ބައެއްމީހުންނަކީ އެމީހުންގެ ހުސްވަގުތު ތަކުގައި އެގޮތް މިގޮތަށް ވަގުތު އިސްރާފުކުރާމީހުންނެވެ. އަދި އަނެއްބައި މީހުންނަކީ އެމީހުންނަށްލިބޭ ހުސްވަގުތުތަކުގައި އޭގެ ފައިދާ ހެޔޮގޮތުގައި ހިފާ އޭގެ ބޭނުން ކުރާމީހުންނެވެ. ޒަމާނާއި އެކު ދިރިއުޅުން ބުރަބޮޑުވެފައިވާ މިޒަމާނުގައި ބައެއް ފިރިހެނުންނަށް ލިބޭ ހުސްވަގުތުތަކުގައި އެކުވެރިންނާއި އެކު ކޮފީތަކަށް ދިއުމަކީ ވަރަށް އާންމު ކަމެކެވެ. މިކަމުގެ ޝަކުވާ ބައެއް އަންހެންވެރިން ކޮށްއުޅެއެވެ. އެހެންކަމުން މިފަދައިން ކޮފީތަކަށް ދާ މީހުން، އެވަގުތުތަކަކީ ބޭނުންތެރި ވަގުތުތަކަކަށް ހެދުން ވަރަށްވެސް މުހިންމެވެ.

ކޮފީތަކުގައި ގިނަ މީހުން ވަގުތު ހޭދަކުރަނީ އެމީހުންގެ އެކުވެރިންނާއި އެކުގައެވެ. އެގޮތުން ކޮފީތަކުގައި އެކި މީހުން އެކި ވާހަކަ ދައްކާ އުޅެއެވެ. ބައެއްމީހުން އެމީހުންގެ މަސައްކަތުގެ މާހައުލުގެ ވާހަކަތައް ދައްކައެވެ. އަނެއްބަޔަކު ކޮންމެވެސް ވިޔަފާރިއެއްގެ ވާހަކަ ދައްކައެވެ. މުސްތަގުބަލާއި މެދު ވާހަކަ ދައްކާ މީހުންވެސް އުޅެއެވެ. ކައިވެންޏާއި ލޯބީގެ ވާހަކަތައް ހިއްސާކޮށް ބޮޑެތި މަޝްވަރާތައްކޮށް ކަންކަން ރާވާ އިންތިޒާމު ކުރާ ބަޔަކުވެސް އުޅެއެވެ. ތާކުންތާކުން ނުޖެހޭ ބޭކާރުވާހަކަ ދައްކާ، ފޯނާއި ކުޅެ، ގޭމު ކުޅޭ މީހުންވެސް އުޅެއެވެ. އަންހެން ކުދިންގެ ވާހަކަ ދައްކާ ހަނގާކުރުމުގައި ވަގުތު ހޭދަކުރާ މީހުންވެސް އުޅެއެވެ.

ކޮންމެއަކަސް ކޮފީތަކުގައި ހޭދަކުރާ ވަގުތުތަކުގައި ފައިދާހުރި ކޮންމެވެސް ކަމެއް ކުރެވޭތޯ ބެލުން ވަރަށްވެސް މުހިންމެވެ. ނޫންނަމަ އެއީ ކުރެވޭ ވަރަށްބޮޑު އިސްރާފެއް ކަމަށް ވެދާނެއެވެ. އެހެންކަމުގައި ވަނީނަމަ އެކުރެވެނީ ދެ އިސްރާފެކެވެ. އެއީ ވަގުތާއި ފައިސާއިން ކުރާ އިސްރާފެވެ.

މިފަދަ ކޮފީމޭޒުތަކުގައި ހޭދަ ކުރާ ވަގުތުތަކުގެ ބޭނުން އެންމެ އެދެވޭ ގޮތުގައި ހިފުމަށްޓަކައި އެކަކު އަނެކަކަށް އިންސާނީ ތަޖުރިބާ ހިއްސާކޮށް ހާސިލްކުރަންވީ ފިލާވަޅުތަކާއި އިބުރަތްތައް ބުނެދެވިދާނެއެވެ. ނުވަތަ މިހާރުވެސް ކުރަމުންދާ ކޮންމެވެސް ފައިދާހުރިކަމެއް، އިތުރައް ކުރިއަރުވާ ފުޅާކުރުމަށް ހިޔާލުކޮށް މަޝްވަރާ ކުރެވިދާނެއެވެ. އެއްބަޔަކު އަނެއްބަޔަކަށް ހެޔޮކަންތައްތަކަށް ގޮވާލާ މުންކަރާތްތައް ނަހީކުރަން ބާރުއެޅިދާނެއެވެ. އާންމު އިޖްތިމާއީ މައްސަލަތަކުގެ ވާހަކަ ދައްކާ ފަރުދީ ފެންވަރުގައި އެޅޭނޭ ފިޔަވަޅުތަކާއި ހޯދޭނޭ ހައްލުތަކާއި މެދު ހިޔާލު ބަދަލު ކުރެވިދާނެއެވެ. އެބައެއްގެ މެދުގައި އެކުވެރިކަމާއި ލޯބި އާލާވާނޭފަދަ މާޒީތައް ހަނދާންކޮށް ދޭދޭ އަހުންގެ ގުޅުންތައް ވަރުގަދަ ކުރެވިދާނެއެވެ. މާތް ﷲ ރުހިވޮޑިގެންވާ މިފަދަ ކިތަންމެ ކިތަންމެ، އާދައިގެ ކަންތައްތަކެއް ކުރެވިދާނެއެވެ.

ކޮފީމޭޒުތަކުގައި ނަމާދުވަގުތު އަޅާފައި ކޮފީބޯން ތިބޭކަމީ ހިތާމަ ހުތިކަމެކެވެ. މިއީ ބައެއްމީހުންގެ ކިބައިގައި ވަރަށް ގަދަޔަށް ހަރުލާފައިހުންނަ އާދައެކެވެ. މިއީ ހަގީގަތުގައި ވަރަށްވެސް ދެރަވަރުކަންކަމެވެ. މަޣްރިބު ނަމާދުވަގުތައް ހުރިހާއެންމެންވެސް ކުޅިވަރުތައް ކުޅުން ހުއްޓާލައެވެ. ނަމަވެސް ކޮފީބޯން ތިބޭނަމަ، ރަތްވިލާ އޮއްސެންދެންވެސް ތިބެވޭތަން އާދެއެވެ. މިއީ މިފަދައިން ކޮފީތަކަށް ގޮސްއުޅޭ ފަރާތްތަކުގެ ދިރިއުޅުމުގެ ވައްޓަފާޅިއަށް ގެންނަންޖެހޭ ވަރަށް މުހިންމު ބަދަލެކެވެ. ސަބަބަކީ މިފަދައިން އަމަލުކުރާނަމަ، ކޮފީ މޭޒުމަތީގައި ހޭދަކުރާ ވަގުތަކީވެސް މާތް ﷲ ގެ ހަޟްރަތުން ސަވާބާއި ދަރުމަ މިންވަރުކުރައްވާނޭ ވަގުތުތަކަށް ވެދާނެއެވެ. އެއާއި އެކު ކޮފީއެއް ބޯލުމުން އެ ލިބޭ އުފަލަކީ ދެމިގެންދާ އުފަލެއްކަމުގައި ވެދާނެއެވެ.