އިސްލާމީ ޙަޟާރަތްތައް ބާރަށް ކުރިއަރައިގެން އައީ މުސްލިމުންގެ މާބޮޑު މާލީ ބާރުވެރިކަމެއް ހުރި ދުވަސްވަރެއްގައެއް ނޫނެވެ. މިކަމުގެ ހިކުމަތެެއްގެ ގޮތުގައި މުފައްކިރުން ދެކިލައްވަނީ އެދުވަސްވަރު ތިބި މުސްލިމުން ތަނަވަސްކަމާއި ފައިސާގެ ބޭނުމުގައި އިސްލާމް ދީނާއި ދުރަށް ނުފަތާތީއެވެ. ލާދީނިއްޔަތާއި ދިމާލަށް ނުހިނގާތީއެވެ. އެއުރެން ދުނިޔެއަކީ ވަގުތީ މަންޒިލެއް ކަމަށް އަބަދުވެސް ޤަބޫލުކޮށްގެން ތިބީތީއެވެ. ދުނިޔެއަށްވުރެ އާޚިރަތަށް އޮތް ޝައުގުވެރިކަން ބޮޑުވީތީއެވެ.

ކޮންމެއަކަސް މިއަދުވެސް ދުނިޔޭގައި ދިރިއުޅޭ މުސްލިމުން އެބަ ތިއްބެވެ. މިއީ ވެސް، އަދި އެ ޒަމާންތަކުގައިވެސް އުޅުނީ ހަމަ މުސްލިމުންނެވެ. ނަމަވެސް މުސްލިމުންގެ "ކޮލިޓީ" ނުވަތަ ފެންވަރު ނުވަތަ އަގު މިއަދު މިވަނީ ބޮޑު ފަރަގަކުން ބަދަލުވެފައެވެ. މިކަމަށް މަގުފަހިކުރުވާ ސަބަބުތަކެއް އެބަ ހުއްޓެވެ. އޭގެ ތެރެއިން މައިގަނޑު އެއް ސަބަބަށް ބަލައިލާނަމެވެ. ނަމަވެސް އޭގެ ކުރިން ސުވާލެއްވެސް އެބަ އުފެދެއެވެ. އެއީ އެޒަމާނުގައި އެއްވެސް މީހަކު ދަތިހާލުގައި އުޅެން ޖެހުމުން ކަންބޮޑު ނުވީ ކީއްވެގެން ހެއްޔެވެ؟ ޢިލްމުވެރިން ދެކިލައްވާގޮތުގައި އެއީ އެޒަމާނުގައި ބައިތުލްމާލުގައި ތަނަވަސްކަން ހުރިނަމަ އާންމުންނަށްވެސް، ވެރިންނާއި އެއްވަރަށް އެ ތަނަވަސްކަމުގެ މަންފާ ލިބޭނެކަން ޔަގީންވާތީއެވެ. ދަތިހާލުގައި އުޅެން ޖެހިފައިވަނީ ބައިތުލްމާލުގައި ތަނަވަސްކަން ނެތުމުންކަން ޔަޤީން ކުރެވޭތީއެވެ. ވަލިއްޔުލްއަމްރުންނަކީ ލޯތްބާއި އިހްތިރާމް ލިބިގެންވާ ޢަދުލުވެރި އިތުބާރުކުރެވޭ މީހުންނަށް ވާތީއެވެ.

ނަމަވެސް މިއަދުގެ އިސްލާމީ ޙަޟާރަތްތަަކުގައި ނުވަތަ ޤައުމުތަކުގައި އެކަން މިވަނީ މުޅިން އަނެއް ފުށަށް ޖެހިފައެވެ. ގިނަ މުސްލިމް ޤައުމުތަކުގެ ބައިތުލްމާލުގައި ތަނަވަސްކަން އެބަހުއްޓެވެ. ތަނަވަސްކަންވެސް އެބަހުއްޓެވެ. ވެރިން ދިރިއުޅެނީ ނުހަނު ބޮޑު ތަނަވަސް ކަމުގައެވެ. ފަޤީރު ހާލުގައި ދިރިއުޅެން ޖެހިފައިވާ މީހާ ނުވަތަ ދަތިކަމަކުން އަރައި ނުގަނެވޭ މީހާ މުޅި އުމުރު އެ ވޭނުގައި ނުވަތަ އެ ހިތްދަތިކަމުގައި އުޅެން މި ވަނީ ޖެހިފައެވެ. ނަތީޖާ އަކީ ރައްޔިތުން ވަލިއްޔުލްޢަމްރަށް ކުރާ އިތުބާރު މުޅިން ގެއްލުމެވެ. ކުރާ އިހްތިރާމާއި ގަދަރާ ލޯބި ފައިދަށުލުމެވެ. އެހެނީ އެ ރައްޔިތު މީހާއަށް އެކަން އިހުސާސްކުރެވުމެވެ. މި ފަނާކުރަނިވި ވިސްނުމުގެ ސަބަބުން ކޮންމެ ރައްޔިތަކުވެސް އޭނާގެ ހާޖަތްތައް ފުއްދަން ދެވެން އޮތް މަގަކުން ދެއެވެ. އެއީ ދީނާއި ބީރައްޓެހި މަގެއް ވިޔަސް އެމަގެއް އިހްތިޔާރު ކުރެވޭތަން ފެންނަނީ މަދެއް ކޮށެއް ނޫނެވެ.

ކަން މިހެން ހުރުމާއި އެކު މުސްލިމުންގެ ޙާލަތު ބަދަލުކޮށް އިސްލާމީ އުންމަތަށް ކުރިއެރުން ހޯދަން ބޭނުންނަމަ އިސްލާމީ ޤައުމުތަކުގެ ވެރިން މިކަންކަމަށް ވިސްނައި އިޙްލާޞްތެރިވާން އެބަ ޖެހެއެވެ. އެ ވެރީންނަކީ ރައްޔިތުންގެ ލޯތްބާއި އިތުބާރު ލިބޭ ފަދަ ބަޔަކަށް ވާން އެބަ ޖެހެއެވެ. އަދުލުވެރި އަމާނާތް ތެރިންނަށް ވާން އެބަޖެހެއެވެ.

ދުނިޔޭގެ ޤައުމުތަކުގެ މުއްސަނދިކަމަށް ބަލައިފިނަމަ އެންމެ ބޮޑު މުއްސަނދިކަމެއް ލިބިފައި ވަނީ މުސްލިމް ޤައުމުތަކަށެވެ. ޤުދްރަތީ މުއްސަނދިކަން އެންމެ ބޮޑަށް ލިބިފައިވަނީ މުސްލިމް ޤައުމުތަކަށެވެ. ނަމަވެސް މިއީ މައުނަވީ މުއްސަނދި ކަމެކެވެ. މުސްލިމުންގެ ހިތްތަކާއި އެ ފުރާނަ ތަކުގައި އެއްވެސް ރޫޙާނީ މުއްސަނދިކަމެއް، އެއްބައިވަންތަ ކަމެއް އެއްބައެއްވަންތަ ކަމެއް ނެތެވެ. މުސްލިމުން އެއްބަޔަކާއި އަނެއްބަޔަކު މޫނު ޖެހިފައެވެ. ރުޅިވެރިކަމާއި ނަފްރަތުން "މުއްސަނދި" ވެފައެވެ.

މިކަންކަމުގެ ނާޖާއިޒު ފައިދާ އެހެން ދީންތަކުގެ މީހުން އެގެންދަނީ ފުރިހަމައަށް ނަގަމުންނެވެ. އެމީހުންގެ ތަނަވަސްކަމުގެ ބޭނުންކޮށްގެން އިސްލާމް ދީން ނިކަމެތިކުރަން އެގެންދަނީ މަސައްކަތްކުރަމުންނެވެ. މުސްލިމުން، އެމީހުންގެ ދީނުން ބޭރުކުރަން އެގެންދަނީ ކެނޑިނޭޅި މަސައްކަތްކުރަމުންނެވެ. މުސްލިމު އުންމަތް ތަކުގައި މުސްލިމުންގެ އަތްތަކުން ފިތުނައިގެ ހުޅު ރޯކުރަން ދަރު އަޅަމުން ގެންދެއެވެ. މިނިވަންކަމުގެ ނަމުގައި އިމެއް ނެތް މިނިވަންކަމަކަށް މުސްލިމުންގެ ހިތްތައް މުސްލިމު އުމްމަތްތަކުގައި ހުޅުވައެވެ. ޣައިރު ދީންތަކުން އެމީހުންގެ ވިހަ ގަދަ ލޮލަށް ނުފެންނަ މަޅިތަކުގައި މިފަދަ މުސްލިމުން ޖައްސާ ކަތިލައިލަމުން ދަނީ އީދުގައި ގުރުބާނީތައް ކަތިލައިލާ ފަދައިންނެވެ.

މުސްލިމުންގެ އެއްބައި ވަންތަކަމާއި އެއްބައެއް ވަންތަކަމާއި ދީންދެކި ވާ ލޯބި އިތުރަށް ބަދަހި ކުރުމަށް މުސްލިމު ވެރިން އިސްލާހުވާން އެބަޖެހެއެވެ. ގިނަ ކަންކަމުގެ ހައްލު އެހިސާބުން ފެށިގެންދާނެއެވެ. މިއީ އިސްލާމީ ޠާހިރު ތާރީހުން ދައްކާ ހަގީގީ މަންޒަރެކެވެ.