްޔިތުންނާއި ހަމައަށް އާންމުކޮށް ގެނެސްދިނުމުގައި މިފަދަ، ކަމުގެ މާހިރުން އަމަލީކޮށް ބައިވެރިވުމަކީ ސިއްހީ ދުޅަހެޔޮ މުޖުތަމައެއް ބިނާކުރުމަށް އެ ބޭބޭފުޅުންނަށް ކުރެވޭ ވަރަށްވެސް ބޮޑު ކަމެއް ކަމުގައި ވާނެއެވެ. ބަލި މީހަކަށް "ޑައިޓު" ކިޔައިދިނުމަށްވުރެ، ގިނަ ބަޔަކަށްވެސް އިނގޭނޭހެން އެ "ޑައިޓެއް" ކިޔައިދުނުމުން ކުރާނޭ ފައިދާ މާ ބޮޑުވާނެއެވެ. މިދަންނަވަނީ ބަލި މީހުންނަށް "ޑައިޓު" ކިޔައި ނުދޭށޭ އެއް ނޫނެވެ. ވިސްނާލައިފި ނަމަ މިދަންނަވަނީ ކީކޭކަން ސާފުވެލާނެއެވެ.

"ޑައިޓީޝަނުން" ޑައިޓުގެ ވާހަކަ ދައްކާ އަދި ލިޔެ ހަދާނޭ ދުވަހަކީ ދިވެހި މި މުޖުތަމައަށް ނުހަނު އަވަހަށް އަލިވިލެން ބޭނުންވެފައިވާ ދުވަހެކެވެ.