އެއްވެސް އިންސާނަކީ އޭނާގެ ފަރާތުން ބޮޑެތި ނުވަތަ ކުދި ނަމަވެސް ކުށެއް ނުވަތަ ކުށްތަކެއް ތަކުރާރުވާކަން ގަބޫލު ކުރަން ބޭނުންވާނޭ މީހެއް ނޫނެވެ. އެހެނީ ކޮންމެ މީހަކުވެސް ގަބޫލުކުރާގޮތުގައި އެމީހަކީ ސާފު ހުދު ބިއްލޫރިގަނޑެކެވެ. މިއީ ދުނިޔޭގައި އާދަވެ ކަންކަން ހިނގަމުންދާ މަގެެވެ.

އާދޭހެވެ! ކަން އޮތީ މިހެން ކަމުގައި ވީނަމަވެސް ކޮންމެ މީހަކީވެސް ކުށް ކުރެވޭ އަދި ކުށް ތަކުރާރު ކުރެވޭނޭ މީހެކެވެ. މި ހަގީގަތް އިންސާނާ ގަބޫލުކުރަން ޖެހޭނެއެވެ. ނަމަވެސް ހިތާމައަކީ މި ހަގީގަތާ ކުރިމަތިލާން ކެރޭ އިންސާނުން މަދުކަމެވެ. މިކަމުގެ ސަބަބުން، މުޖުތަމައުތަކުގެ ހަމަޖެހުން ގެއްލެއެވެ. މުޖުތަމައުތަކުގައި އަރާރުން ވުމާއި ދެބަސްވުން ގިނަވެއެވެ. ކާމިޔާބީގެ މަގުން ނެއްޓި، ހަލާކާ ފަސާދައިގެ މަގަަށް އެޅިދެއެވެ.

އިންސާނުން ކުރާ ގިނަ ކަންކަމަކީ ކޮންމެވެސް އެހެން އިންސާނަކާއި އެކު ނުވަތަ އެހެން އިންސާނުން ތަކެއްގެ ބައިވެރިވުމާއި އެކު ކުރާ ކަންކަމެވެ. އެހެންކަމުން އަބަދުވެސް ހިޔާލަކީ ތަފާތުވާނޭ އެއްޗެކެވެ. އަދި ކުށްކުށަކީ ކުރެވި ތަކުރާރުވެސް ވާނޭ ކަންކަމެކެވެ. ނަމަވެސް އެ ބަޔަކު ކުރަމުންދާ ކަމެއްގެ ކުރިބޯއްޓާއި ހަމައަަށް ވާސިލް ވެވޭނީ މިދެންނެވި ތަފާތު ހިޔާލު ތަފާތުވުންތަކާއި، ކުށްތަކުގެ ތެރެއިން އަލި މަގެއް ހޯދައިގެންނެވެ. މިފަދައިން އަލި މަގެއް ހޯދޭނީ، ހިޔާލު ތަފާތުވާހިނދުގައި ކޮންމެވެސް އެކަކު ނުވަތަ ބަޔަކު ދޫދީގެންނެވެ. ކުށެއް ކުރެވި ނުވަތަ ކުށެއް ތަކުރާރުވާނަމަ، އެކުށެއް ކުރެވުނު ބަޔަކު ނުވަތަ މީހަކު އެ ކުށް ގަބޫލުކޮށް، އިސްލާހު ކޮށްގެންނެވެ. މިނޫން މަގަކުން ކަން ކުރަން ވިސްނައިފި ނަމަ، ކުރި ކަމެކޭ ނުކުރާ ކަމެކޭ އެއްވަރުވެ، ފަރުނުޖެހި، "ފަރުޖައްސަން" ޖެހިދާނެއެވެ.

އާދޭހެވެ! ކުށެއް ކުރެވުމަކީ ތިމާގެ އަގު ވެއްޓި، ތިމާގެ ގަދަރު ކުޑަވެ، ތިމާގެ މޮޅުކަން ފިލާގޮސް، އެންމެންގެ މެދުގައި ތިމާ ފަލީހަތްވާ ވަރުގެ ކަމެއް ނޫނެވެ. ކުށެއް ކުރެވި އެ ކުށަށް އިއުތިރާފުވާ މީހާއީ، ކުށެއް ކުރެވި، ތިމަންނާ ކުށެއް ނުކުރަމޭ ބުނެ ކުށުން ބަރީއަ ވެގަންނަން ދޮގުހަދާ މީހާއަށްވުރެ އެތައް ގުނައަކުން ހިތްވަރުގަދަ، ކެރޭ، މޮޅު މީހެކެވެ. މި ހަގީގަތް އެންމެންވެސް ގަބޫލު ކުރަން އެބަޖެހެއެވެ. އެހެނީ މިއަދު ތިބާއަށް ކުށެއް ކުރެވި، އެކުށަށް އެއްބަސް ނުވާން ދޮގުހެދޭނަމަ، މާދަމާ ތިމާގެ ކުރިމަތީ އަނެކާވެސް އެފަދައިން އަމަލުކޮށްފާނެއެވެ. އެހެން ކަންކަން ވާނަމަ އެ ބަޔަކީ ދިރިއުޅުމުގައި "ފުލައްބަރު" ބައެކެވެ. އެމީހުންނީ ހަޔާތުގެ ތަނަވަސްކަން ނުލިބި އެހެންމީހުންގެ މަލާމާތާއި ނަފްރަތުގައި އުމުރު ހުސްކުރަން ޖެހިދާނޭ ބައެކެވެ. މިއީ ވިސްނާލުން މުހިންމު ކަމެކެވެ.

ކުށެއް ކުރެވޭ ކަމާއި ކުށް ތަކުރާރު ކުރެވޭކަން ކޮންމެ އިންސާނަކުވެސް ގަބޫލު ކުރަން ވާނެއެވެ. މިއީ ކާމިޔާބު ހަޔާތަކަށް މަގުކޮށައިދޭ ކަތިވަޅިއެކެވެ. ތިމާގެ ހަޔާތުގައި ޖަމާވެފައިވާ ކުނިބުނި ސާފުކުރާ ފިހިގަނޑެކެވެ. ގަބޫލު ކުރާށެވެ! ކުށަކަށް އިއުތިރާފު ވުމަކީ ހަޑި ނުވަތަ ލަދުވެތި ކަމެއް ނޫނެވެ. އެއީ ރީތި އަދި ހިތްވަރުގަދަކަމުގެ މިސާލެކެވެ.