ދިވެހިރާއްޖޭގައި އުޅޭ ބިދޭސީންގެ އަދަދު އިތުރުވުމުގެ ޝަކުވާއަކީ އޭގައި ކޮޅެއް މެދެއް އެނގެން އޮތް ޝަކުވާއެއް ނޫނެވެ. ގަވައިދާ ހިލާފަށް އުޅޭ ބިދޭސީންގެ މައްސަލައަކީ އަމުދުން، ހައްލުކުރާނޭ ނުވަތަ ކުރެވޭނޭ އުސޫލެއް، އަތްފުނާ އަޅައިގެންވެސް ހޯދިފައިނުވާ ބޮޑު މައްސަލައެކެވެ. އާދޭހެވެ! މި ރާއްޖޭގެ ވަޒަންވެރިންނަކީ ދިވެހިންނެވެ. ނަވެސް ބިދޭސީންނަކީ މިއަދު މި ރާއްޖޭގެވެސް "ވަޒަންވެރީންނޭ" ބުނެވޭހާވެސް އެވެރިންގެ އަދަދު ގިނައެވެ. މިއީ މައްސަލައެއް ނުވަތަ ގޯހެއް ނަމަ، މިކަމުގައި ތުހުމަތުގެ އިނގިލި ދިއްކޮށް ބަދުނާމު ކުރާންވީ، ހަމަ ދިވެހިންގެ އަމިއްލަ ނަފްސުތަކެވެ.

ދިވެހިންނަކީ ޒަމާނުއްސުރެ މަސައްކަތްތެރި ހީވާގި ބަޔަކު އުޅެމުން އައި ގައުމެކެވެ. ނަމަވެސް ބަވަނަވަމުން ދިޔަ ދުނިޔޭގައި، ޒަމާނާއި އެއްގޮތަށް ދިވެހިންގެ އުޅުމާއި ގުޅުންތައް ބަދަލުވެ، ދިވެހިން ކުރަމުން އައި ގިނަ މަސައްކަތްތަކަކީ މިއަދު ދިވެހިން ނުވެސް ދަންނަ މަސައްކަތްތަކަކަށްވެ ނިމިއްޖެއެވެ. ނަތީޖާއަކަށް ވެގެން ދިޔައީ އެ މަސައްކަތްތަށް ކުރަން ބޭރު ބިދޭސީން ރާއްޖެއަށް ގެންނަން ޖެހުމެވެ. މިކަން ވެގެން ދިޔައީ ދިވެހިންގެ މަސަައްކަތްތެރިކަން ފަޑުކޮށްލި އަނދިރި، ކަޅު ވިލާގަނޑަކަށެވެ.

ދިވެހިރާއްޖޭގައި ކުރެވޭ މަސައްކަތްތަކުގައި ބިދޭސީއަކު ބައިވެރިނުވާ ނުވަތަ ޝާމިލު ނުވާ އެންމެ މަސައްކަތެެއްވެސް ނުހުންނާނޭ ބުނުން ދޮގަކަށް ނުވާނެއެވެ. ދިވެހިން، އުވަދަވާ ގާތަޅައިގެން ރާނާ އުޅުނު ގެދޮރުތައް މިއަދު ރާނަނީ ބިދޭސީންނެވެ. ވަޅުކޮނެ އިންދާ ހެއްދި ގަސްތަކުގައި މާ ޖައްސަން ތިބީ ބިދޭސީންނެވެ. ދިވެހިންގެ ލޭނާރު ކަމުގައިވި މަސްވެރިކަމުގައި މިއަދު ބިދޭސީންގެ ބައިވެރިވުން ވަރަށްވެސް ބޮޑެވެ. ދިވެހި ދަރީންނަށް ފޮޅުވަތް އަޅައިދީ އަކުރު ކިޔައިދޭންވެސް ތިބީ ބިދޭސީންނެވެ. ދަތެއްގައި ރިއްސާލިޔަސް، މޭކޮޅަށް ވައިގަނޑެއް އެރިޔަސް، ފަރުވާކޮށްދެނީ ބިދޭސީ މީހެކެވެ. މާބަނޑު މީހުންގެ ބަނޑުގައި ތެޔޮދަމައިދީ އުޅުނު ދިވެހިންގެ ބަދަލުގައި ފޫޅުމައިންނަށާއި ވިއްސާ ޑަކްޓަރުންނަށް ތިބީ ބިދޭސީންނެވެ. އެންމެ އާދައިގެ ކަންކަމަށް ބަލައިލާއިރު، ކައިފަ ބާކީ އުލާލެވެނީ ބިދޭސީ މީހެއް ލައްވައެވެ. ތަރުކާރީކޮޅެއް ރޯފިލުވައިލެވެނީ ބިދޭސީމީހަކު އެކަން ކޮށްދިނީމައެވެ. ބޯހިޔާވަހިކަމެއް، ބޯނެ ފެންފޮދެއްވެސް ލިބެނީ ބިދޭސީ މީހެއް ކުރާ ބުރަ މަސައްކަތްތަކަކުންނެވެ. މިއީ މިއަދު ދިވެހިންގެ ފެންވަރެވެ.

މިހާލަށް ދިވެހިން ވެއްޓިގެން ދިޔައީ ކަރުގޮށްލީ އަތްދިގު ގަމީހާއި ކުލަ ކުލައިގެ ރީތި ޓައީތަށް ތައާރަފުވި ފަހުންނެވެ. ދާހިއްލުމަކީ "އަތްޗި" ކަމެއް ކަމަށް ބަލައިގަނެވުމުންނެވެ. މިކަމުގެ ސަބަބުން ރާއްޖޭގައި ގިނަވި ބިދޭސީން، މިއަދު އެ މަސައްކަތްތައް ކުރުމުގައި ދިވެހިންގެ ގައިން، "ލޭބޮމުން" ދާއިރު، ނަފްރަތާއި ރުޅިވެރިކަން ދިވެހިން ބަހައްޓަނީ އެ ބިދޭސީންނާއި ދިމާލަށެވެ. ގޭގައި ކުޑަނަމަވެސް މަސައްކަތެއް އޮތްނަމަ އެފަދަ ބިދޭސީއަކަށް ގޮވާލެވެއެވެ. އެމީހުން ކިޔަނީ ހިތުހުރި އަގެކެވެ. ބުނި އަގަކަށް އެކަމެއް ހަވާލުކުރުން ނޫން ގޮތެއް ދިވެހިންނަކަށް މިއަދަކު ނެތެވެ. އެހެނީ މިއަދުގެ ދިވެއްސަކަށް އެފަދަ މަސައްކަތެއް ކުރާނެ ހިތްވަރެއް ލިބިފައެއްނެތެވެ. ނުވަތަ އެ މަސައްކަތެއް ކުރަން އަމުދުން ނުވެސް ދަންނަނީއެވެ. މިހާލަށް ދިވެހިން ވެއްޓިގަނެ، ބިދޭސީން ކިޔާ ބޮޑު އަގުތަކަށް ޝަކުވާކޮށް ނަފްރަތުކުރަންވީ އެއްވެސް ހައްގެއް ދިވެހިންނަކަށް ނޯންނާނެއެވެ. އެމީހުން އެމީހުންގެ ވަޒަނުގައި ތިއްބާ، ތިމަންނާމެންގޭ ނަޖިސްވަޅުގަނޑު ސާފުކުރަން އެމީހުން ރާއްޖެ ގެނުވީ ދިވެހިންނެވެ. ދިވެހިންނަކީ އެއްކަމެއްވެސް ކުރަން ނޭނގޭބަޔަކަށްވެގެން ތިބެ، ބިދޭސީ މީހެއްކަމުން ހުރިހައި ކަމެއް ކުރަން ހަވާލުކުރީ ދިވެހިންނެވެ. މިއަދު އެކަންކަމުގެ "ބާރު"، ބިދޭސީން ނަގަމުން ދާއިރު ދިވެހި މީހާ މިހުންނަނީ ބިދޭސީ މީހާގެ ކުރިމަތީ ގޮތްހުސްވެފައެވެ، އަނދަގޮނޑި ޖެހިފައެވެ.

ކަންމިހެން ހުރުމާއި އެކު ބިދޭސީންނާއި ދޭތެރޭ ޝަކުވާކުރެވޭލެއް މަދެއްނޫނެވެ. ނުރުހުންވެ ހުރެ އެއްޗެހި ކިޔޭލެއްވެސް މަދެއްނޫނެވެ. ކިތަންމެ އެއްޗެއް އެމީހުންނާއި ދިމާލަށް ކިޔާ ހެދިނަމަވެސް، ތިމާ ބަނޑަށްލާ ކާއެތިކޮޅު ތައްޔާރު ކުރުވަނީ އެއިން މީހަކު ލައްވައެވެ. މިއީ މިއަދު ދިވެހިންގެ ފެންވަރެވެ. މިއީ ބިދޭސީން މަސައްކަތްތަކުގައި ދިވެހިންގެ މައްޗަށް އަތްގަދަކޮށްފައި އޮތް މިންވަރެވެ. ވިސްނައިފި ބަޔަކަށް މިކަންކަމުގައި އެތައް ފިލާވަޅުތަކަކާއި ދަރުސްތަކެއް ލިބިދޭނޭކަން ޔަގީނެވެ.