ޯއިންސާނާ އަބަދުވެސް އާ ކަންކަމާއި ހޯދުންތައް ތަޖުރިބާ ކުރާނެއެވެ. ދުނިޔެއަކީ ދައުރުވާ އެއްޗެއްކަމުން ދުނިޔޭގައި އުޅޭ އިންސާނުންވެސް ދައުރުވާނެއެވެ. އެއްބަޔަކު ދުނިޔޭގައި އުޅެ، މި ދުނިޔޭގައި އެތައް ކަމެއް ކުރުމަށްފަހު މަރުވެގެން ދެއެވެ. އެއާއިއެކު އަނެއް ބަޔަކު އަނެއްކާވެސް މިދުނިޔޭގައި ކަންކަން ކުރަމުން ގެންދާނެއެވެ. މިފަދައިން އިސްވެ ގޮސްފައިވާ ބަޔަކު ކަމެއްކޮށް، ހޯދުން ތަކެއް ހޯދާ ނުވަތަ ފިލާވަޅުތަކެއް ލިބިގަނެފައިވާނަމަ އެއަށް އަހަރެމެން ކިޔާ އުޅެނީ ތަޖުރިބާއެވެ.

ދުނިޔޭގައި ކަންކަން ކުރަމުން ދާއިރު ދުނިޔޭގެ ތަޖުރިބާ އަކީ ވަރަށް މުހިންމު އެއްޗެކެވެ. އެހެންކަމުން ކޮންމެ ބަޔަކުވެސް، ކަމެއް ކުރާނަމަ ނުވަތަ ކަމަކަށް ކުރިމަތިލާއިރު، އެކަމެއް ނުވަތަ އެފަދަ ކަމެއްގައި މީގެ ކުރިން އެއްވެސް ބަޔަކު އެއްވެސް ކަހަލަ ތަޖުރިބާއެއް ކުރީތޯ ބަލާނެއެވެ. އެފަދަ ތަޖުރިބާތަކުގެ އަލީގައި، އެ ތަޖުރިބާތަކުން ފިލާވަޅު ލިބިގަނެ، ކަން ކުރަންވީގޮތާއި ނުކުރާންވީ ކަންކަން ހޯދާ ދެނެގަންނާނެއެވެ. މި ދަރުސްތަކާއި އިބުރަތްތައް ލިބިގަނެ ކަންކަމާއި އިންސާނުން ކުރިމަތިލައެވެ.

ކަންއޮތީ މިހެން ކަމުގައި ވީނަމަވެސް، ބައެއް އިންސާނުންނަކީ އެމީހުންގެ ހަޔާތުގައި އެހެންމީހުންގެ ތަޖުރިބާއަށް ބަރޯސާވާ ބައެއް ނޫނެވެ. އެފަދަ މީހުން ބޭނުން ވާނީ އެމީހުން އަމިއްލައަށް އެފަދަ ތަޖުރިބާތައް ކުރާށެވެ. މިއީ ބައެއް މީހުންގެ ކިބައިގައި ހުންނަ ސިފައެއް ނަމަވެސް މިއީ މަދު ބައެކެވެ. މިފަދަ މީހުންނަކީ އެމީހުންގެ ހަޔާތުގައި އަބަދުވެސް ތަޖުރިބާގެ މަރުހަލާގައި އުޅޭނޭ ބައެކެވެ. ކުރިއަރާ ދިއުމަކީ ތަންކޮޅެއް ދަތި ކަމެކެވެ. އެހެނީ ބަޔަކު ކުރި ތަޖުރިބާއަކުން ލިބިފައިވާ ފިލާވަޅެއް އޮތް ނަމަވެސް، އަލުން ބަލުން އެ ތަޖުރިބާ ކުރަން އޭނާ ބޭނުންވާތީއެވެ. މިއީ އެހެން އިބާރާތަކުން ދަންނަވާނަމަ އަހަރުތަކެއް ފަހަތަށް ދިއުމެވެ.

އިންސާނާ އަބަދުވެސް ކުރާ ނުވަތަ ކުރެވޭ ތަޖުރިބާތަކަކީ އޭނާގެ ފަހުން އަންނާން ތިބި ބަޔަކަށް ފޯރުކޮށްދިނުން މުހިންމު ތަޖުރިބާ ތަކެކެވެ. ނުވަތަ ފޯރުކޮށްދޭން ޖެހޭނޭ ތަޖުރިބާތަކެކެވެ. ތިބާ ހޯދާ ލިބިގަންނަން ތަޖުރިބާއަކުން ފަހުމްވާ ކަންކަމާއި އެނގި ދަސްވާ ކަންކަމަކީ މާދަމާގެ ޖީލަށް ތިބާ ފޯރުކޮށްދޭންޖެހޭނޭ "ހައްގެކެވެ". އެހެނީ އެއީ މާދަމާގެ ޖީލަށް އޭގެ ސަބަބުން އިބުރަތް ތަކަކާއި ފިލާވަޅުތަކެއް ދަސްވާނެތީއެވެ. ކާމިޔާބީގައި މަސައްކަތް ކުރަންވީ މަގު ދަސްވާނެތީއެވެ. އަނިޔާތަކާއި ނުރައްކާތަކުން ސަލާމަތްވާނޭ މަގު ހޯދުމަށް ފަސޭހަވާނެތީއެވެ. ހަޔާތުގެ އަގުހުރި ވަގުތުތައް ބޭކާރު ކުރިޔަ ނުދިނުމަށެވެ. އާދޭހެވެ! ގަބޫލު ކުރައްވާށެވެ! ތަޖުރިބާއަކީ ވަރަށް ބޭނުން ތެރި އެއްޗެކެވެ. އަދި މި ބޭނުން އެންމެ ފުރިހަމަ ވާނީ އެ ތަޖުރިބާ އަކުން ލިބުނު އިބުރަތާއި ފިލާވަޅު އެހެން ބަޔަކަށް ނުވަތަ އަންނާން އޮތް ޖީލުތަކަށް ފޯރުކޮށްދީގެންނެވެ. ލިބޭ، ނުވަތަ ލިބިފައިވާ ތަޖުރިބާއަކުން ފައިދާ ކުރާނީ އެހެން މީހަކާއި ނުވަތަ ބަޔަކާއި އެ ތަޖުރިބާއެއް ހިއްސާކޮށްގެންނެވެ. އެހެންކަމުން އަހަރެމެން އެންމެންނީ އަހަރެމެންނަށް ލިބޭ ކޮންމެ ތަޖުރިބާއެއްގައި ބޮޑާވެ ކިބުރުވެރިވާ ބަޔަކު ކަމުގައި ނުވެ، އެ ތަޖުރިބާ އެހެން ބަޔަކާ ހިއްސާ ކުރާ ބަޔަކަށް ވާން ޖެހޭނެއެވެ.