އިންސާނާ ހައްދަވާ ހަލްގުކުރެއްވީ އަންހެން ފިރިހެން ދެ ޖިންސު ވަކިންނެވެ. އެއާއި އެކު ކޮންމެ ޖިންސަކަށްވެސް ތަފާތު އެކި ސިފަތަކާއި ތަފާތު ނިޒާމުތައް އެބައިމީހުންގެ ހަށިތަކުގައި ވަނީ ލައްވާފައެވެ. ޖިސްމާނީގޮތުން އަންހެނުންނާއި ފިރިހެނުންގެ ތަފާތު ފެންނަން ހުންނާނެއެވެ. ނަމަވެސް ނަފްސާނީގޮތުން އެ ތަފާތު ފެންނަން ނުހުރެދާނެއެވެ.

ފިރިހެނުންނާއި ހިލާފަށް އަންހެނުންގެ ހަށިގަނޑުގައި ދަރިމައިވުމުގެ ނިޒާމު ލައްވާފައިވުމުން އެކަމުގެ ހިކުމަތާއި ސަބަބުތަކަށް ވިސްނާލުން މުހިންމެވެ. އަންހެނުންނަކީ ފިރިހެނުންނާއި ހިލާފަށް މައިވަންތަކަމުގެ ލޯބީގައި މާ ކުރީގައި އުޅޭބައެކެވެ. އަންހެނުންގެ ނަފުސުގައި ވަރަށް އާދަޔާހިލާފު ސިފަތަކެއް މާތް ﷲ ވަނީ ލައްވާފައެވެ. މިއީ އަންހެނާ މަންމައަކަށް ވުމުގެވެސް ހިކުމަތްތަކޭ ބުނެވިދާނެއެވެ.

އަންހެނުންނަކީ އާދަޔާ ހިލާފު ކެތްތެރިކަމެއް ލައްވާފައިވާ ބައެކެވެ. އާދޭހެވެ! ހަޅޭލަވާ، ޝަކުވާކުރާ، ރުން ކުރު އަންހެނުންވެސް އުޅޭނެއެވެ. އެހެނަސް މިދަންނަވަނީ ޖުމުލަކޮށް އަންހެނުންގެ ވާހަކައެވެ. އަންހެނާ މަންމައަކަށް ވަނީ އޭނާ އެތައް ދުވަސްތަކެއްގައި ކެތްކުރުމަށްފަހުގައެވެ. އާންމު އުސޫލަކުން ބުނާނަމަ ނުވަމަހާއި ނުވަ ދުވަހެވެ. މި ނުވަމަހާއި ނުވަ ދުވަހު އަންހެނާ އުފުލާ ބުރައާއި ތަކުލީފާއި، ތަހަންމަލު ކުރާ ވޭނަށް އޭނާ ކެތްތެރިވެއެވެ. އަދި ވިހެއުމުގެ އެ ގަދަ ވޭނަށްވެސް އެ އަންހެނާ ކެތްތެރިވެއެވެ. އެހިސާބުން ނިމުނީއެއް ނޫނެވެ. އެ އަންހެނާ ބަނޑުއަޅާ ވިހޭ އެ ދަރިފުޅަށްޓަކައި އެ އަންހެނާ އެތައް ގުރުބާނީއެއް ވަނީ އެއްވެސް ޝަކުވާއެއް ނެތިއެވެ. އެ ދަރިފުޅު، ބޮޑުވެ ފުރާފުރިހަމަ ވަންދެން، އެ ދަރިފުޅުގެ ކޮންމެ ހާޖަތެއް އެ އަންހެނާ އަދާކުރަނީ ހިތުން ރުހުމުން، އެހާމެ ލޯބިންނެވެ. އެ އަންހެނާގެ އުފަލާ ހިތްހަމަ ޖެހުމާއި އަރާމަށް ވުރެ އިސްކަންދެނީ އެ ދަރިފުޅުގެ ހިތްހަމަ ޖެހުމަށެވެ. އަމިއްލަ އުފާތައް ދޫކޮށް އެދަރިފުޅަށް ވަގުތު އެ ދެނީ ކެތްތެރިކަމާއި އެކުގައެވެ.

ކެތްތެރިކަމާއި އެކު ހިތްވަރުގަދަ ކަމަކީވެސް އަންހެނާގެ ކިބައިގައި ހުންނަ ހާއްސަ ސިފައެކެވެ. އާދޭހެވެ! ފިރިހެނުންވެސް ހިތްވަރުގަދަ ވާނެއެވެ. އެކަމު ކޮންމެ ކޮންމެ ކަމެއްގައި ހިތްވަރުކުރުމުގެ ކުޅަދާނަކަމެއް ލިބިގެނެއް ނުވެއެވެ. އަންހެނާއަކީ އޭނާ ހިތްވަރުކުރަންޖެހޭ ހާލަތްތަކުގައި އާދަޔާހިލާފަށް އެކަން ކުރާ މީހެކެވެ. މި ހިތްވަރުގެ ވެސް ބޮޑުބައެއް އަންހެނާ ދައްކަނީ އޭނާގެ މާބަނޑު ދުވަސްވަރުގައްޔާއި އޭނާގެ ދަރިން ތަރުބިއްޔަތުކުރުމުގައެވެ. ފިރިމީހާއާއި އެކު ޖެހޭ މައްސަލަ ތަކުގައި އަންހެނާ ކުރާ ހިތްވަރަކީ އާއިލާތައް ނުރޫޅި ދެމިގެންދާ އެންމެ ބޮޑު އެއް ސަބަބުކަމަށް ދިރާސާވެރިން ދެކިލައްވައެވެ.

އަންހެނާގެ ހިތަކީ ލޯތްބާއި ހަމްދަރުދީއާއި ކުލުނުން ފުރިފައިވާ ހިތެކެވެ. ފިރިހެނުންގެ ހިތްތަކާއި ހިލާފަށް އަންހެނާގެ ހިތުގައި ނުވަތަ ނަފްސުގައި ލައްވާފައިވާ ލޯތްބާއި ހަމްދަރުދީއާއި ކުލުނަކީ އޭގެ އަގު ދުވަހަކުވެސް އަދާކުރެވޭނޭ ކަންކަމެއް ނޫނެވެ. އަންހެނާ ހިތުގައި އޭނާގެ މައިންބަފައިންނަޓަކައި އޮންނަ ލޯތްބާއި އޭނާގެ އާއިލާއަށް އޮންނަ ލޯބި ގަދަވާނެއެވެ. ހާއްސަކޮށް އޭނާގެ ފިރިމީހާއާއި ދަރީންގެމައްޗަށް އޮންނަ ލޯތްބަކީ ގަލަމަކުން، ދުލަކުން ބަޔާންކުރެވޭނޭ ވަރުގެ ލޯތްބެއް ނޫނެވެ. އަނބިވަންތަކަމުގެ ލޯތްބާއި މައިވަންތަކަމުގެ ލޯތްބަކީ ހަމަ ގައިމުވެސް އަންހެނާއަށް ހާއްސަ ވަރުގަދަ ލޯތްބެކެވެ.

ފިރިހެނުންނާއި ހިލާފަށް އަންހެނުންނަކީ ހިތްވަރުދިނުމުގައި ލާމަސީލުބައެކެވެ. މަންމައަކު އޭނާގެ ދަރިއަށް ދޭ ހިތްވަރަކީ ބައްޕައަކަށް ދެވޭނޭ ހިތްވަރެއް ނޫނެވެ. ދައްތައަކު އޭނާގެ ކޮއްކޮމެންނަށް ދޭ ހިތްވަރަކީ ބޭބެއަކަށް އޭނާގެ ކޮއްކޮމެންނަށް ދެވޭނޭ ހިތްވަރެއް ނޫނެވެ. އަނބިމީހާ އޭނާގެ ފިރިމީހާއަށް ދޭ ހިތްވަރަކީ ފިރިއަކަށް އޭނާގެ އަނބިމީހާއަށް ދެވޭނޭ ހިތްވަރެއް ނޫނެވެ. ވިސްނާ ފިކުރުކުރާށެވެ. ދިރިއުޅުމާއި މެދު ވިސްނުމުން މިކަންކަން އަމިއްލައަށް އިހުސާސްކުރެވޭނެއެވެ.

މިނޫނަސް އެތައް ސިފައެއް އަންހެނާއަށް ވަނީ ހާއްސަކުރެވިފައެވެ. މި ކަންކަން މިހެން ތަރުތީބު ކުރެއްވީ އިންސާނާ ހެއްދެވި މާތް ﷲ އެވެ. އެހެންކަމުން އަންހެނާ އަބަދުވެސް މިކަންކަމުގެ މައްޗަށް ވިސްނުން އިސްކޮށް ބޮޑާ ކަމާއި ކިބުރުވެރިކަމުން ދުރުވާން ޖެހޭނެއެވެ. އަންހެނާއަށް ދެއްވި މިހާއްސަ ސިފަތަކަށް ޝުކުރުވެރިވާން ދަސްކުރަންވާނެއެވެ.