ދުނިޔެއަށް އިންސާނަކު އުފަންވަނީ އޭނާގެ ކިބައިގައި ވަކި އަހުލާގެއް ލިބި ހުރެގެނެއް ނޫނެވެ. ނަމަވެސް އެ އިންސާނަކު ދުނިޔެއަށް އުފަންވުމަށްފަހު، އޭނާގެ މައިންބަފައިންނާއި ބެލެނިވެރިންނާއި މުދައްރިސުންނާއި އަދި އެ ކުއްޖަކު އުޅޭ މާހައުލެއްގެ ސަބަބުން އެ ކުއްޖާގެ ކިބައިގައި ވަކި އަހުލާގެއް އަށަގަންނަގޮތް ވެއެވެ. މިއީ ދުނިޔޭގެ އާދައެވެ. ކަން ހިނގާ ހަމައެވެ. އާދޭހެވެ! ދަންނަވަން މިއުޅޭ ވާހަކައަކީ ކުއްޖާގެ ތަރުބަވީ އަދި ތަޢުލީމީ ހަޔާތުގައި ަމައިންބަފައިންގެ ދައުރު ބޮޑުކަމުގެ ވާހަކައެވެ. ކުއްޖާ ސުކޫލަށް ފޮނުވުމަކުން ނުފުދޭނޭ ވާހަކައެވެ. ޤުރުއާން ކުލާހަކަށް ފޮނުވުމަކުން ނުނިމޭނޭ ވާހަކައެވެ.

ޢިލްމު ލިބިގަތުމާއި އުޅުމާއި ގުޅުން ދަސްކޮށް ރިވެތި އަހުލާގުން ޖަރީކުރުމުގެ ނިޔަތުގައި ކޮންމެ މަޔަކުވެސް އޭނާގެ ދަރިން މަދަރުސާއަށް ފޮނުވައެވެ. އަދުގެ މި "ކާރޫބާރޫ" ބޮޑު ޒަމާނުގައި ކުއްޖާ މަދަރުސާއަކަށް ވައްދާ ހިސާބުން އެ ކުއްޖާގެ ބެލެނިވެރިން އެ ކުއްޖާގެ ތަރުބަވީ އަދި ތައުލީމީ މަދަރުސާއިން މުޅިންހެން ވަކިވެއެވެ. އެކުއްޖާ ދަސްކޮށް އެނގެންޖެހޭ ހުރިހާ އެއްޗަކީ މަދަރުސާއިން އެކުއްޖާ ދަސްކޮށް އެނގޭ އެއްޗެއް ކަމުގައި ގަބޫލު ކުރެއެވެ. އުނގަންނައިދިނުމުގެ ގޮވަތިން މައިންބަފައިން ނުކުމެއެވެ. މިއީ ހަގީގަތުގައި ވަރަށްވެސް ގޯސް އަދި ވިޔާނުދާ ކަމެކެވެ. މިއީ ތަރުބަވީ ޒިންމާއިން "ރެކިގަތުމަށް" އަދުގެ ގިނަ ބެލެނިވެރިންނަށް ކުރެވޭ ކަމެކެވެ.

އާދޭހެވެ! ކުއްޖާ އެންމެ ބޮޑަށް އެނގޭނީ އެކުއްޖާގެ ބެލެނިވެރިންނަށެވެ. އެކުއްޖާ ހިނގަންވީ މަގުވެސް އެންމެ ރަނގަޅަށް އެނގޭނީ އެކުއްޖާގެ ބެލެނިވެރިންނަށެވެ. އެކުއްޖާ ދާނޭ މަގަކުން ދާނޭ ގޮތަކަށް ދާން، ހަގީގަތުގައި އެއްވެސް ބެލެނިވެރިއަކު ނުރުހޭނެއެވެ. ނަމަވެސް އަދުގެ ހަގީގަތަކީ އެއީއެވެ. ސުކޫލު މަދަރުސާގައި އެކުއްޖާއަށް އެނގޭ އެއްޗަކާއި އެކުއްޖާ ދަސްކުރި އަހުލާގަކުން އެކުއްޖާ ބޮޑުވާން ގިނަ ބެލެނިވެރިން އެކުއްޖާ ދޫކޮށްލައެވެ. ސަބަބަކަށް ވަނީ ސުކޫލު މަދަރުސާތަކަށް ބެލެނިވެރިން ކުރާ އިތުބާރު ކަމުގައި ވެދާނެއެވެ. އާދޭހެވެ! އެތަންތަނަށް އެމީހުންގެ ދަރިން ހަވާލުކުރާ ނުވަތަ ފޮނުވާ ކޮންމެ ތަނަކަށް މައިންބަފައިން ނުވަތަ ބެލެނިވެރިން އިތުބާރު ކުރަންވާނެއެވެ. ނަމަވެސް އޭގެ މާނައަކީ އެ ކުދިން މުޅިންހެން އެތަންތަނުގެ އަތްމައްޗަށް ދޫކޮށްލުމެއް ނޫނެވެ. އެއީ ތިބާގެ ދަރިއެކެވެ. އެ ދަރި ސުކޫލަށް ދިޔަސް، އެ ދަރިފުޅަށް ހެވާއި ނުބައި، ރަނގަޅާއި ގޯސް އަދި ރީއްޗާއި ހުތުރު، މައިންބަފައިންވެސް ބުނެދޭންވާނެއެވެ. ދަސްކޮށްދޭން ވާނެއެވެ. އުގަންނައިދީ ތަރުބިއްޔަތު ކުރަންވާނެއެވެ.

ކޮންމެ ކުއްޖަކަށްވެސް ލިބެންވާ ތަޢުލީމަކާއި ތަރުބިއްޔަތަކީ ހަމަ އެކަނި އެ ކުއްޖަކު ކިޔަވާ މަދަރުސާއެއްގައި ގައިދުވެފައިވާ އެއްޗަކަށް ވެގެންނުވާނެއެވެ. މިކަންކަމުގައި ކުއްޖާގެ މައިންބަފައިންނާ ބެލެނިވެރިންގެ ދައުރަކީ ވަރަށްވެސް ބޮޑު އަދި އެހާމެ މުހިންމު ދައުރެކެވެ. ބެލެނިވެރިން އެކުދިންނާއި އެކު ވަގުތު ހޭދަކުރުމާ، އެކުދިންނާއި އެކު ފިލާވަޅުތައް ހެދުމާއި އަދި އެނޫންވެސް އިޖްތިމާއީ ކަންކަމުގައި ބައިވެރިވާން ވާނެއެވެ. ތަރުބަވީ ހަޔާތާއި ތަޢުލީމީ މަދަރުސާއިން ދުވަހަކުވެސް ބެލެނިވެރިންނަކަށް ނުނިކުމެވޭނެއެވެ. ނުކުމެ "ރެކޭނަމަ" އެއީ ދަރިންނަށް ވެވޭ ބޮޑު ހިޔާނާތެކެވެ.