ދިވެހި ރާއްޖޭގެ ގިނަ ރަށްތަކަކީ ބިމުގެ ސަތަހައިން ބިން ބޮޑެތި ރަށްތަކެއް ނޫނެވެ. އެރަށްތަކަކީ ބިން ކުދި، ޖަޒީރާ ރަށްތަކެކެވެ. ޒަމާނާއި އެކު، އެ ރަށްތަކުގެ އަހުލުންނާއި އެ އަހުލުންގެ ވިސްނުން ތަރައްގީވެ ކުރިއަރަމުން ގޮސް މިއަދު އެރަށްތަކުގައި ޒަމާނީ ހުރިހާ ވަސީލަތްތަކެއް ގާއިމުވާން އެބަޖެހެއެވެ. އެގޮތުން އެ ކުދި ކުދި ރަށްތަކުގައި ސައިކަލަކީ ވަރަށްވެސް ގިނައިން ބޭނުން ކުރަމުންދާ އެއްގަމު އުޅަނދެކެވެ. އެއްގަމުގައި ދުއްވާނޭ އުޅނދެއް ނުވަތަ އުޅަނދުތަކެއް ގެންގުޅުމަކީ އެއްވެސް ގޮތަކުން މައްސަލައެއް ނޫނެވެ.

ކަންކަމުގައި، އެކަންކަން ގޯސް ވުމޭ ބުނާ ހިސާބަށް ދަނީ އެކަންކަމުން ލިބޭ ފައިދާއަށްވުރެ ބޮޑަށް ލިބޭ ނުވަތަ ކުރާ ގެއްލުން ބޮޑުވީމައެވެ. ބައެއްފަހަރު މިދަންނަވާ ގެއްލުމަކީ ދުވާލުގެ އިރުފަދައިން ހާމަވާން ހުންނާނޭ ކަންކަން ކަމުގައި ނުވެދާނެއެވެ. ދިވެހި ރާއްޖޭގެ ކުދި ކުދި ޖަޒީރާ ރަށްތަކުގައި ގިނަ އަދަދެއްގެ ސައިކަލު ފެންނަކަމީ ހަގީގަތުގައި ހިތާމަހުރިކަމެކެވެ. އެހެނީ އެއީ އިންޖީނުލީ، އެއިން ތެޔޮ އަންދާ، ތިމާވެއްޓަށް ގެއްލުން ދީ، ވައި ތަޣައްޔަރުކުރާ އެއްޗަކަށްވުމެވެ. މިފަދައިން ކުޑަކުޑަ ރަށެއްގައި އެތައްބައިވަރު ސައިކަލެއް ދުއްވުމަކީ ހަމަ ގައިމުވެސް ދިވެހިންނާއި ގުޅޭ، ދިވެހި ރާއްޖޭގެ ތިމާވެށި އެކަމަކަށް މަރުހަބާ ކިޔާނޭ ކަމެއް ނޫންކަން ޔަގީނެވެ. އެހެން ނަމަވެސް ކޮންމެ ރަށެއްގައިވެސް އެހާ ގިނައިން ސައިކަލު ބޭނުން ކުރާ ސަބަބެއް އޮންނާނޭކަން ހަމަ ޔަގީނެވެ.

އިންސާނުން ކަންކަމުގައި އަވަސް ބޭނުން ވުމަށް އަދުގެ މި ޒަމާން މިވަނީ މަޖުބޫރުކުރުވާފައެވެ. އެހެންކަމުން ކޮންމެ މީހަކުވެސް ކުރާ ކަމެއް ވީ އެންމެ އަވަހަކަށް ކޮށް ނިންމާލުމަކީ އަދުގެ އިންސާނީ ޖީލުގެ ތަބީއަތަކަށް މިވަނީ ވެފައެވެ. އެގޮތުން އެ ކުދި ކުދި ރަށްތަކުގައިވެސް އެއްތަނުން އަނެއް ތަނަށް ފަސޭހަ ކަމާއި އަވަސް ކަމާއި އެކު ދިއުމަށް ކޮންމެ މީހަކުވެސް އެދެވެއެވެ. އެ ރަށްތަކުގައި ސައިކަލު ގިނަ ވާ އެއް ސަބަބަކީ މިއީ ކަމުގައި ގަބޫލު ކުރެވިދާނެއެވެ.

އާދޭހެވެ! އަވަހަށް ތާކަށް ދާން އެދޭނަމަ އެތަނަކަށް ދިއުމަށް ބާރަށް ދުއްވައިގަނެވިދާނެއެވެ. ބައިސްކަލެއް ދުއްވިދާނެއެވެ. ސައިކަލެއް ނުވަތަ ކާރެއްވެސް ދުއްވިދާނެއެވެ. ނަމަވެސް އިންސާނާގެ ހެޔޮ ބުއްދި އިސްކޮށް އެތަނެއްގެ މާހައުލަކާއި އެތަނެއްގެ ވައްޓަފާޅިއާއި ތިމާވެއްޓާއި އެންމެ ރައްޓެހި އެންމެ ކަމުދާ ގޮތެއް އިހްތިޔާރުކުރުމަށް އިންސާނާއަށް ބުއްދި ނަމަކަށް ކިޔާ އިންސާނީ ބާރެއް ވަނީ ދެއްވާފައެވެ. އެހެން ކަމުން އިންސާނާގެ މި ބުއްދި އިސްކޮށް ވިސްނައިފިނަމަ އިސްވެ ދެންނެވުނުފަދަ ކުދި ކުދި ރަށްތަކަށް ސައިކަލަކީ އެންމެ އެކަށޭނެ އުޅަނދުކަމުގައި ނުވާނެއެވެ. އެ ރީތި ޖަޒީރާ ޖައްވު، އެ ސާފު ފިނި މާހައުލު، އެ ފުން ހިމޭން ރަށްތަކުގެ ހަމަހިމޭންކަން ނަގާލާ، ޖައްވު ކިލަނބުކޮށްލާ އެއްޗެއްކަމުގައި ސައިކަލު ވާނޭކަން ޔަގީނެވެ. ނަމަވެސް އޭގެ ބަދަލުގައި ބައިސްކަލަކީ އެފަދަ ކުދި ކުދި ރަށްތަކުގައި އިންސާނާ ބޭނުންވާ އަވަސް، އެއީ އަވަސްކަމުގައި ބަލައިގަތުމަށް ބޭނުން ކުރެވިދާނެ އުޅަނދެކެވެ. ތިމާވެއްޓާއި ރައްޓެހި އިންސާނާގެ ސިއްހަތަށް ވަފާތެރި ރަށްތަކުގެ މާހައުލަށް އޯގާތެރި އުޅނަދެއްކަމުގައި ހަމަ ޔަގީނުންވެސް ބައިސްކަލު ވާނެއެވެ.

ކަންމިހެން ހުރުމާއި އެކު އެރަށްތަކުގައި ސައިކަލުގެ ބަދަލުގައި ބައިސްކަލު ބޭނުން ކުރުމުގެ އާދައާއި ވައްޓަފާޅި ދިރުވާ އާލާކުރަން އެބަ ޖެހެއެވެ. ތިމާވެށީގެ ކަންކަމާއި ސިއްހީ ކަންކަމަށް ލޯ ހުޅުވިފައިވާ ހޭލުންތެރި މުޖުތަމައުތައް ބިނާވަމުންދާ މި ޒަމާނުގައި މިފަދަ މުހިންމު ކަންކަމާއި މެދު ވިސްނާ ފިކުރުކުރާނޭ ބަޔަކު އެބަ ބޭނުންވެއެވެ. ސައިކަލެއްގެ އަޑެއް ނީވޭ އަމާން ކުޑަ ކުޑަ ޖަޒީރާރަށެއްގެ ފުން ހިމޭންކަން ސިފަކުރައްވާށެވެ. ހިތުގައި ވަޒަން ކުރައްވާށެވެ.