ކޮންމެ މުޖުތަމައެއްގައި ހިނގާ ކަންކަމާއި އުޅޭ ބައެއްގެ ސަބަބުން އެ މުޖުތަމައަކަށް އެކި އެކި އަސަރު ފޯރައެވެ. އެއީ އެއްބައިފަހަރަށް އެދެވޭ އަސަރުތަކެވެ. އަދި އަނެއްބައި ފަހަރަށް އެއީ ނޭދެވޭ އަސަރުތަކެކެވެ. އެހެންކަމުން މުޖުތަމައުތަކުގެ ބަދަހިކަމާއި އިޖްތިމާއީ ފޭރާމުގެ ނަލަކަން ދެމިއޮތުމުގައި އެ މުޖުތަމައެއްގެ ހާލަތާއި އެ މުޖުތަމައެއްގައި ހިނގާ ކަންކަމާއި، އެމުޖުތަމައެއްގައި އުޅޭ ބައެއްގެ ދައުރު ވަރަށްވެސް ބޮޑެވެ.

އިޖްތިމާއީ ފޭރާން ވީދި ކުދިކުދިވުމުގައި މުޖުތަމައުތަކުގެ ހާލަތު އަދާ ކުރާ ދައުރަށް ބަލައިލަމާ ހިނގާށެވެ. ކޮންމެ މުޖުތަމައަކީ އެ މުޖުތަމެއް ފެތޭ ވަކި ހާއްސަ ހާލަތެއް އޮންނަ މުޖުތަމައެކެވެ. އަމާން ކަމާއި ނާމާން ކަމެވެ. އެކުވެރި ކަމާއި ރުޅިވެރިކަމެވެ. އެއްބައިވަންތަކަމާއި ބައިބައިވުމެވެ. ހިތްވަރު ދިނުމާއި ހަސަދަވެރި ވުމެވެ. މި ސިފަތަކުން ކުރެ ހެޔޮ ކޮންމެ ސިފައެއް ލިބިގެންވާ މުޖުތަމައަކީ އަލި ކުރިމަގެއް އެދެވިގެން ތިބޭނޭ ބައެކެވެ. ނަމަވެސް މި ސިފަތަކުން ކުރެ ނުބައި ސިފައެއް ނުވަތަ ސިފަތަކެއް ލިބިހުރި މުޖުތަމައަކީ ހަލާކާއި ފަސާދައަށް އެދިގެން ތިބޭނޭ ބައެކެވެ. މުޖުތަމައެއްގައި ނާމާންކަން ފެތުރިއްޖެނަމަ އެ މުޖުތަމައެއްގެ އަމާންކަން

ގެއްލި ހަލާކަށް ހުށަހެޅޭނެއެވެ. އެކުވެރިކަން ނެތި ރުޅިވެރިކަން އާންމުވެއްޖެ ނަމަ ފަސާދައަށް ހުށަހެޅޭނެއެވެ. އެއްބައިވަންތަކަން ރޫޅި ބައިބައިވުން އުފެދިއްޖެނަމަ ވީރާނާވާން ފަށާނެއެވެ. ހިތްވަރު ދިނުން ނެތިގޮސް ހަސަދަވެރިކަން އާންމުވެއްޖެ ނަމަ ކުރިއަރާ ދިއުން ނެތިގެން ހިނގައިދެއެވެ.

މުޖުތަމައުގައި ހިނގާ ކަންކަމުގެ ސަބަބުން އިޖްތިމާއީފޭރާން ވީދެނީ މަދެއްކޮށެއް ނޫނެވެ. އެ މުޖުތަމައަކީ ކުށްކުރުން އާންމު މުޖުތަމައެއްނަމަ، އެ މުޖުތަމައެއްގެ ތެރޭގައި އެއްވެސް ދިރުމެއް ނުވާނެއެވެ. އެއީ ދީނާ ބީރައްޓެހި މުޖުތަމައެއްގައި އެ މުޖުތަމައަކުން އީމާންތެރިކަމުގެ އަލި ފަނޑުވަމުން ހުނގައިދާނެއެވެ. ވަށްކަމާއި ފޭރުމާއި މަސްތުވާތަކެތީގެ ވަބާ އާންމުވެފައިވާ މުޖުތަމައެއްނަމަ އެއީ ވީރާނާވެފައިވާ މުޖުތަމައެކެވެ. މިހެންގޮސް މިފަދަ ކިތަންމެ ކަމެއްގެ ވާހަކަ ބުނެވުދާނެއެވެ.

ދެންއޮތީ މުޖުތަމައުގައި އުޅޭ މީހުންގެ ސަބަބުން އިޖްްތިމާއީ ފޭރާމާއި ދުރޫސުލް އަހުލާގު ނެތިގެންދާ ސަބަބުތަކެވެ. ފަހަރުގައި މިފަދަ މުޖުތަމައަކީ ހާލަތާއި ވަމުންދާ ކަންކަމުގައި އިޖްތިމާއީ ގުޅުން ބަދަހިވާފަދަ މުޖުތަމައަކަށް ވެދާނެއެވެ. ނުވަތަ އިޖްތިމާއީ ފޭރާން ވީދެންވީ ސަބަބެއް ނެތް މުޖުތަމައަކަށް ވެދާނެއެވެ. ނަމަވެސް އެ މުޖުތަމައެއްގައި އުޅޭ ބައެއްގެ ސަބަބުން އެ މުޖުތަމައެއް ހަލާކަށް ހުށަހެޅޭލެއް އަމުދުން ސިއްރުވެފައި ފަސޭހަވެއެވެ. މުޖުތަމައެއްގައި އުޅޭނީ ދަރިންނަށް އަޅާލުން ކުޑަ ބެލެނިވެރިންތަކެއް ނުވަތަ މައިންބަފައިންތަކެއް ނަމަ އެ މުޖުތަމައެއްގެ ކުރިމަގާއިމެދު އިތުރު ވިސްނުމަކުން ވިސްނޭނޭ ޖާގައެއް މިޒަމާނަކު ނޯންނާނެއެވެ. އެހެނީ ފަރުވާކުޑަ މައިންބަފައިންގެ ފަރާތުން ނުވަތަ އިހުމާލުވާ ބެލެނިވެރިންގެ ފަރާތުން ނެތި ދާން އޮތީ ނުވަތަ ހަލާކުވެދާން އޮތީ ކިތައް ޖީލުކަން އަހަރެމެންނަށް ނޭނގޭނެތީއެވެ. މައިންބަފައިންގެ ވާހަކަ އެކަނި ދެއްކުމަކުން ނުފުދެއެވެ. ޒިންމާދާރު އެކި އެކި އިސް މަގާމުގުތަކުގައި ކަންކަމާއި ތަންތަން ހިންގުމާ ހަވާލުވެ ތިބޭ ފަރާތްތަކުގެ ކަންނެތްކަމަކީވެސް މުޖުތަމައެއް ހަލާކަށް ހުށަހެޅޭނޭ ކަމެކެވެ.

މިއީ ހައްތަހާވެސް އިޖްތިމާއީ ގުޅުންތައް ހަލާކުވުމާއި ދުރޫސުލް އަހުލާގު ނެތި ދާނޭ ކަންކަމާއި ސަބަބުތަކެވެ. ކުދި ކުދި މުޖުތަމައުތަކުގެ ދިރުމާއި ހެދިބޮޑުވުމުގައި އެ މުޖުތަމައުތަކުގެ އިޖްތިމާއީ ގުޅުމަކީ ވަރުގަދަ ބިންގާއެކެވެ. އެހެންކަމުން މުޖުތަމައުތަކުގެ ހާލަތާއި މުޖުތަމައުތަކުގައި ހިނގާ ކަންކަމާއި މުޖުތަމައުތަކުގައި އުޅޭ މީހުން އިސްލާހުވާން ނުވަތަ ކުރަން އެބަޖެހެއެވެ. ނޫންނަމަ ޖީލަކަށްފަހު ޖީލެއް ހަލާކުވުމުގެ ފުރުސަތު ބޮޑުވާނެއެވެ. މިއީ ކޮންމެ އަފުރާދަކު ވިސްނަން ޖެހޭނޭ ދީނީ، ފަރުދީ، ގައުމީ އަދި ރަށްވެހި ވާޖިބެކެވެ.