ދިރިއުޅުމުގެ ހާޖަތްތައް ފުއްދުމަށް ކޮންމެ މީހަކުވެސް އެތައް މަސައްކަތްތަކެއް ކުރެއެވެ. ރެއާއި ދުވާލު ބުރަމަސައްކަތުން ފައިސާ ހޯދާ، އެމީހުންގެ ހާޖަތްތަކަށް އެ ފައިސާއިން ހަރަދު ކުރެއެވެ. ހާޖަތްތައް ފުއްދުމުގައި އެކި މީހުންގެ ދަރަޖަ ތަފާތެވެ. އެއްބަޔަކު މާ އަރާމު، ތަނަވަސް އުޅުމެއް އުޅެމުންދާއިރު، އަނެއްބައިމީހުން އެމީހުންގެ ޒަރޫރަތްތައް ކިރިޔާ ފުއްދާލައިގެން އުޅެއެވެ. މިއީ އެމީހުން އަދާ ކުރާ ވަޒީފާ ނުވަތަ ކުރާ މަސައްކަތުން އެމީހަކަށް ލިބޭ އާމްދަނީ އެމީހަކު ހަމަ ޖައްސާ ޖެއްސުމެކެވެ. ތަރުތީބުކުރާ ދިރިއުޅުމެކެވެ.

ބައެއް މީހުން ރެއާއި ދުވާލު ކުރާ ބުރަ މަސައްކަތުން އެކަށީގެންވާ އާމްދަނީއެއް ނުލިބޭކަމުގެ ޝަކުވާ ކުރެއެވެ. އަތުގައި ފައިސާ ނުހުންނަ ކަމަށް ބުނެއެވެ. ފަހަރުގައި ލިބޭ އާމްދަނީ ކުޑައީކަމަށްވެސް ވެދާނެއެވެ. ކޮންމެއަކަސް، ކޮންމެ ގޮތަކަށް ކަންތައް ވި ނަމަވެސް އެމީހަކު އާމްދަނީ ހޯދުމަށް ކުރާ މަސައްކަތް އެމީހަކު ކުރާގޮތާއި މެދު ވަރަށްބޮޑަށް ފަރުވާތެރިވާން ވާނެއެވެ. އެހެނީ އެމީހަކު އެ ކަމެއް ކުރާގޮތަކުން އެކަމެއްގެ ނުވަތަ މަސަައްކަތެއްގެ ބަރަކާތް ކެނޑިގެން ހިނގައިދާނެއެވެ. މުދަލުގައި ނުވަތަ ފައިސާގައި ބަރަކާތެއް ނުވާނަމަ، އެ ފައިސާއަކުން ހިތްހަމައެއް ނުޖެހެވޭނެއެވެ. އަދި ކިތަންމެ ގިނައިން ލިބުނު ނަމަވެސް، ގިނަކަމުގެ އިހުސާސެއް ނުކުރެވޭނެއެވެ. އަތުގައި ފައިސާ ހަރުނުލާ ހުރުމުގެ އެއް ސަބަބު ކަމުގައި މިކަން ވެދާނެއެވެ.

އަހަރެމެން ދިވެހީންނަކީ އިސްލާމުންނެވެ. އެހެންކަމަށް ވާނަމަ އަހަރެމެންގެ ދިރިއުޅުމުގެ ކޮންމެ ކަމެއްގައި ދީން އަހަރެމެންނާއި އެންމެ އަރިހުގައި ހުންނާނެއެވެ. އެ ދީން ދުރުކޮށްފިނަމަ އެމީހަކާއިި މާތް ﷲ އާއި ދުރުވާނެއެވެ. މަސައްކަތުގައި އުޅޭ ވަގުތު، ދީން ބީރައްޓެހި ކޮށްފިނަމަ އެ މަސައްކަތުގައި މާތް ﷲ ގެ ބަރަކާތް ލެއްވެވުން ދުރުވާނެއެވެ. އެހެންކަމުން ކޮންމެ މީހަކީވެސް އެމީހަކު އަދާ ކުރާ ވަޒީފާއެއް ނަމަވެސް ކުރާ މަސައްކަތެއް ނަމަވެސް މާތް ﷲ ގެ ހަޟްރަތުން ބަރަކާތް އެދިގެން ކަންކުރާ މީހަކަށް ވާންޖެހޭނެއެވެ. އެހެންކަމުން އެކަލާނގެ އާއި ކުއްތަންވުން ގިނަކުރުމާއި ހަނދުމަކުރުމަކީ މަސައްކަތުގައި އުޅުނު ނަމަވެސް ކުރަންޖެހޭނޭ ކަމެކެވެ.

ތިބާ ކުރާ މަސައްކަތަކާއި ލިބޭ އުޖޫރައާއި އަތުގައި ފައިސާ ހުންނަ މިންވަރާއި މެދު ސުވާލު އުފެދި ހިތްހަމަ ނުޖެހޭނަމަ، ތިބާ އެ މަސައްކަތެއް ކުރެވެނީ ﷲ ރުހިވޮޑިގެންވާ ގޮތަށްތޯ ބަލާށެވެ. ނަމާދުތައް ކުރެވެނީ ކިހާވަރަކަށްތޯ ބަލާށެވެ. މަސައްކަތުގައި އިހުލާސްތެރި ވެވެނީ ކިހާވަރަކަށްތޯ ބަލާށެވެ. އެންމެ މުހިންމު ކަމަކީ ތިބާ ކުރާ މަސައްކަތަކީ އިސްލާމްދީނުގައި ހުއްދަ މަސައްކަތެއްތޯ ބެލުމެވެ. އެހެނީ ހަރާމް ކަމެއް ނުވަތަ ހަރާމް ވިޔަފާރިއެއްގައި ދުވަހަކުވެސް މާތް ﷲ ގެ ބަރަކާތެއް ނުލައްވާނެއެވެ. މާތް ﷲ ގެ ބަރަކާތް ކެނޑިއްޖެ މުދަލެއް ނުވަތަ މަސައްކަތަކުން އެމީހަކަށް އެއްވެސް އުފަލެއް ހިތްހަމަޖެހުމެއް އަދި އަރާމެއް ނުލިބޭނެއެވެ. މިފަދަ ހާލަތްތަކުގައި ކިތަންމެ ގިނަ ފައިސާ ލިބުނަސް ހަމަޖެހޭ، ފުދޭ، ފޯރާ ދިރިއުޅުމެއް ނޫޅެވޭނެއެވެ. ބޭކާރު ހަރަދު ކުރެވޭކަން އިހުސާސްނުވެ އެ ހަރަދުތައް ކުރެވޭނެއެވެ.

އެހެންކަމުން ތިބާއަށް ލިބޭ ފައިސާއަކީ ތިބާގެ ހާޖަތްތައް ފުއްދޭނޭ ވަރުގެ ފައިސާއެއްކަމަށް ވުމަށް އެދޭނަމަ، މާތް ﷲ ގެ ރުހިވޮޑިގަތުން ތިބާ ކުރާ މަސައްކަތަށް ލިބޭތޯ ބަލާށެވެ. ކާމިޔާބުވެއްޖެ މަސައްކަތްތެރިއަކީ ހަމަ އެއީއެވެ.