ހުކުރު ދުވަހަކީ ކޮންމެ ހަފްތާއެއްގައި އަންނަ އެންމެ މާތް ދުވަހެވެ. އެންމެ މުގައްދަސް ދުވަހެވެ. އެއީ އެންމެ ފުރަތަމަ އިންސާނާ، އަދި އަހަރެމެން އެންމެންގެ ބައްޕަ ކަމުގައިވި އާދަމްގެފާނު ހެއްދެވި ދުވަސްވެސް މެއެވެ. އަދި ކިއެއް، އިސްލާމީ ދަރުސްތަކާއި ނަސޭހަތްތަކުން އެނގޭ ގޮތުގައި ގިޔާމަތް ވާކަން ކަށަވަރީވެސް ހުކުރު ދުވަހެއްގައެވެ. ހުކުރު ދުވަހަކީ އެ ދުވަހަށް ހާއްސަ ނަމާދެއް މުސްލިމުތަކުންނަށް ކަނޑައަޅުއްވައިފައިވާ ދުވަހެކެވެ.

"އިމާމް މީހާ މިންބަރަށް އަރައި ޚުޠުބާކިޔަން ފަށާފަހުން ހުކުރަށް ދިނަމަވެސް ނަމާދު ޞައްޙަވާނެއެވެ. އެހެނަސް ނަމާދުގެ ޘަވާބުން ވަރަށް ބޮޑުބައެއް އުނިވެގެންދާނެއެވެ. 

ހުކުރަށްދާ މީހުން، މިސްކިތަށް އަރާ ތަރުތީބުން މަލާއިކަތް ބޭކަލުން ހުކުރަށްދާ މީހުންގެ ނަންތައް ލިޔުއްވަވާނެތެވެ. އިމާމް މީހާ މިންބަރަށް އަރައި ޚުޠުބާކިޔަން ފެށުމުން މަލާއިކަތްބޭކަލުން އެބޭކަލުން މީހުންގެ ނަން ލިޔުއްވާ ފަތް ބަންދުކޮށްލައްވަވައި ޚުތުބާ އައްސަވަން ފަށްޓަވަތެވެ. ވީމާ އެހިސާބުން ދެން ހުކުރަށްދާ މީހުންގެ ނަން އެފަތުގައި ނުލިޔުއްވަވާނެތެވެ. ވީމާ ޝަރުޢީ ޢުޛުރެއްނެތި ހުކުރަށް ދިއުން ލަސްކޮށްގެން ނުވާނެއެވެ." (މިދިޔަ ހަފްތާގެ ހުކުރު ޚުޠުބާއިން) 

މިއީ ޚުޠުބާ ތަކުންނާއި ދީނީ ދަރުސްތަކުން އަބަދުމެ އަޑުއިވޭ ވާހަކަ ތަކެކެވެ. ނަމަވެސް ހިތާމައަކީ މިވާހަކަތަކަށް ސަމާލުކަން ދޭ މީހަކު، މުސްކުޅިއަކު ނޫނީ ނޫޅޭތީއެވެ. މިއީ ހިތާމަ ހުރި ކަމެކެވެ. އަދުގެ ޒުވާން ބައްޕައިންގެ ފަރާތުން މިކަން ފެނުމަކީ އަމުދުން "މުޑުދާރު" ކަމެކެވެ. އެމީހުން، އެމީހުންގެ ދަރީން ގޮވައިގެން މިސްކިތައް އެރެނީވެސް ޚުޠުބާ ފަށާ ފަހުންނެވެ. މިސްކިތުގައި ތިބެވެނީ ފެންޑާގައެވެ. ނުވަތަ ބޭރުގައެވެ. ޚުޠުބާ އިއްވަމުން ދާ ވަގުތު އެހެން މީހުންނާ ވާހަކަދައްކަމުން ދަނީ ކައިރީގައި ތިމާގެ ދަރިފުޅު ބަހައްޓައިގެންނެވެ. މިއީ ކޮންމެ މަޔަކާއި އަދި ވަކިން ހާއްސަކޮށް ކޮންމެ ބަފަޔަކު ވިސްނަން ޖެހޭ ނުރައްކާތެރި ބިރުވެރި ކަމެކެވެ. މިމަގުން ކަންކަން ކުރުމުން ދަރިންނަށް އެ ދަސްކޮށްދެވެނީ ކޮންފަދަ ނުބައި އާދައެއްތޯއެވެ! އެ ދެވެނީ ކޮންފަދަ ނުބައި ތަރުބިއްޔަތެއްތޯއެވެ! ބޮޑެތި ވަމުން އަންނާނީ ކޮންފަދަ "މުޑުދާރު" ސިފަތަކެއް ލިބިފައިވާ ޖީލެއް ތޯއެވެ!

އާދޭހެވެ! ހުކުރަށް ދެވެނީ ޙުޠުބާ ފަށާ ފަހުންނެވެ. ނަމަވެސް ގަޔަށް ރީތި ހެދުމެއް ލައެވެ. އަތަރާ ސެންޓު އިންތިހާއަށް ޖަހައެވެ. ބޮލުގައި ރީތިކޮށް ފުނާ އަޅައެވެ. ވިސްނާލާށެވެ! ހުކުރަށްދާން ތިބާ އާއި ތިބާގެ ދަރިން ޒީނަތްތެރި ކުރާ ފަދައިން އެ ހުކުރު ނަމާދުވެސް ޒީނަތްތެރިކުރަން ވިސްނާށެވެ. މާދަމާ ފައިދާ ކުރާނީ ތިބާ ވީ ޒީނަތަކުން ނޫނެވެ. ތިބާގެ ނަމާދު ތިބާ ޒީނަތްތެރި ކުރުމުންނެވެ.

މި އަންނަ ހުކުރު ދުވަހު މި ދެންނެވި ކަންކަމަށް އަހަރެމެން އެންމެން ސަމާލުކަން ދޭން ވާނެއެވެ. މައިންބަފައިން ވިސްނާން ވާނެއެވެ. އެފަދައިން ލަހުން ހުކުރަށް ދެވޭ މީހުން އަވަހަށް ހުކުރަށް ދެވޭތޯ ބަލަން ވާނެއެވެ. ދަރިންނަށް ހެޔޮ ތަރުބިއްޔަތެއް ދިނުމުގައި ދެލޯ ހުޅުވާ، ދީނީ ރިވެތި އާދަތަކުން ތަރުބިއްޔަތު ކުރުމަށް އިސްކަން ދޭން ވާނެއެވެ.