ދުނިޔޭގައި އިންސާނުން ދިރިއުޅޭހާ ހިނގަކު، އިންސާނުންގެ ތެރޭގައި އެކިކަލަ މައްސަލަތައް ޖެހުމަކީ ޠަބީއީ ކަމެކެވެ. އިންސާނާއަށް އޮތީ މިފަދަ މައްސަލަތައް ނުވަތަ މިފަދަ ކަންކަމުގައި އިންސާނާށް ދެއްވާފައިވާ ވިސްނުމާއި ބުއްދި އިސްކޮށް، ހެޔޮ މިސްރާބަށް ދިއުމެވެ. ވިސްނުމާއި ބުއްދި އެއްކިބާކޮށް، ކަމުގެ އަސްލާއި ހަގީގަތަށް ނުބަލާ އިންސާނާގެ އަތާއި ބަސް އިސްކޮށްފިނަމަ، އެއީ ފިތުނައާއި ހަސަދައަށް ހޮޅުވޭ ވަރަށް ބޮޑު ދޮރަކަށް ވާނެކަން ޔަގީނެވެ. އެއީ އެ މުޖުތަމައެއްގެ ހަމަޖެހުމާއި އަމަން އަމާންކަމާއި ސުލްހަ މަސަލަސްކަން ނެތިކޮށްލާ ތޫފާނަކަށް ވެދާނޭކަމާއި މެދު ދެބަހެއް ނުވެވޭނެއެވެ.

އާދޭހެވެ! އެއްވެސް ކަމެއްގައި ރުޅި އިސްކުރުމެއް ނެތެވެ. ނަމަވެސް ހިތްހަމަ ނުޖެހޭ ދަނޑިވަޅުގައި އަނެކުންނާއި ދިމާލަށް ބާރަށް އެއްޗެކޭ ބުނެވިދާނެއެވެ. ރުޅިވެރިކަމާއި ހިތްހަމަނުޖެހުމުގެ ޝުއޫރުތައް ފާޅު ކުރެވިދާނެއެވެ. އެއީ އިންސާނީ ޠަބީއަތެވެ. ނަމަވެސް އިންސާނާގެ އަނެއް ޠަބީއަތަކީ ކަންކަމާއި މެދު ވިސްނާ ކަމުގެ ހަގީގަތް ހޯދުމެވެ. ނުވަތަ ހޯދުމަށް ލޯބިކުރުމެވެ. ގިނަ ފަހަރަށަ ރުޅި އަކީ، ފަހުން މި ފާހަގަކުރެވުނު ޠަބީއަތް ނެތިކޮށްލާ އެއްޗެކެވެ. އެހެނަސް އެހެން އެކަން ދިމައިވާނީ، އިންސާނާ ރުޅީގެ މައްޗަށް އޭނާގެ ނަފްސު ކިޔަމަންކުރާ ގޮތަކުންނެވެ.

ދިރިއުޅުމުގައި ދިމައިވާ، ހިތްހަމަނުޖެހޭ ކޮންމެ ކަމެއްގައި އެ ކަމެއްގެ އަސްލު ހޯދާށެވެ. ރުޅި އަންނަންވީ އޭގެ ފަހުގައެވެ. ހޯދުނު އަސްލުގައި ރުޅި އަންނަންވީ ސަބަބެއް އޮތްތޯ ބެލުމަށްފަހިގައެވެ. މިހެން ދެންނެވި ނަމަވެސް، ރުޅިއަކީ ވަރަށް އާދަޔާ ހިލާފު އެއްޗެކެވެ. އެހެނީ ރުޅި އަކީ ތިބާ އަށް ތިބާ އޮޅުވާލާ އެއްޗެކެވެ. ނަމަވެސް އަހަރެމެން އެންމެންނަށް އެނގޭ ގޮތުގައި އެންމެ ކެތްތެރި މީހާއީ، ރުޅި އަންނަ ހިދު، އެ ރުޅި ކޮންޓުރޯލު ކުރާ މީހާއެވެ. އެހެން ކަމުން ދިރިއުޅުމުގައި ދިމައިވާ މިފަދަ މައްސަލަތަކުގައި ރުޅި ކޮންޓްރޯލު ކުރުމަށް ސަމާލުކަން ދޭން ވާނެއެވެ.

ކަމުގެ ހަގީގަތް ނުބަލާ އަތާއި ބަސް އިސްކުރެވޭ މީހާ، ކަމުގެ ހަގީގަތް އެނގުމުން ލަދުގަންނަން ޖެހެއެވެ. މީހުންގެ މެދުގައި ތިބާގެ އަގު ވެއްޓި އިތުބާރު ގެއްލި، އެހެން މީހުންގެ ލޯބިން ތިބާ މަހުރޫމުވެގެން ދެއެވެ. ތިބާގެ ވެރިން، ތިބާ ގޮވައިގެން މަސައްކަތް ކުރުމުގެ ޝައުގުވެރިކަން ފަނޑުވާނެއެވެ. ތިބާގެ ދަށުން މަސައްކަތްކުރާ މީހުން ތިބާގެ ދަށުން މަސައްކަތް ކުރަން ފޫހިވާނެއެވެ. ކަމުގެ ހަގީގަތް ނުބަލާ އަތާއި ބަސް އިސްކުރެވޭ މީހާ ގިނަފަހަރަށް ވާނީ ބަކީއެވެ. ގިނަފަހަރަށް އެ އިސްކުރެވޭ ރުޅީގެ ހޫނު މަޑުވަމުން ދާނީ އަމިއްލަ މީހާގެ ފަންވަރު ގޮސްގެންނެވެ. އެހެން ކަމުން މިއީ ކޮންމެ މީހަކު ވިސްނާލުން މުހިންމު ކަމެކެވެ.

އެންމެ ކެތްތެރިކަން ގަދަ މީހުންގެ ތެރެއިން ވުމަށާއި، އެހެން މީހުންގެ ލޮތްބާއި އިހްތިރާމު ދެމިގެން ދިއުމަށް އެދޭމީހާ ރުޅީގެ މައްޗަށް ވިސްނުން އިސްކުރާށެވެ. ކަމުގެ ހަގީގަތް ބަލާށެވެ. ހަލާ ދަނޑީގެ ދެކޮޅު ބަލާށެވެ! ރުޅި އަންނަންވީ އޭގެ ފަހުގައެވެ. އަދި ކިއެއް، އެއީވެސް ރުޅި އަންނަންޖެހޭ ވަރުގެ ސަބަބެއް އެކަމުގައި ވާނަމައެވެ.