ބައެއްމީހުން އެމީހުންގެ ދިރިއުޅުން ރާވާ ތަރުތީބު ކުރަނީ އެކި ގޮތްގޮތަށެވެ. އެއްބަޔަކު ކައިވެންޏަކާއި ހަމައަށް ގޮސް ދެމަފިރިންވެސް ވަޒީފާއަަށް ދެއެވެ. އެއާއި އެކު އެ ލޯބި ލޯބި އާއިލާއަށް ކުއްޖަކު އުފަންވެއެވެ. އެހިސާބުންވެސް ދެމަފިރިން ވަޒީފާ އަދާކުރަމުން ދެއެވެ. އިންތިހާބީ މަގާމުތަކަށް އަންހެނުން ކުރިމަތިލުން ވާޖިބުކުރާ އުސޫލެއް ރާއްޖޭގައިވެސް މި ވަނީ ތައާރަފު ކޮށްފައެވެ. މިއީ އަންހެނުން ބާރުވެރި ކުރުމާއި އަންހެނުންނާއި ފިރިހެނުން ހަމަހަމަ ކުރުމުގެ ސިޔާސަތުގެ ދަށުން ކުރެވުނު ވަރުގަދަ ބޮޑު މަސައްކަތެކެވެ.

ދިރިއުޅުމުގައި ކާމިޔާބީ ހާސިލްވުމަކީ މަތީމަގާމުތަކާއި ބޮޑު މުސާރަލިބޭ ތަނަވަސް ދިރިއުޅުމެއް ކަމަށް ގިނަ ބަޔަކަށް ގަބޫލުކުރެވެއެވެ. ނަމަވެސް ކޮންމެ އަންހެނަކާއި ފިރިހެނަކަށް މާތް ﷲ ދެއްވާ ދަރިންނަކީ ހަގީގަތުގައި އެމީހުން، ހަގީގީ ކާމިޔާބީއާއި ހިސާބަށް ފޯރުކޮށްދޭނޭ އެންމެ އަގުބޮޑު ރައުސުލްމާލެވެ. އެއީ މާތް ﷲ އެމީހުންނަށް ދެއްވާ އަމާނާތެކެވެ. އަދި އެއީ މައިންބަފައިން އިމްތިހާނުކުރާ މަގެއްކަމުގައިވެސް އިލްމުވެރިން ދެކިލައްވައެވެ. ހަމަ އެއާއި އެކު ކޮންމެ މީހެއްގެވެސް މައިން ބަފައިންނަކީ އެމީހަކު ކާމިޔާބީ ހޯދުމަށް ކުރާ ދަތުރުގެ ހުންގާނެވެ.

އިންސާނާ ގަބޫލުކުރާ ކާމިޔާބީ ހޯދުމަށް ނުވަތަ ލިބިގަތުމުގައި، ﷲ ގެ ފާރުން އެމީހުންނަށް ދެއްވި ދަރިންނަށާއި، އެމީހުންގެ މައިންބަފައިންނަށް އިހުމާލުވެވޭތަން އެބަ އާދެއެވެ. އެ ދަރިންނަށާއި މައިންބަފައިންނަށް ފޯރުކޮށްދޭންޖެހޭ ހައްގުތައް އެންމެ ފުރިހަމަ އަށް ފޯރުކޮށް ނުދެވޭކަމީ ހިތާމަ ހުރިކަމެކެވެ. މިކަންކަމުގެ މައިގަނޑު ސަބަބެއްކަމުގައި ގިނަ ފަހަރަށް ވަނީ ދެމަފިރިންވެސް ވަޒީފާ އަދާކުރުމެވެ. އެކަމުގެ ސަބަބުން ދަރިން އެކުދިންގެ މައިންބަފައިންގެ ފުރިހަމަ ލޯބިން މަހުރޫމުވެއެވެ. މައިންބަފައިން އެމީހުންގެ ދަރީންގެ ފުރިހަމަ އަޅާލުމާއި އޯގާތެރިކަމުން މަހުރޫމުވެއެވެ. މިފަދައިން ދަރިންނަށް މަހުރޫމުވާ އާއިލީ ލޯތްބާއި ކުލުނު އެކުދީންނަށް ދެވޭ ކަމަށް މިފަދައިން އަމަލުކުރާ ބެލެނިވެރިން ބުނެއެވެ. ހަމަ އެގޮތަށް އެމީހުންގެ މައިންބަފައިންނަށް ހަރަދު ކުރާ ކަމާއި ބަލާނޭ މީހަކުވެސް ހޯދައި ދީފައި ހުންނާނޭކަމަށް އަޑުހަރުކޮށް ބުނެ އުޅެއެވެ.

ވަޒީފާއަދާ ކުރާ ދެމަފިރިން، ވަޒީފާއަށް ދާ ވަގުތު އެމީހުންގެ ލޯބި ލޯބި ދަރިފުޅު، އެމީހުންގެ މައިންބަފައިންނާ ހަވާލުކުރެއެވެ. މާތް ﷲ އެމީހުންނަށް ދެއްވި އެ އަމާނާތް އަނެއްކާ އެހެންފަރާތެއްގެ އަތަށް އަމާނާތެއްގެ ގޮތުގައި ދެމުން ގެންދަނީ އެމީހުން ގަބޫލުކުރާ ކާމިޔާބީ ހޯދުމަށެވެ. މައިންބަފައިން މުސްކުޅިވެފައިވާ ދުވަހު، އެމީހުން ބަލަން ބިދޭސީން ގެނެސް، އެމީހުން ދަރީންނާއި ވަކިން ދުރުގައި ގެންގުޅެމުން ދެއެވެ. އެހެނީ އެ މުސްކުޅި މަންމަ އާއި ބައްޕަގެ ފަރާތުން، ތިބާ ގަބޫލުކުރާ ކާމިޔާބީއަށް ހުރަސް އެޅޭ ކަމަށް އެމީހުން ގަބޫލު ކުރެއެވެ. މި ވިޔާނުދާ އަމަލުތައް އަދުގެ ޒުވާނުންގެ ފަރާތުން ފެންނަކަމީ ހިތާމަ ހުރި ކަމެކެވެ.

އޭ ޒުވާނުންނޭވެ! ދެމަފިރިން ވަޒީފާ އަދާނުކުރާށެކޭ ނުދަންނަވަމެވެ. ނަމަވެސް ތިބާގެ ދަރިން ތިބާގެ މައިންބަފައިން އަތަށް ޖަހާފައި ވަޒީފާއަށް ދިއުމަކީ އަދި އެންމެ ރަނގަޅު ގޮތެއް ނޫނެވެ. ތިބާގެ މައިންބަފައިން އެކަނިކޮށް އެމީހުންނަށް އަޅާނުލާ، މަޒީފާއަށް ދިއުންވެސް އަމުދުން ރަނގަޅެއްނޫނެވެ. އަދި އެއީ ހަގީގީ ކާމިޔާބީ ހޯދުމަށް ވަރަށްވެސް ނުބައިވެގެންވާ މަގެކެވެ.