އިންސާނާ ޢިލްމު ހޯދާ، އެ ޢިލްމުން ޒީނަތްތެރިވަނީ ދުނިޔެއާއި އާހިރަތުގެ ހަޔާތް ބާއްޖަވެރި ކުރާށެވެ. ދުނިޔޭގައި އެހެން އިންސާނުންނާއި ގުޅިގެން އުޅޭށެވެ. ފަސޭހަކަމާއި އެކު އެހެން މީހުންގެ މަލާމާތާއި ފާޑުކިޔުމުން އެއްކިބާވެ އުޅޭށެވެ. ރިވެތި އަހުލާގުގެ ޖަވާހިރުތަކުން ހަޔާތުގެ ވޮށް ދިއްލާށެވެ. މި އަހުލާގާ އިޖްތިމާއީ ގުޅުން އަހަރެމެންގެ އުޅުމުން ނެތި ގޮސްފިނަމަ ނުވަތަ ނެތްނަމަ އަހަރެމެންނީ މި ދުނިޔޭގައި ބޭކާރު ބައެކެވެ. ކިތަންމެ ގިނަ އަދި ކިތަންމެ ފެންވަރު ރަނގަޅު ޢިލްމެއް ލިބިފައި ހުރި ނަމަވެސް އޭނާގެ ކިބައިގައި ހިލްމުގެ ރަން ތާޖު ނެތްނަމަ އޭނަަގެ މިސާލަކީ މޭވާ ނާޅާ ގަހެއްގެ މިސާލެވެ.

ެިޢިލްމާއި ހިލްމުގެ ވާހަކަ ދެކެވޭއިރު، ރާއްޖޭގެ ބޮޑު ހޮސްޕިޓަލެއްގައި ހިނގި ހާދިސާއެއް ހިއްސާކޮށްލާނަމެވެ. އެއީ އޮޕަރޭޝަން ތިއޭޓަރުގެ ދޮރުމައްޗެވެ. އެތަނުގެ ދޮރުމަތީ ދެތިން އާއިލާއަކުން މަޑުކޮށްލައިގެން އިނެވެ. އޭގެ އިރުކޮޅެއްފަހުން އެހެން ބަލި މީހަކު އޮަޕަރޭޝަން ތިއޭޓަރަށް ވެއްދިއެވެ. އެއާއި އެކު އޭނާގެ އާއިލާގެ ބައެއް މީހުންވެސް ތިއޭޓަރު ދޮރުމަތީ މަޑުކޮށްލައިގެން ތިއްބެވެ. ދުރުގައި މި މަންޒަރު ބަލަން ހުރުމުން ފެނިގެން ދަނީ ޢިލްމާއި ހިލްމާއި، އަދި އަހުލާގުގައި އިންސާނުން ތަފާތުވެދާ މިންވަރެވެ.

ފަހުން ތިއޭޓަރު ކައިރިއަށް އައި އާއިލާގެ ދެ މެންބަރުން މަޑުކޮށްލައިގެން ތިއްބެވެ. އޭގެ ކުރިންވެސް ތިއޭޓަރު ދޮށުގައި ހަތަރު މީހަކު، ދެ އާއިލާއަކުން ދެ މީހުން ތިއްބެވެ. އެމީހުން ވާހަކަވެސް ދައްކައެވެ. ނަމަވެސް އެ ސަރަހައްދުގައި އޮތީ ހިމޭންކަމެވެ. މަޑުމަޑުން ތިބޭ ބަސްއަކާ ކުދިންތަކެއްގެ މަންޒަރެވެ. އާދޭހެެވެ! ތިއޭޓަރު ދޮށަށް ފަހުން އައި ދެ މީހުން އައުމާއި އެކު އެ ސަރަހައްދުގެ ހިމޭންކަން ގެއްލުނެވެ. މި ދެމީހުންގެ އަޑުގަދަ ވާން ފެށިއެވެ. އެކަކު އަނެކަކަށް ބާރު ބާރަށް ހީ ހަދައެވެ. ކައިރިން އަޅާ ދާ މީހުންނަށް ވަށްބަހުން ބަސް ބުނުމާ ފޮށުން އިންތިހާއަށް ދިޔައެވެ. ބަސްކިޔުމުގައި ޖުމުލަ ފުރިހަމަ ކުރުމުގައި ބޭއަދަބީ ބަސްތަކާއި ހުތުރު ބަސްތައް ގިނައިން ބޭނުން ކުރެވެމުން ދިޔައެވެ.

މި މަންޒަރުން ސިފަވަނީ، ކުރިން ތިއޭޓަރު ދޮށުގައި ތިބި މީހުން ލަދުން އުޅޭ މަންޒަރެވެ. ޖެހިލުންވެފައި ތިބޭ މަންޒަރެވެ. ބައެއްގެ ބޭއަދަބީ އުޅުމާއި ގުޅުމެއް ނެތް އަހުލާގުގެ ސަބަބުންނެވެ. އެމީހުންނަށް ހީވާކަހަލައެވެ. "އުޑުދަށުގައި އުޅެނީ ހަމައެކަނި ތިމާމެން އެކަންޏެވެ". މި ދެމީހުންގެ އުޅުން ހުރިގޮތުން ކިތަންމެ ބަޔަކު އެކަމަށް ފާޑުކިޔާތީ ދެކެމެވެ. "ހޮސްޕިޓަލެއް ވިއްޔާއޭ! އުޅޭ ގޮތެވެ!"

އާދޭހެވެ! ފަހަރުގައި އެއީ އެދެމީހުންގެ އާންމު އުޅުން ކަމުގައި ވެދާނެއެވެ. ނުވަތަ ހަމައެކަނި އެވަގުތު އެމީހުން އުޅުނު ގޮތް ކަންނޭނގެއެވެ. ކޮންމެއަކަސް އެއީ އުޅެން ވާނޭ ގޮތެއް ނޫނެވެ. އަދި ހާއްސަކޮށް އެއީ އާންމު އިޖްތިމާއީ ސަރަހައްދަކަށް ވާތީއެވެ. ހޮސްޕުޓަލަކަށް ވާތީއެވެ. އެދެމީހުންގެ އާއިލާ މީހަކު އޮޕަރޭޝަނެއްކުރަން ވައްދާފައި ވާތީއެވެ. ނަމަވެސް ކުރާނެ ކަމެއް އޮބެއްތޯއެވެ. އެމީހުންގެ ކިބައިގައި ރިވެތި އަހުލާގުގެ ކަންފުޅެއްވެސް ނެތީއެވެ. އަދަބު އަހުލާގެއް ނެތީއެވެ. ޢިލްމެއް ހިލްމެއް އަމުދުން ނުވެސް ނެތީއެވެ. އަނެކުންނަށް އިހްތިރާމު ކުރުމާއި އަނެކުންގެ އިހުސާސްތައް ދެނެގަތުން ކުޑައިކޮށްވެސް ހިތުގައި ނެތީއެވެ.

ގައުމުގެ ޒުވާނުންނެވެ. މާދާމާގެ ޖީލުތައް ތަރުބިއްޔަތު ކުރުމުގެ ހުންގާނުގައި މިއަދު ހިފައިގެން ތިބި ބައްޕައިންނާއި މަންމައިންނެވެ. އުޅެން ދަސްކުރާށެވެ. އެކަނި އުޅެން ދަސްކުރާށެވެ. ގިނަ ބަޔަކާއި އެކު އުޅެން ދަސްކުރާށެވެ. ދެނެގަންނާށެވެ. ހާލަތާއި ވަގުތު އެނގޭށެވެ. އަނެކާގެ އިހުސާސްތައް ދެނެގަންނާށެވެ. ވާންވީ ގޮތާއި ވާނުވާ އެނގޭށެވެ. ޢިލްމުހޯދަނީ މިހެންވެއެވެ. އެންމެނާއި އެކު ގުޅިގެން އުޅެންވެގެންނެވެ.