އިންސާނުންގެ ތެރޭގައިވެސް ޝައިޠާނުން އުޅެއެވެ. ކީރިތި ޤުރުއާނުން އަހަރެމެންނަަށް މިކަން ވަރަށް ސާފުކޮށް ދޭހަވާން އެބަ އޮތެވެ. ބޮޑެތި ފާފަތަކުން މުޑުދާރުކަން ލިބިގަނެ އިންސާނުންގެ ލޯމައްޗަށް އޮޅުވާލައިގެން އުޅޭ މަކަރުވެރި ޖައްބާރުންވެސް އިންސާނުންގެ ތެރޭގައި އުޅެއެވެ. ޝިރުކު ކުރާ ސިހުރުވެރިންނަކީ މިފަދަ ބައެކެވެ. މިއީ އަވަށްޓެރި ޕާކިސްތާނުގައި ހިނގާދިޔަ ހަގީގީ ހާދިސާއެކެވެ. ސިހުރުވެރިއެއްގެ ކެހިވެރި މަޅީގައި ކުޑަ ކުއްޖަކު ޖެހި، އެކުއްޖާގެ ހަޔާތް ބަރުބާދުވި ގޮތުގެ ވާހަކައެވެ.

އެއީ އުމުރުން 8 އަހަރުގެ ކުއްޖެކެވެ. ކިޔެވުމަށްވެސް މޮޅު ކުއްޖެކެވެ. އަމުދުން ޙާފިޒަކަށް ވުމުގެ މަތިވެރި މަޤްޞަދުގައި ޤުރުއާނުން 14 "ފޮތް" އެކުއްޖާ ހިތުދަހެވެ. ކޮންމެ ދުވަހަކު ފަތިސްނަމާދުކޮށްގެން އެ ކުއްޖާގެ ބައްޕައާއިއެކު އެ ކުއްޖާ ޤުރުއާން ހިތުދަސްކުރާ ކުލާހަށް ދިއުމަށް ބާޒާރުމަތި ހުރަސްކުރެއެވެ. އެއިން ކޮންމެ ދުވަހަކީ އެކުއްޖާގެ ބައްޕަ ކޮންމެވެސް ތާޒާ މޭވާއެއް އެކުއްޖާއަށް ގަނެދޭ ދުވަހެކެވެ.

އެއީ ވެސް އާދައިގެ މަތިން އެފަދަ ދުވަހެކެވެ. ނަމަވެސް އެ ދުވަހު، ކަޅު ވިލާގަނޑެއްގެ ހިޔަނި އެޅިދާނޭ ކަމުގެ ކުޑަވެސް އިޝާރާތެއް އެ ދެ ބަފައިންނަކަށް އިހުސާސެއް ނުކުރެވުނެވެ. އެދުވަހަކީ އެކުއްޖާ އަނބެއް ކޭ ދުވަހެކެވެ. ދޮންވެފައިވާ އެ އަނބު އެކުއްޖާ ކެއީ އަނގައިން ލޮންނަމުންނެވެ. މީރުކޮށް ކާލެވުނު އެ އަނބުގެ ފޮނިކަމުން އެ ކުއްޖާ ހުރީ ހިތްހަމަ ޖެހިފައެވެ. ނަމަވެސް އެ ފޮނިކަން ހިތިކަމަކަށް ބަދަލުވީ އެ ކުއްޖާ އެ އަނބުގެ އޮށް މަގުމަށްޗަށް އެއްލާލި ހިސާބުންނެވެ. އެ ދެ ބަފައިންގެ ފަހަތުން އައި ކެހިވެރި ސިހިރުވެރިއަކު، އެ އަނބުގެ އޮށް ނެގިއެވެ. އަދި އޭގައި ހޭކިފައި ހުރި އެ ކުއްޖާގެ ކުޅު ބޭނުން ކޮށްގެން ބޮޑު ޝިރުކެއް ކުރީއެވެ.

އެ ކުއްޖާ އެއްލާލި އޮަށްް، އެ މީހަކު ނަގާ މަންޒަރު ފެންނަ ސީސީޓީ ވީޑިއޯއެއްވެސް ވަނީ އާންމު ވެފައެވެ. ނަމަވެސް އެކަމަކާ އޭރު އެމީހުން މާބޮޑު ސަމާލުކަމެއް ނުދިނެވެ. އެ ހާދިސާއަށް ފަހު އެ ކުއްޖާގެ ކިޔެވުން ގޯސް ވިއެވެ. ހިތުދަސްކުރުމުގެ ބާރު ކުއްލިއަކަށް ކެނޑުނެވެ. ޝައުގާ ލޯބި ކުއްލިއަކަށް ނެތި ދިޔައެވެ. ހިތުން ދަސްވެފައި ހުރި ބައިތައްވެސް ހަނދާން ނެތެމުން ދިޔައެވެ. މިކަމުގެ ސަބަބުން އެކުއްޖާގެ ބައްޕަ، އެ ކުއްޖާއަށް ރުގްޔާ ކުރިއެވެ. އަދި ސިހުރެއް ޖެހިފައި ހުރިކަން އެނގުނެވެ. ރުގްޔާގެ އެހީގައި އެ ސިހުރުން އެ ކުއްޖާ ރަނގަޅު ކުރެވުނެވެ. ނަމަވެސް އޭގެ ފަހުންވެސް އިހު ހުރި ޝައުގުވެރިކަމާ ލޯބި އެކަމަކަށް ނެތެވެ.

މިއީ އެއްލާލި އަނބު އޮށެއް ބޭނުންކޮށްގެން، ސިހުރިވެރިއަކު، ކުޑަކުއްޖެއްގެ ހަޔާތް ބަރުބާދުކޮށްލި ހާދިސާއެކެވެ. މިފަދަ ބިރުވެރި ކިތަންމެ ހާދިސާއެއް މި ރާއްޖޭގައިވެސް ހިނގާފައި އެބަހުއްޓެވެ. ސިހުރުވެރިންގެ މުޑުދާރު، އަމަލުތަކުން، ސިހުރުގެ އުނދަގޫ ފޯރާފައިވާ އެތައް ބަޔަކު މި ރާއްޖޭގައިވެސް އުޅެއެވެ. މާތް ﷲ، އަޅަމެންނީ ސިހުރިވެރިންގެ ނުބައި ކަމުންނާއި އެބައިމީހުންގެ ސިހުރުތަކުން ރައްކާތެރި ކުރައްވާފައިވާ ބަޔަކު ކަމުގައި ލައްވާށިއެވެ. އާމީން!