މިއީ ރާއްޖޭގެ ރަށެއްގެ އިސްރަށްވެއްސަކު ހިއްސާކުރި ވާހަކައެކެވެ. ދުވަހެއްގެ އިރު އޮއްސި ރަތްވިލާވެސް އޮބައިފިއެވެ. އިޝާނަމާދަށްފަހު ކާލައިގެން ޓީވީ ދޮށުގައި އިންދެ އެއް ޗެނަލުން އަނެއް ޗެނަލަށް ޓިއުނު ކުރަމުން ދިޔައެވެ. ކުއްލިއަކަށް ލޮލުގައި އަޅައިގަތީ ދިވެހިރާއްޖޭގެ ޗެނަލަކުން ދައްކަމުން ދިޔަ ޖަލްސާއެކެވެ. އެއީ ސުކޫލެއްގެ އިނާމުދިނުމުގެ ޖަލްސާއެވެ.

ކުޑަވަގުތުކޮޅަކަށް އެ ޖަލްސާ ބަލައިލަން އިނެވެ. އެކި ވަނަތަކަށް ދިޔަ ކުދިންނަށް އިނާމު ދެމުން ދިޔައެވެ. 

ހައިރާންކަމާއެކު ބަލައިލެވުނީ ދެމުން ދިޔަ ވަނަ ތަކުން އެއްވަނަ އަކަށް އިނާމު ބަލައި އެރި ކުއްޖަކަށެވެ. އެކުއްޖާއަށް ލިބުނު ވަނަ ތަކަކީ ތިން މާއްދާއިން އެއްވަނައެވެ. އެއީ ގުރޭޑު 9 ގެ ދަރިވަރެކެވެ. އެއީ އަންހެންދަރިވަރެކެވެ.

އެކުއްޖާއަށް ލިބުނު ވަނަ ތަކުގެ ތެރޭގައި އިސްލާމުން އެއްވަނަ ހިމެނެއެވެ. އެހެން ނަމަވެސް މި މަންޒަރު ފެނި ހައިރާންވިއެވެ. އެ ކުއްޖާއަށް ހަމަ އަސްލުގައިވެސް އިސްލާމުން ލިބުނީ އެއްވަނަ ހެއްޔެވެ؟ 

މިސުވާލު އުފައްދަން ޖެހުނީ އެކުއްޖާ ހުރި ގޮތުންނެވެ. ބުރުގާ އެއް ނާޅައެވެ. ލައިގެން ހުރީ ގަޔަށް ބާރު ހެދުމެކެވެ. ކުރު ހެދުމެކެވެ. ހަށިގަނޑުވެ ވަނާތައް ހާމަވާން ހުއްޓެވެ. އެއީ އެކުއްޖާ އިސްލާމްފޮތުން ދަސްކުރި ގޮތްބާވައެވެ؟ އައުރައަކީ އިސްލާމުގައި ދަސްކުރާ ވަރަށް އަސާސް އެއްޗެކެވެ. ވީއިރު އިސްލާމްދީނުގައި އަންހެނާގެ އައުރަ ނުދަންނަ ކުއްޖަކަށް އިސްލާމުން އެއްވަނަ ލިބެންވީ ކީއްވެ ހެއްޔެވެ؟ ނުވަތަ އިސްލާމްދީނުގައި އަންހެނާގެ އައުރައަކީ ކޮބައިކަން އެނގިހުރެ، އެ އައުރަ ނިވައި ނުކުރާ ކުއްޖަކަށް އިސްލާމުން އެއްވަނަ ލިބެންވީ ކީއްވެހެއްޔެވެ؟

އެންމެ ރަނގަޅެވެ! ދެލިގަނޑަށް ކިތަންމެހާވެސް ފަރިތަ ވެދާނެއެވެ. މުޅި ފޮތް ހިތުން ކިޔާލަވެސް ފާނެއެވެ. އެހެން ނަމަވެސް ކިޔެވި އެއްޗެއް ނުއެނގޭ ނުވަތަ އެނގޭ އެއްޗަކާ އެއްގޮތަށް އަމަލު ކުރަން ނޭނގުމަށްވުރެ ނުވަތަ އަމަލު ނުކުރުމަށްވުރެ ބޮޑު ގޯހެއް ކޮބައިތޯއެވެ. ނަމަވެސް އެ ކުއްޖާ އެއީ ހަމަ އިސްލާމުން އެއްވަނައެވެ. އެ މަގާމު ހައްގުވާނީ ކިހިނެއް ހެއްޔެވެ؟

ތައުލީމީ ނިޒާމުގައި "ވަނަ" ދޭންވީ ގޮތް މިނަން އެބަޖެހެއެވެ. އިންސާފުވެރި ވާންޖެހެއެވެ. ކުއްޖާ ކިޔަވާ ކިޔެވުމާއި އެއްވަރަށް އެކުއްޖާގެ އަމަލުތައް ސީދާން ވާންޖެހޭނެއެވެ. ނޫންނަމަ ކިޔެވުމުގެ ބޭނުމެއްވެސް ނެތެވެ.