ރަށްރަށާއި އަވަށްތަކުގެ އާބާދީ އިތުރުވުމަކީ އެތަންތަނުގައި ހުންނަ ހިދުމަތްދޭ މަރުކަޒުތަކަށް ބާރު ބޮޑުވާނެކަމެކެވެ. މިކަމަށް ހެކިވާ އެއް ރަށަކީ ވެރިކަން ކުރާ މާލެއެވެ. މާލޭގައި ހިދުމަތެއް ހޯދުން އެއީ ފަސޭހަ ކަމަކަށް ނުވެއެވެ. އެއީ ކިތަންމެ ކުޑަ ހިދުމަތެއް ނަމަވެސް މެއެވެ.

މިސަބަބަށްޓަކައި ހިދުމަތްތައް ދޭ ފަރާތްތަކުން މިކަމަށް ހައްލު ހޯދުމުގެ ގޮތުން އެކި ދުވަސްވަރު އެކި އުކުޅުތައް އައީ ބޭނުން ކުރަމުންނެވެ. މިހާރު މިފަދަ އެއް ނިޒާމަކީ ފޯނުކުރުމުގެ ނުވަތަ މުއާސަލާތުކުރުމަށް ގެނެވުނު ބަދަލެވެ. ހިދުމަތެއް ހޯދުމަށް ނުވަތަ މައުލޫމާތެއް ސާފު ކުރުމަށް ހިދުމަތެއްދޭ މަރުކަޒަކަށް ގުޅާލުމުން ފުރަމަ ކަންފަތުގައި ޖެހޭ ބަހަކަށް "ދިވެހި ބަހުން ކުރިއަށް ގެންދެވުމަށް 1 ޖައްސަވާ!" މިފަދައިން އަޑު އިވެއެވެ. 

ކުރިއަށް ދާންވީ ގޮތުގެ މަގު ދައްކާ މީހަކު ދެމުންދާ އިރުޝާދެއްގެ މަތިން އަމަލު ކުރަން ޖެހެއެވެ. އެބުނާ އިރުޝާދު ތަކެއް އެބުނާ މިންވަރަކަށް އަދާކުރުމުން ކޮންމެވެސް މީހަކަށް ގުޅައިދެއެވެ. އެމީހަކު ފޯނު ނެގުމުގައި ބައެއް ފަހަރަށް ވަރަަށް އަވަސްވެދާނެއެވެ. އަނެއްބައި ފަހަރަށް ލަވައެއް އަޑު އަހާލަންވެސް ޖެހިދާނެއެވެ. ނުވިތާކަށް އެ ފޯނު ރިކޯޑު ކުރެވޭނެ ވާހަކައާއި އެފަދަ ތަފްސީލެއްވެސް ކިޔައެވެ. 

ހަގީގަތުގައި މިއީ ހިދުމަތުގެ ފެންވަރު ރަނގަޅުކުރުމަށް ތަރުތީބު ކުރެވިފައިވާ ފުރިހަމަ ނިޒާމެކެވެ. ނަމަވެސް މި ނިޒާމުގެ ސަބަބުން ލިބޭ ހިދުމަތަށްވުރެ އާންމުންނަށް ލިބޭ އުނދަގޫ ބޮޑުކަމަށް ޝަކުވާ ލިބެއެވެ. އެހެނީ އެއީ ވަރަށް ވަގުތެވެ. މިއިން ކޮންމެ ވަގުތަކީ އެއަށް ރުފިޔާ ހޭދަކުރަން ޖެހޭ ވަގުތެކެވެ.

މިއީ ދިވެއްސަކަށް ދިމާވި ހަގީގީ ހާދިސާއެކެވެ. އޭނާ ހޯދަން ބޭނުންވި ހިދުމަތް ލިބޭތޯ ނުވަތަ ހޯދަން ހަދަންވީ ގޮތެއް ސާފުކޮށްލަން ހިދުމަތްދޭ މަރުކަޒަކަށް ގުޅިއެވެ. ފޯނުގައި ބަރާބަރު 12 މިނެޓުވީ ފަހުން ޒުވާން އަންހެން ކުއްޖަކު ފޯނު ނެގިއެވެ. ފޯނު ނެގުމަށްފަހު ސަލާން ބަލއިނުގަނެވެނީސް ފޯނު ކެނޑިއްޖެއެވެ. އިރުކޮޅަކުން އައީ ފޯނުން ރުފިޔާ ހުސްވިކަމުގެ މެސެޖެވެ. އޭނާ މުޅިން މާޔޫސްވިއެވެ. ތިޔަފަރާތުން ގުޅުއްވާކަން މިފަރާތައް އިނގޭ ކަމަށް ބުނާ އަޑުތަކެއްވެސް ފޯނުން އިވުނެވެ. ނަމަވެސް އޭނާ އެވަގުތު ހުރީ ކޮން ހާލެއްގައިކަން އެފަރާތަކަށް ހަމަ ގައިމުވެސް ނޭނގޭނެއެވެ.

ކަން މިހެން ހުރުމާއެކު ހިދުމަތުގެ ފެންވަރު ރަނގަޅު ކުރުމަށް ތަރުތީބު ކުރެވުނު ނިޒާމުން ފަސޭހައެއް ނުވަތަ ލުޔެއް ލިބެނީ އެ ހިދުމަތް ފޯރުކޮށްދޭ ފަރާތްތަކަށެވެ. ހިދުމަތް ހޯދާ ފަރާތްތަކަށް ލިބޭ ލުޔެއް ނުވަތަ ވާ ފަސޭހައެއް މާބޮޑަކަށް ފެންނާކަށް ނެތެވެ. މައުލޫމާތެއް ސާފުކޮށްލަން ވިޔަސް، ގިނަ ވަގުތުތަކެއް ހޭދަކުރުމާއި އެކު ގިނަ ރުފިޔާތަކެއްވެސް ހަރަދުކުރަން މިއަދު މިވަނީ ޖެހިފައެވެ.

ބައެއްގެ ތާއީދު މި ނިޒާމަށް އޮތަސް، ގިނަބައެއްގެ ނަފްރަތާއި ފާޑުކިއުން މި ނިޒާމަށް އަމާޒުވެއެވެ. މިއީ އަދި ހިދުމަތް ލިބިގަންނަ ފަރާތްތަކަށް ހައްގު މިންވަރެއް ނޫނެވެ. މިއަށްވުރެ މާ ހަރުދަނާ، ހިދުމަތް ލިބިގަންނަ މީހުންގެ ހާލު އިހުސާސްކުރެވޭ ނިޒާމެއް މިކަމަށް ބޭނުންވެއެވެ. ވިޔަފާރީގެ ވިސްނުން ދޫކޮށް ހިދުމަތުގެ ހެޔޮ ވިސްނުން އިސްކުރަން އެބަ ޖެހެއެވެ. މައުލޫމާތެއް ސާފު ކުރަން 12 މިނެޓާއި 14 ރުފިޔާ ހަރަދުކުރުން މިއީ ވަރިހަމަވެގެން ތިބެވޭނެ ގޮތެއް ނޫނެވެ.