ދުނިޔޭގައި އިންސާނާ ދިރިއުޅޭއިރު، އަބަދުވެސް އެހެންމީހުންގެ ކަންކަމާއި މެދު ވިސްނޭނެއެވެ. ވިސްނަން ވާނެއެވެ. ވިސްނަން ޖެހޭނެއެވެ. އެހެންމީހުންގެ އިހުސާސްތަކާއި މެދު ވިސްނާން ޖެހޭނެއެވެ. ޖަމާއަތެއް ބަދަހިކަމާއި އެކީ ތަރައްގީއާއި ތަމައްދުނުގައި ކުރިއަރާ ދާނީވެސް އެ ޖަމާއަތެއްގައި ދިރިއުޅޭ ބަޔަކު، އެއްބަޔަކު އަނެއްބައެއްގެ އިހުސާސްތައް ދަނެގެންނެވެ. މިއީ އެފަދަ، ވަރަށް ތަފާތު ވާހަކައެކެވެ. ޖަޕާނުގެ މަތިންދާ ބޯޓަކުން ދަތުރުކުރި މީހަކު، އެ ބޯޓުން ދަތުރުކުރި އެހެން ދަތުރުވެރިންގެ އިހުސާސްތައް ދެނެގަނެ ކަން ކުރި ގޮތުގެ ވާހަކައެވެ. މި ވާހަކަ މީސްމީޑިޔާގައިވެސް ވަނީ އާންމުވެފައެވެ.

އެއީ އަންހެނެކެވެ. އޭނާ މަތިންދާ ބޯޓަށް އެރީ އޭނާގެ އަހަރު ނުފުރޭ ކުޑަ ދަރިފުޅު ގޮވައިގެންނެވެ. އެއަރޕޯޓް ތެރެއިން އެންމެ ފުރަތަމަ ޗެކް-އިން ވި މީހުންގެ ތެރޭގައި އެ ދެމައިން ހިމެނެއެވެ. ބޯޓަށް އެންމެ ފުރަތަމަ އެރި މީހުންގެ ތެރޭގައިވެސް އެ ދެމައިން ހިމެނެއެވެ. ބޯޓުގައި އެ ދެމައިންނަށް ހާއްސަކުރެވިފައިވާ ގޮނޑީގައި އިށީނުމަށްފަހު އެ އަންހެނާގެ ދަބަހުން ބައިވަރު ސިޓީ އުރަތަކެއް ނެގިއެވެ. އެއަށްފަހު ބޯޓުގައި އޭރު ތިބި ކޮންމެ މީހަކަށް ސިޓީއުރައެއް ދިނެވެ. އަދި ބޯޓަށް އަރަމުންދާ ކޮންމެ މީހަކަށްވެސް ސިޓީ އުރަ ދެމުން ދިޔައެވެ. ބަހަމުން ދިޔައެވެ. ކޮނޑުގައި އޭނާގެ ދަރިފުޅު ބާއްވާލައިގެންނެވެ.

ސިޓީ އުރަ ބަހަމުން ދިޔަ ވަގުތު ބައެއް މީހުން އެ ސިޓީ އުރަ ކަނޑަން ފެށިއެވެ. އަދި ސިޓީ އުރަތައް ބަހާ ނިމުމުން އެ ދެމައިން އެ ދެމައިންގެ ސީޓުގައި އިށީނދެގެން އިނެވެ. ދަތުރަށް ތައްޔާރު ވެގެންނެވެ. މީސްމީޑިޔާގައި މި ވާހަކަ އާންމުކުރި އެކަކު ވަނީ އެ ސިޓީ އުރައިގެ ތަފްސީލު ބަޔާންކޮށްފައެވެ.

އެ ސިޓީއުރައިގައި ވަނީ މެސެޖެއް ލިޔެފައިވާ ކުޑަ ކަރުދާސްކޮޅަކާއި ކަންފަތަށް ޖަހާ ކަހަލަ ދެ ބަޑެވެ. މިއީ އާންމުކޮށް މަތިންދާ ބޯޓުގައި ދަތުރު ކުރާއިރު ބައެއް މީހުން ބޭނުންކޮށް އުޅޭ ވައްތަރުގެ ދެ ބަޑެވެ. ނުވަތަ ދެ "އުނގުރިއެވެ". މި ބަޑު ކަންފަތައް ޖެހުމުން އެހެން އަޑުތައް އިވުމާއި ކަންފަތް ބައްވުމުން ސަލާމަތް ކޮށްދޭނެއެވެ. ދެން އެ ސިޓީއުރައިގައި އޮތް ލިޔުންކޮޅުގައި ލިޔެފައިވަނީ އަސަރުގަދަ ވާހަކައެވެ. 

އެ ލިޔުމުގެ ތަރުޖަމާއެއް ހިއްސާކޮށްލާނަމެވެ. "އަހަންނަކީ ޔޫ-ވިން (އަސްލު ނަމެއް ނޫން) އެވެ. އުމުރުން 8 މަހެވެ. މިއަދަކީ އަހަރެން މަތިންދާ ބޯޓެއްގައި ދަތުރުކުރާ ފުރަތަމަ ފަހަރެވެ. އަހަރެން މި ދަނީ އަހަރެންގެ މާމަމެންގެ ގާތަށެވެ. މަތިންދާ ބޯޓުގައި އަހަރެން ދަތުރުކުރަން ބިރުގަނެއެވެ. ފަހަރެއްގައި އަހަރެން ބަނޑުހައިވެސް ވެދާނެއެވެ. ބިރުގަތަސް، ބަނޑުހައިވިޔަސް ނުރޮއެ ވޭތޯ އަހަރެން ވަރަށް ބަލާނަމެވެ. އެހެންނަމަވެސް އަހަންނަށް ރޮވިދާނެއެވެ. ބާރަށްވެސް ރޮވިދާނެއެވެ. އެކަމަށްޓަކައި ތިފަރާތުގެ ކިބައިން މައާފަށް އެދެމެވެ. އަދި އަހަރެންގެ ރުއިމުގެ އަޑުގެ ސަބަބުން އުނދަގޫވާނަމަ މި ދެ ބަޑު ކަންފަތަށް ޖަހާށެވެ. އަހަރެންގެ ސަބަބުން ދިމައިވެދާނޭ ހުރިހާ އުނދަގުލަކަށް މައާފަށް އެދެމެވެ. ލޯބިވާ ޔޫ-ވިން." މިއެވެ.

މި ހާދިސާއިން ހާމަވެގެން ދަނީ އެ އަންހެނާ، އޭނާގެ ދަރިފުޅުގެ ސަބަބުން، އެހެން މީހުންނަށް ވެދާނޭ އުނދަގުލަކާއި މެދު ވިސްނިވަރެވެ. އަނެކުންގެ އިހުސާސްތަކުގެ މަތިން ހަނދާން ކުރި މިންވަރެވެ. އެ އިހުސާސްތަކަށް އިހްތިރާމް ކުރި މިންވަރެވެ. އާދޭހެވެ. މިއީ އަނެކުންގެ އިހުސާސްތަކަށް އިހްތިރާމްކުރުމުގެ ލާމަސީލު މިސާލެކެވެ. ބުނަން މިއުޅެނީ އެފަދައިން އަދި އަމަލު ނުކުރިނަމަވެސް، އަބަދުވެސް، އަބަދުވެސް އަނެކުންގެ އިހުސާސްތައް އިސްކުރަން ވާނޭ ވާހަކައެވެ. އަނެކުންނަށް ތިބާގެ ސަބަބުން ނުވަތަ ތިބާ ކުރާ ކަމެއްގެ ސަބަބުން އުނދަގުލެއް ވޭތޯ އަބަދު ބަލަން ވާނެއެވެ. އެކަންކަމަށް ފާރަވެރިވެ، އަނެކާ އެ ތުރާލުން ދުރުކޮށްދޭން ވާނެއެވެ. ނުވަތަ މި ހާދިސާގައި އެ ވީ ފަދައިން ރީތިކޮށް މައާފަށް އެދެވިދާނެއެވެ. މިއީ ލަދުވެތި ނުވަތަ ދެރަ ކަމެއްވެސް ނޫނެވެ. ހަގީގަތުގައި އަނެކާއަށް އިހްތިރާމްކުރުމަކީ ދެދުނިޔޭގެ ބާއްޖަވެރިކަން ލިބޭނޭ ކަމެކެވެ.