ހިނިތުންވުމަކީ ޞަދަގާތެކެވެ. ކަން އޮތީ މިހެންނެވެ. އެއްބަޔަކު އަނެއްބަޔަކަަަށް، އެކަކު އަނެކަކަަށް ހިނިތުންވެ ވާހަކަ ދައްކާ އުޅޭކަމީ މުޖުތަމައުތަކުން ފެންނަ ވަރަަސްވެސް ރީތި އާދައެކެވެ. އެހެންނަމަވެސް މިފަދައިން ހިނިތުންވެ ހުރެ ވާހަކަ ދެއްކުމަށްފަހު، އެނބުރި ފުރަގަސްދީ އެ މޫނު މުޅިން ބަދަލުކޮށްލާ މީހުން އުޅެއެވެ. މިއީ ވަރަށްވެސް ހިތާމަހުރި ކަމެކެވެ.

ހަލަބޮލި މި ދުނިޔޭގައި އެއްބަޔަކު އަނެއްބަޔަކާއި އެކި ކަންކަމުގައި ވާދަކޮށްފާނެއެވެ. ވާދަކުރަން ޖެހިދާނެއެވެ. މިފަދަ ކޮންމެ ހާލަތެއްގައި އެ ވާދަވެރިކަން ހަސަދަވެރިކަމަށް ބަދަލުވާނަމަ އެއީ ހެދޭ ވަރަށްބޮޑު ގޯހެކެވެ. މިފަދައިން ކަން ހިނގާނަމަ އެ މުޖުތަމައެއްގައި ސުލްހަ އާއި އަމަން އަމާންކަން ދެމިއޮތުމަކީ މުސްތަހީލު ކަމެކެވެ. 

އާދޭހެވެ! ބައެއްމީހުންނަކީ އެމީހުން އަދާކުރާ ވަޒީފާގެ ގޮތުން ތަފާތު އެތައް ބަޔަކާއި ކުރިމަތިލާ ވާހަކަ ދައްކަން ޖެހިފައިވާ ބައެކެވެ. މިފަދަ ބައެއް ވަޒީފާތަކުގައި އުޅޭ މީހުން، އެމީހުންގެ ގާތަށް ހިދުމަތްތައް ހޯދުމަށް އަންނަ މީހުންނަށް ހިނިތުންވެ މުހާތަބު ކުރެއެވެ. ނަމަވެސް އޭނާ އަނބުރާ ދާ ހިސާބުން، އޭނާއާ މެދު ހިތް ނުތަނަވަސްކަން އިސްކޮށް ޝަކުވާ ކުރުމާއި ބަހަނާ ދެއްކޭ ގޮތް ވެއެވެ. އޭނާއި މެދު ހިތްހަމަނުޖެހުން އިސްކޮށް ނަފްރަތުގެ ބަސްތައް ބުނެވެއެވެ. ކަން މިހެން ވެއްޖެ ނަމަ، ނުވަތަ ކަން ވަނީ މިހެން ކަމުގައި ވަނީނަމަ، އެ ވެވުނު ހިނިތުންވުމަކީ ޞަދަގާތަކަށް ވާނެހެއްޔެވެ؟ އާދޭހެވެ! ޔަޤީނެވެ. އެ ހިނިތުންވުން ޞަދަގާތަކަށް ވާނޭ ހަމަ އެންމެ ހަމައެއްވެސް ނޯންނާނެއެވެ. އެހެންކަމުން ތިމާ އަނެކާއަށް ދޭ ހިނިތުންވުމަކީ ޞަދަގާތަކަށް ހެދުމަށް ވަރަށްވެސް މުހިންމު ސަމާލުކަމެއް ދޭންވާނެއެވެ. އެ ހިނިތުންވުމުގެ ފަހުން އަނެކާއާއި މެދު ނަފްރަތާއި ރުޅިވެރިކަން ދައްކައިގެން ނުވާނެއެވެ.

އަދުގެ މުޖުތަމައުތައް، މިހާލަތަށް ވަރަށްވެސް ބޮޑަށް ފެތެއެވެ. އެކުވެރި މުޖުތަމައުތަކުގައިވެސް ފޮރުވިފައިވާ އެތައް ހަސަދައެއް ވެއެވެ. އޭގެ ސަބަބުން އެކަކު އަނެކަކަށް ވެވޭ މި ހިނިތުންވުން ހަސަދައިގެ އަލިފާނަށް ވެއެވެ. އެ މާތް ޞަދަގާތް، ފިތުނަވެރި ކަމަކަށް ބަދަލުވެއެވެ. މިއީ ވަރަށްވެސް ހިތާމަހުރި، ވޭނީ އަމަލެކެވެ. 

ކަން އޮތީ މިހެންކަމުން، ކޮންމެ މީހަކީވެސް ހިނިތުންވާއިރު އިހުލާސްތެރިކަމާއި އެކު ހިނިތުވާން އެނގޭ މީހަކަށް ވާން ޖެހެއެވެ. އެފަދައިން އިހުލާސްތެރިކަމާއި އެކު ވެވޭ ހިތްހެޔޮ ހިނިތުންވުންތަކަކީ މުޖުތަމައުގެ ލޮތްބާއި މުޖުތަމައުގެ ގުޅުން ބަދަހިވެދާނޭ ކަމެކެވެ. މުޖުތަމައުގެ އަމަން އަމާންކަމާއި ސުލްހަ ދެމިގެންދާނޭ ސިއްރެއްވެސް މެއެވެ.