ކޮންމެ އިންސާނަކީވެސް އޭނާގެ ހަޔާތުގައި އުފާވެރި ދިރިއުޅުމެއް ބޭނުންވާނެ މީހެކެވެ. އަދި މިފަދަ ދިރިއުޅުމެއް ލިބޭނީ އެމީހަކަށް އުފާވެރިކަމާއި ހިތްހަމަޖެހުން މެދުވެރި ކުރުވާ ސަބަބުތައް އެ މީހަކު ދިރިއުޅޭ މާހައުލެއްގައި ހުރެގެންނެވެ. ދިވެހިންގެ ތެރެއިން އެއްބަޔަކު ޤަބޫލު ކުރާ ގޮތުގައި އުފާވެރި ދިރިއުޅުމެއް ލިބޭނީ މަލޭގައެވެ. އަދި އަނެއްބަޔަކު ޤަބޫލު ކުރާގޮތުގައި ރަނގަޅު އުފާވެރި ދިރިއުޅުމެއް ލިބޭނީ ރަށްފުށުގައި ދިރިއުޅެގެންނެވެ. އެހެންކަމުން އުފާވެރި ދިރިއުޅުމެއް ލިބޭނީ މާލޭގައި ދިރިއުޅެގެންތޯ ނުވަތަ ރަށްފުށުގައި ދިރިއުޅެގެންތޯ ބަލާލުމަކީ ވަރަށް ބޭނުންތެރިކަމެކެވެ.

އުފާވެރި ދިރިއުޅުމަކަށް މާލެ ކަމުދަނީ، މާލޭގައި ފެންވަރު ރަނގަޅު ޞިއްޙީ ވަސީލަތްތަކެއް ލިބެންހުރުމުންނެވެ. ރަނގަޅު ތަޢުލީމީ ނިޒާމެއް އޮތީމައެވެ. ވަޒީފާތައް ގިނަވީމައެވެ. އެގޮތުން ރަނގަޅު ޑޮކޮޓަރުންނާއި އަދި ތަފާތު އެތަކެއް ބަލިތަކަށް ފަރުވާ ކުރެވޭ އެތަކެއް ވަސީލަތްތަކެއް ހުރީ މާލޭގައެވެ. ބޮޑެތި ކޮލެޖުތަކާ ޔުނިވާސިޓީ ހުރީ މާލޭގައެވެ. ސަރުކާރުގެ ހުރިހާ އޮފީހަކާއި އަމިއްލަ އެތައް ކުންފުނިތަކެއްގެ އޮފީސްތައް ހުރީ މާލޭގައެވެ. މާލޭގައި ލިބޭ ކޮންމެ ހިދުމަތަކީ ފެންވަރު ރަނގަޅު ހިދުމަތްތަކެކެވެ. ރަށްފުށުގެ ސުކޫލަކާއި މާލޭގެ ސުކޫލެއްގައި އުޅޭ މުދައްރިސުން އަޅާނުކީދާނެއެވެ. ރަށްފުށުގެ ސިއްހީ މަރުކަޒުތަކާއި މާލޭގެ ހޮސްޕިޓާތައް އަޅާ ނުކިޔޭނެއެވެ. ވަޒީފާގެ ފުރުސަތުތައް ވެސް ހަމަ މިފަދައެވެ. ހިދުމަތްތަކުގައި މޮޅު ގޮތާއި އެންމެ ފެންވަރު ރަނގަޅު ގޮތް ލިބުން އޮތީ މާލޭގައެވެ. މިފަދަ އެތަކެއް ފެންވަރު ރަނގަޅު އަސާސީ ހިދުމަތްތަކެއް މާލެއިން ލިބޭކަމީ މާލޭގައި ދިރިއުޅުމުން އުފާވެރިކަން ލިބޭ ކަމެއްކަމަށް އެއްބަޔަކު ބުނެއެވެ.

 އުފާވެރި ދިރިއުޅުމަކަށް ރަށްފުށުގެ ދިރިއުޅުން ކަމުދަނީ، ރަށްފުށުގައި ވައި ސާފު ޖައްވާއި ނަލަ ރީތި މޫދާއި ހުދުސާފު ގޮނޑުދޮށްތައް ވާތީއެވެ. އެގޮތުން އަތިރިމަތިންނާއި ރަށުގެ އެކި ހިސާބުން  ލިބޭ ތާޒާ ވައިން ހިތްތަކަށް ފިނިކަން ލިބެއެވެ.އެހެނީ ހިތް ހަމަޖެހިގެން ނޫނީ އުފާވެރި ދިރިއުޅުމެއް ނުލިބޭނެތީއެވެ. އުފާވެރި ދިރިއުޅުމަކަށް ރަށްފުށް ރަނގަޅުވާ އަނެއް ސަބަބަކީ ތޮއްނުޖެހި ރަށްފުށުގައި އުޅެވޭތީއެވެ. އަދި ތޮއްނުޖެހި އުޅެވޭނަމަ ލިބޭ ހިތްހަމަޖެހުމާއި އުފާވެރިކަން މާ ބޮޑުވާނެއެވެ. އަދި ހަމަ އެހެންމެ ކޮޓަރިއެއް ނުވަތަ ގެއެއް ކުއްޔަށް ހިފިޔަސް ދައްކަންޖެހޭ ކުލި ވަރަށް ކުޑަވާނެއެވެ. ކަންމިހެން އޮތުމާއި އެކު ރަށް ފުށުގައި ދިރިއުޅެން ފަސޭހަވެއެވެ.

އާދޭހެވެ! އުފާވެރިކަމަކީ އެންމެނަށް އެއް ރަހައެއް ލާ އެއްޗެއް ނޫނެވެ. ކޮންމެ ބަޔަކުވެސް އުފާވާ ވަކި ހާއްސަ ކަންކަމެއް ހުންނާނެއެވެ. އެހެންކަމުން އެމީހަކަށް އުފާވެރިކަމެއް ބުނެ ކިޔާނީ އެމީހަކެވެ. ހިތްހަމަޖެހޭ އުފާވެރި ދިރިއުޅުމެއް އިހްތިޔާރު ކުރާނީވެސް އެމީހަކު އަމިއްލަ އަށެވެ. ނަމަވެސް ހަނދާން ކުރާށެވެ! އުފާވެރިކަމާއި ހިތްހަމަ ޖެހުމުގައި އެއްވެސް މަޖުބޫރުކަމެއް އޮވެގެން ނުވާނެއެވެ. އާދޭހެވެ! އުފާވެރި ދިރިއުޅުމެއް ލިބޭނީ މާލެއިން ހެއްޔެވެ؟ ނުވަތަ ރަށްފުށުން ހެއްޔެވެ؟