ރާއްޖޭގެ ކޮންމެ ރަށެއްގައިވެސް، އެ ރަށެއްގެ ރައްޔިތުން ކަންކަމާއި މަޝްވަރާކޮށް ހިޔާލު ބަދަލު ކުރަން މީސްމީޑިޔާގައި ޖަމާއަތް ހަދައިގެން އުޅެއެވެ. މީސްމީޑިޔާގެ އެކި މަންސަ ތަކުގައެވެ. ވަޓްސްއެޕާ ވައިބަރާ ފޭސްބުކު ފަދަ ތަންތަނުގައެވެ. މިފަދަ ކޮންމެ ޖަމާއަތެއްގައި ގިނަ ފަހަރަށް ދެކެވެނީ އެ ރަށްތަކުގެ ރަށްވެހި ކަންކަމުގެ ވާހަކައެވެ. މިއީ ހަގީގަތުގައި އެ ރަށްރަށުގެ ތަރައްގީއާއި ތަމައްދުނުގައި ނުހަނު ބޭނުންތެެރި ސައްލާ މަޖިލީސް ތަކެކެވެ.

އާދޭހެވެ! މިފަދަ މަޖިލިސްތަކުގައި އެ ރަށްރަށުގެ ގިނަ ރައްޔިތުން އުޅެއެވެ. ރަށުގައި ދިރިއުޅޭ ރައްޔިތުންނާއި، ރަށުން ބޭރުގައި އުޅޭ ރައްޔިތުންނެވެ. ދޭތެރެ ދޭތެރެއިން ރަށަށް އަންނަ ރައްޔިތުންނާއި ދުވަހަކުވެސް ރަށަށް ނާންނަ އަދި އައުމުގެ ޝައުގުވެރިކަން ނުހުންނަ މީހުންވެސް ހިމެނެއެވެ. ގަބޫލުފުޅުކުރައްވާށެވެ! އޮޑިއެއްގައި ހުރި ވަރު އިނގޭނީ އަރާ ދުއްވާލީމައެވެ. މިއީ ޒަމާނުއްސުރެ ދިވެހިން ބޭނުންކުރާ ހަރު ބަހެކެވެ. އަދި ގަބޫލުކުރާ ހަމައެއްވެސް މެއެވެ. ސަބަބުތަކެއް ނެތިއެއް ނޫނެވެ.

ދުރުގައި ބަލަން ހުންނަ މީހާ، ނުވަތަ އެއްގަމުގައި ހުންނަ މީހާ ނުވަތަ އެހެން އޮޑިއެއްގައި ހުންނަ މީހާ، އެހެން އޮޑިއެއްގެ "ވަރު"، މިނެ ކިރާނީ ކޮން ހަމަ އަކުން ހެއްޔެވެ؟ އެ އޮޑިއަކާއި ބެހޭގޮތުން އެނގޭނީ ކޮން އެއްޗެއް ހެއްޔެވެ؟ ނަމަވެސް އެ އޮޑިއަށް ނާރާ، އެ އޮޑީގައި ހުރި ވަރުގެ ވާހަކަ ވަރަށް ގިނަ މީހުން ދައްކައެވެ. އަތިރިމަތީގައި ތިބެގެންނާއި، އެހެން ތަންތަނުގައިވެސް ދައްކައެވެ. މިއީ ހަގީގަތުގައި ވަރަށް މުޑުދާރު ކަމެކެވެ. ސިކުނޑިއެއް ހުރެވާ، ހަމަ ބުއްދިން ވިސްނޭނަމަ ކީއްވެކަން ވިސްނާލުމުން ވިސްނޭނެއެވެ.

އާދޭހެވެ! ރަށްތަކުގެ ރައްޔިތުންގެ އިޖްތިމާއީ އެކި އެކި ސައްލާ މަޖިލީސް ތަކުގައިވެސް، އޮޑީގެ ވަރު ނުބަލާ ގޮތްފާޑު ކިޔާ މީހުން ވަރަށް ގިނައެވެ. ދުވަހަކު ކޮޅުން ރަށުގައި ފައި ނުޖައްސާ މީހާވެސް ރަށުގެ ކަންކަމާއި މެދު ގޮތް ކިޔައެވެ. ރަށުގައި ދިރި ނޫޅޭ އެހެންނަމަވެސް ދަމަކުން ބަޑިއެއް ޖަހާހެން ރަށަށް ގޮސް އައިސްވެ އުޅޭ މީހުންވެސް ގޮތް ފާޑު ކިޔައެވެ. އެމީހުންގެ ވެސް ރަށް ވީމައެވެ. ފަހަރުގައި އެފަދައިން ގޮތް ފާޑު ކިޔާ މީހާ (ރަށުގައި ނޫޅޭ ރަށު މީހާ) އަކީ ތަޢުލީމީ ގޮތުން ނުހަނު ގާބިލު މީހަކަށް ވެދާނެއެވެ. ތަޖުރިބާގައި އަތު ނުވާ ފެންވަރުގެ ތަޖުރިބާކާރަކަށް ވެދާނެއެވެ. ބަސްމޮށުންތެރިކަމުގައި ދޫ އޮޅުމެއް ނުވާ މީހަކަށް ވެދާނެއެވެ. ލިޔުންތެރިކަމުގައި ގަލަމުގެ ދެލި ނުހިކޭ މީހަކަށް ވެދާނެއެވެ. ފަންނުގައި އަމުދުން މާ މޮޅު ފަންނާނަކަށްވެސް ވެދާނެއެވެ. އޭނާގެ ކިބައިގައި ހުރިހާ މޮޅު ސިފައެއް ހުރި ނަމަވެސް، ތަނާ ހާލަތައް ބަލާ އޭނާގެ ކިބައިގައި މަދުވަނީ އޮޑީގައި ނެތުމުގެ ހާލަތެވެ. އެހެން ކަމަށް ވާނަމަ، އެ އޮޑިއަށް ނާރާ އެ އޮޑީގެ ވާހަކަ ކިތަންމެ މޮޅު މާވަޑި އަކު، އަދި ކެޔޮޅަކު ދެއްކި ނަމަވެސް އެ އޮޑީގެ ހަގީގަތް އޮންނާނީ ހާމަ ނުވެއެވެ. މޮޅުކަމުން އެންމެން ތައުރީފު ކުރާ މާވަޑިއަކަށްވެސް، އެ އޮޑިއަށް އަރާ ދުއްވާ ނުލާހާ ހިނދަކު، އެ އޮޑީގެ ވަރު ހުރި ވަރެއް ބުނެދޭކަށް ނޭނގޭނެއެވެ.

މިފަދައިން ދުރުދުރުގައި ތިބެގެން އެއްލާ ގާބުރިތަކާއި ޖަހާ ގަޅިގަނޑުގަނޑުން ގިނަފަހަރަށް ވެއްޓެނީ އެ ރަށެއްގެ އިޖްތިމާއީ ގަހުގައި ހުންނަ ދޮން ނުވާ ޅަ މޭވާ އާއި ގަހުގެ ފަތްތަކެވެ. ހާސިލް ކުރަން ބޭނުންވާ ނަތީޖާ ހާސިލްވުން އޮތީ މާ ދުރުގައެވެ. ނަމަވެސް ގަހަށް އަރާ، ގަހުގެ ތެރޭގައި އުޅެމުން ބިންނަން ބޭނުންވާ މޭވާގައި ހިފާ، ސީދާ އެ މޭވާ ބިނދެވޭނެެެވެ. ފަސޭހަކަމާއި އެކު ކަމުގެ މަގުސަދު ހާސިލް ކުރެވޭނެއެވެ. މިއީވެސް ދިރުން ހުރި ސިކުނޑިއަކުން ވިސްނައިފިނަމަ ވަރަށްވެސް އިބުރަތްތެރި ފިލާވަޅެކެވެ.

އާދޭހެވެ! ރަށްރަށުގެ ރައްޔިތުން މީސް މީޑިޔާގައި ހަދާފައި ހުންނަ މިފަދަ ސައްލާ މަޖިލީސް ތަކުގައި ހަމަ ކޮންމެ މީހަކަށްވެސް ބަސް ބުނެވޭނެއެވެ. އެއީ އޭނާގެ ހައްގެކެވެ. ނަމަވެސް ހެޔޮވިސްނުން އިސްކޮށް ހެޔޮ ބުއްދި މަތިކޮށްފިނަމަ، ރަށުން ބޭރުގައި އުޅޭ މީހުން، ރަށުގެ ހާލަތު އެނގިގެން ވާހަކަ ދެއްކުން ބުއްދިވެރިއެއް ނޫނެވެ. މޮޅުގޮތާއި ކާމިޔާބު އެދިގެން ތިބާ ތިޔަ ހުރީ ރަށް ދޫކޮށް އެހެން މޮޅު ރަށަކަށް ބަދަލުވެފައެވެ. ރަށުގެ ކަންކަމާއި މެދު ބަހުސްކޮށް، ރަށުވެ ކުރިއެރުމަށް އެދޭނަމަ، ތިޔަ ރަށުން ފައިބައިގެން އައިސް އަމިއްލަ ރަށުގައި އުޅޭށެވެ. ނޫންނަމަ އެފަދަ ވާހަކަތައް ދައްކާ، ޕޯސްޓްކޮށް ކޮމެންޓު ކުރުން "ސަޅި" އެއް ނޫނެވެ. ރީތި އަދި ދުނިޔެވީ އިންސާނީ އުސޫލަކީވެސް، އެ އޮޑިއެއްގެ ވަރާއި މެދު ބަހުސްކޮށް ޒުވާބުކުރަން ވާނީ އެ އޮޑިއަކަށް އަރާ ދުއްވާލުމަަށް ފަހުގައޭ ބުނާ އުސޫލެވެ. މި ވިސްނުމުގައި ކަން ކުރާނަމަ، "ކުނި ނޭޅި" މަގުސަދު ހާސިލް ކުރެވޭނެއެވެ.