ދުނިޔޭގައި އަބަދުވެސް ތަފާތު އެކި ހާދިސާތައް ހިނގައެވެ. އެކަންކަމުން އިބުރަތް ލިބިގަނެ ފިލާވަޅު ދަސްކުރަންޖެހޭ ކިތަންމެ ހާދިސާއެކެވެ. މިފަދަ ހާދިސާތަކުން، ތިލަވެ އާންމުވަނީ ބައެއް ހާދިސާތަކެވެ. އެގޮތުން މިއީވެސް އެފަދަ ހާދިސާއެކެވެ. މައިދައިތައާއި މެދު އުފެދުނު ހަސަދަވެރިކަމެއްގެ ސަބަބުން ލިބުނު ހިތި ނިމުމެއްގެ ވާހަކައެވެ.

ލޯބީގެ ގޮތުން ގުޅި ދެ ޒުވާނުން ކައިވެނީގެ ހަޔާތެއް ފެށީ ވަރަށްފޮނި އުންމީދު ތަކަކާއި އެކީގައެވެ. ޒަވާޖީ ހަޔާތެއް ފަށާ ދެމީހުންގެ ދިރިއުޅުން ބަދަލުކުރީ ފިރިމީހާގެ ގެއަށެވެ. ނުލާހިކު ލޯބިން އުޅުނު އުޅުނު މި ދެމަފިރިންގެ ހަޔާތުގައި ކުނޑި ޖެހެންފެށީ ކޮންއިރަކު ކަމެއް ދެނަހުރި މީހަކު ނެތެވެ. އެ ގޭގައި އުޅެނީ މި ދެމަފިރިންނާއި ފިރިމީހާގެ މަންމައެވެ. ފިރިމީހާގެ މަންމައަކީ އަތުގާ ފައިސާހުރި، މުދާވެރި މަންމައެކެވެ. އެ ގެއަކީވެސް އެ މަންމަގެ ފައިސާއިން ގަނެފައިވާ ގެއެކެވެ. މަންމަގެ އެ ތަނަވަސްކަމާއި ދަރިފުޅުގެ ތަނަވަސްކަން ނުބައްދަލެވެ. ކަންތައް ގޯސްވާން ފެށީ މިކަންކަން ފެނި ހާމަ ވާން ފެށުނު ހިސާބުންނޭ ބުނެވިދާނެއެވެ.

ފިރިމީހާގެ ހިތުގައި އޭނާގެ މަންމަ އަށް އޮތް ލޮތްބަކީ ބަދަލުވުމެއް ނެތް ވަރުގަދަ ލޮތްބެކެވެ. އެހެންކަމުން ފިރިމީހާގެ ތަނަވަސަކަން ޖާގަދިން މިންވަރަކުން އެ މުއްސަނދި މަންމައަށް ހަދިޔާ ގަނެދީ ހަދައެވެ. ގޭގެ ހަރަދުތަކުގައި މަންމައާއި އެކީ ޝާމިލްވެއެވެ. އެނޫނަސް މަންމައަށްޓަކައި އެތައް ހަރަދެއް ކުރެއެވެ. އެ ޒުވާނާގެ އަނބިމީހާގެ ހިތުގައި ހަސަދަވެރިކަން އުފެދުނީ އެހިސާބުން ފެށިގެންނެވެ. މުއްސަނދި މަންމައަކަށް ހަރަދުކުރާތީއެވެ. އެކަމުގެ ސަބަބުން އޭނާއަށް ހަރަދު ކުރާނޭ ފައިސާ ފިރިމީހާ އަތުގައި ނުހުރެދާނޭ ކަމަށް ހިތާއެވެ.

ދުވަސްކޮޅެއްފަހުން އަނބިމީހާގެ މި ޝަކުވާތައް ފިރިމީހާގެ ކަންފަތުގައި ޖެހެން ފެށިއެވެ. އަދި އަނބިމީހާގެ ބައެއް އަމަލުތައް ހުރީ އޭނާގެ މައިދައިތައަށް އުނދަގޫކޮށް ޖެއްސުން ކުރުމުގެ މޭރުމަކުންނެވެ. މިކަންކަން ފިރިމީހާއަަށްވެސް އިހުސާސްވާން ފަށައިފިއެވެ. ނަމަވެސް އެކަކު އަނެކަކު ދެކެ ވާ ލޯބީގެ ސަބަބުން ކެތްކޮށްގެން ހުރީއެވެ.

އަނެއްކާވެސް ދުވަސްކޮޅެއްގެ ފަހެވެ. ފިރިމީހާގެ ފައިސާއިން، ފިރިމީހާގެ އިޒުނައާއި ނުލާ އޭނާގެ އަންހެނުން ބޭރު ގައުމަކަށް ދާން ޓިކެޓު ނެގިއެވެ. ދެމަފިރިން އެކަންޏެވެ. އެކަން ފިރިމީހާއަށް "ސަޕްރައިޒެއްގެ" ގޮތުގައި ދައްކާލިއެވެ. ކުރިއަށް އޮތީ އެ ފިރިމީހާގެ މަންމަގެ ވިޔަފާރީގައި ބުރަ ދުވަސްތަކެކެވެ. އެކަން ފިރިމީހާއަށް އެނގެއެވެ. އަދި އަނިބިމީހާއަށްވެސް އެނގެއެވެ. އަނބިމީހާގެ މަގްސަދަކަށް ވީ އެ ދުވަސްވަރު އެ މަންމައާއި އޭނާގެ ދަރިފުޅު ވަކިކޮށް، އެ ދަރިފުޅުގެ ހުރިހާ ވަގުތެއް އަނބިމީހާއަށް ހުސްކުރުވުމެވެ. ނަމަވެސް ކަން ވެގެން ދިޔައީ ހީކުރިގޮތާއި ހިލާފަށެވެ.

އެ ދަތުރު ދިއުމަކަށް ފިރިމީހާ އިންކާރެއް ނުކުރެއެވެ. ނަމަވެސް ޝައުގުވެރިކަން ނެތްކަމުގެ ކުލަވަރު މޫނުމަތިން ފެނެއެވެ. އެކަމާ އަނބިމީހާ އަނެއްކާ ޝަކުވާކުރަން ފެށިއެވެ. ވަގުތު ނުދޭ ވާހަކައާއި އަޅާނުލާ ވާހަކައިންނެވެ. އެ ޝަކުވާތަކުގެ ސަބަބުން އެ ދަތުރު ދިއުމަށް ފިރިމީހާއަށް މަޖުބޫރުވިއެވެ.

ދަތުރު ދިއުމަށް އޮތް ދުވަހުގެ ހެނދުނުގެ ވަގުތެވެ. ދެމަފިރިން ފޮށިތަންމަތި ތައްޔާރު ކުރިއެވެ. ދަތުރައް ތައްޔާރުވެ ގެއިން ނުކުންނަން އުޅުނު ވަގުތެވެ. ކުއްލިއަކަށް ދޮރުގައި މީހަކު ޓަކި ދިނެވެ. ފިރިމީހާ ގޮސް ދޮރުހުޅުވާލާ އޭނާގެ މަންމަ އެތެރެއަށް ވެއްދިއެވެ. އަދި އެ ދަތުރުގައި އޭނާގެ މަންމަ ބައިވެރިވާނޭ ކަންވެސް ހާމަކުރިއެވެ. އެހިސާބުން އަނބިމީހާގެ ރުޅިގަނޑު ފަޅައިގެން ފިޔައެވެ. އެ މަންމަގެ މޫނުމަތީ، ފިރިމީހާގެ ކުރިމަތީ، އަނބިމީހާގެ މައިދައިތައަށާއި ފިރިމީހާއަށް ހެެއްދެވި ނުހެއްދެވި އަށް ގޮވަން ފެށިއެވެ. ބޮޑާވެރިއެއް ކަމަށާއި އަމިއްލައެދުން ބޮޑު ފިރިހެނެއް ކަމަށެވެ. އަދި މައިދައިތަ އަކީ ނުބައި ނުލަފާ، ދަރިންނަށް އިހްތިރާމް ނުކުރާ، ވަގު ވިޔަފާރިކޮށް މުއްސަނދިކަން ހޯދައިގެން އުޅޭ މީހެއްކަމަށް ތުހުމަތު ކުރިއެވެ.

މި އަޑުތަކާއި މަންޒަރުތަކުގެ ކުރިމަތީ ފިރިމީހާ ވަގުތުން ވަގުތައް އޭނާގެ އަންހެނުން ވަރިކުރި އެވެ. އަދި ގެއިން ނުކުތުމަށް އެންގިއެވެ. ތަނަވަސް އާއިލާއެއްގެ ތެރޭގައި ލޯބިން އުޅުމުގެ ފުރުސަތު އެ އަންހެންމީހާއަށް ގެއްލުނީއެވެ. އުފާވެރިކަމުގެ ދުވަސްތައް އަނދިރިވީއެވެ. ކުރެވުނު އެންމެ ކަމަކުންނެވެ. ހިތުގައި ރޯވި ހަސަދަވެރިކަމުގެ އަލިފާނަކުންނެވެ.