ކަންކަމުގައި ހެޔޮގޮތް އަބަދުވެސް އިންސާނާއެދެއެވެ. ފާގަތި ހަޔާތެއް ބޭނުންވެއެވެ. އުފާވެރިކަމާއި ބާއްޖަވެރިކަމާއި އެކު، އަބުރުވެރި އާއިލާއެއް ބިނާކުރަން އިންސާނާ އެދެއެވެ. އަމިއްލަ ނަފްސާއި މައިންބަފައިންނާއި އަނބިދަރިންނާއި، ދަރީންގެ ދަރީނަށް އުފާވެރި ހަޔާތެއް ހޯދައިދޭން ކޮންމެ މީހަކުވެސް ބޭނުންވާނެއެވެ. މި އުންމީދާ އަމާޒުގައި އިންސާނާ ކުރާހާވެސް ކަމަކީ ކޮންމެވެސް މަސައްކަތެއް ކުރުމެވެ. އެއްބަޔަކު އަމިއްލަ މަސައްކަތް ކުރަމުންދާއިރު އަނެއްބަޔަކު ކުރަމުންދަނީ ކޮންމެވެސް މީހެއްގެ މަސައްކަތަކެވެ. އަދި އަނެއްބަޔަކު ދައުލަތުގެ ނުވަތަ ސިވިލް ސާވިސް މަގާމުތަކުގައި ވަޒީފާ އަދާކުރެއެވެ. އެންމެންނަށް ލިބެނީ ފައިސާއެވެ. އިސްވެ ދެންނެވުނު ތަސައްލީން ފުރިގެންވާ އަރާމު ދިރިއުޅުމަށް، އަދި އެ ދިރިއުޅުމުގެ ފެންވަރު ރަނގަޅުކުރުމަށް އޮތް ހަމަ އެކަނި ވަސީލަތަކަށް މި ވަނީ ފައިސާއެވެ.

ކުރާ މަސައްކަތަށް ދެވޭ އުޖޫރަ ބޮޑުވުމަކީ ދިރިއުޅުން ފަހިވެ ތަނަވަސްވެ، ދިރިއުޅުމުގެ ފެންވަރު ކުރިއަރާ ދާނޭ ކަމެއް ހެއްޔެވެ؟ މިއީ ބޮޑު ސުވާލެކެވެ. މިއީ އެ ސުވާލެއްގެ ދަށުން، އެތައް ހިޔާލެއް އުފެދި އެތައް ވާހަކަތަކަކާއި ބަހުސްތަކެއް ކުރެވޭނޭ ސުވާލެކެވެ. އާދޭހެވެ! މިފަދައިން ރާއްޖޭގައި ހިނގައި ދިޔަ އެއް ކަމަކީ މިނިމަމް ވޭޖް ތަންފީޒުވުމެވެ. އެއާއި އެކު ގިނަ ބައެއްގެ މުސާރަތަކަށް ބޮޑެތި ބަދަލުތަކެއް އައެވެ. މީސްމީޑިޔާގައި މިފަދަ އެތައް ބަދަލެއްގެ ތަފްސީލު އެކި މީސްމީހުން ހިއްސާކުރަމުންދިޔައެވެ. އަދި މި ތަންފީޒުކުރެވުނު މިނިމަމްވޭޖާއި އެކު ގިނަ ބައެއްގެ ތައުރީފުވެސް ވަނީ ލިބިފައެވެ. އެއާއި އެކު 2022ވަނަ އަހަރުގެ ރިޔާސީ ބަޔާނުން އިވުނީ އަދި މުޅިން ތަފާތު ވާހަކައެއްގެ އަޑެވެ. ގިނަ ދުވަސްތަކެއް ވަންދެން، ކުރާ މަސައްކަތާއި ނުބައްދަލު މުސާރައެއް ގެއަށްގެންދާ، މުދައްރިސުންގެ މުސާރަ ބޮޑުކުރާނޭ ކަމުގެ އުފާވެރިވާހަކައެވެ. މިއީވެސް އެތައް ހާސް ބައެއްގެ މުސާރަ ބޮޑުވެގެންދާނޭ ކަމެކެވެ. މުސާރައެއް ބޮޑުވުމަކީ ދިރިއުޅުމުގެ ފެނަވަރު ތަނަވަސްވެ ރަނގަޅުވާނޭ ކަމެއް ކަމަށް އެންމެންވެސް ގަބޫލު ކުރެއެވެ. ނަމަވެސް، މިފަދަައިން މުސާރަ ބޮޑުކުރުމުން، ދިރިއުޅުމުގެ ފެންވަރަށް މާބޮޑު ބަދަލެއް އައިސްދާނެ ހެއްޔެވެ؟ މިއީ ޒަމާނާއި ހާލަތުގެ ގޮތުން، ދުނިޔެ ހިނގާގޮތުން ކުރަންޖެހޭ ސުވާލެކެވެ.

މުޖުތަމައުގެ އެއްވެސް ބައެއްގެ އަތްމަތި ތަނަވަސްވުމީ މުޖުތަމައުގައި ދައުރުވާ ފައިސާގެ މިންވަރު އިތުރުވާނޭ ކަމެކެވެ. އެއާއި އެކު މުޖުތަމައުގައި ލިބެން ހުންނަ ހިދުމަތްތަކާއި ގަނެވިއްކާ ވިޔަފާރި މުދަލުގެ އަގުތައް އުފުލިގެން ދިއުމަކީ ވަރަށްވެސް ގާތް ކަމެކެވެ. ތައުލީމީ ދާއިރާގައި އެތައް އަހަރުތަކެއް ހޭދަކޮށްފައިވާ މުދައްރިސަކު ބުނާތީ އަޑުއެހީމެވެ. "މުސާރައަށް 2500 ލިބުނުއިރު، ހަރަދުކޮށްފައި ކޮންމެ މަހަކު ބާކީ ކޮށްލަން 2000 އޮވެއެވެ. މިހާރު 12000 ލިބުނީތީވެސް ބާކީ ކުރެވެނީ ހަމަ އެހާކަންހާވަރެވެ." މިއީ ގައުމުގެ މުޅި އިގްތިޞާދަށް އައިސްފައިވާ ބަދަލަކުން ވާ ކަމެކެވެ. އިންސާނާގެ ދިރިއުޅުމުގެ ހަރަދުތައް ބޮޑީއެވެ. މި ހިސާބުން އުފެދޭ އަނެއް ސުވާލަކީ، ބޮޑު މުސާރައެއް ލިބުމާއި އެކު ދިރިއުޅުމުގެ ހަރަދުތައް އަމިއްލައަށް ބޮޑު ކުރަނީ ހެއްޔެވެ؟ ނުވަތަ ހިދުމަތްތަކާއި ތަކެތީގެ އަގު ބޮޑުވުމާއި އެކު، ދިރިއުޅުމުގެ ހަރަދު ބޮޑުވަނީ ހެއްޔެވެ؟

އާދޭހެވެ! އިންސާނުންގެ ހިޔާލަކީ ތަފާތު އެއްޗެކެވެ. އަދި ތަފާތުވާންވެސް ޖެހޭނޭ އެއްޗެކެވެ. އެކި އެކި ނަންނަމުގައްޔާއި އެކިއެކި ގޮތްގޮތަށް އިންސާނާ ކުރާ މަސައްކަތުގެ އުޖޫރަ ބޮޑުވުމާއި އެކު، ނުވަތަ ބޮޑުވާނޭ ކަމުގެ އުންމީދާއި އެކު އެއްބަޔަކު އުފާކުރެއެވެ. ނަމަވެސް އަނެއްބަޔަކަށް މާބޮޑު އަސަރެއް އެކަމުން ނުކުރެއެވެ. ވެފައި ދެން މިވާހާވެސް ގޮތަކީ އިންސާނާގެ ހިޔާލާއި ގަބޫލުކުރާ ގަބޫލުކުރުމުގައި އުޅޭ ތަފާތެވެ. މި ތަފާތުތައް އުފެދި ވިސްނުމުގައި ހަރުލަނީ ދުނިޔޭގައި ކަންހިނގާގޮތުން މަންޒަރުތަކާއި ހަގީގަތްތައް ފެންނާތީއެވެ.

ކޮންމެއަކަސް މަސައްކަތުގެ އުޖޫރަ ބޮޑުވުމާއި އެކު ހެޔޮބަދަލުތަކެއް އަންނާނެއެވެ. އެއާއި އެކު ނޭދެވޭ ބަދަލުތަކެއްވެސް އަންނާނެއެވެ. މުސާރަ ބޮޑުވުމާއި އެކު ދިރިއުޅުމުގެ ފެންވަރަށް އިހުނަށްވުރެ މާ މޮޅު ގޮތެއް ވެދާނޭތޯ އެއީ އުފެދޭ ސުވާލެކެވެ. ސަބަބުތަކެއް ނެތިއެއް ނޫނެވެ. އެހެންކަމުން މި ސުވާލުގެ ޖަވާބުގައި އެމީހަކު ގަބޫލުކުރިގޮތެއް އެމީހަކަށް ހެޔޮވާނެއެވެ. އެއާއި އެކު މި މައުޟޫގައި ގަބޫލުކުރާނޭ ވަކިގޮތެއް އިހްތިޔާރުކުރަން ކިޔުންތެރިންނަށް ދޫކޮށްލާނަމެވެ!