ރާއްޖޭގެ ރަށްތަކުގައި އަބަދުވެސް ކޮންމެވެސް ހަރަކާތެއް ހިނގާނެއެވެ. ދައުލަތުން ހިންގާ ޕްރިޖެކްޓްތަކާއި ރަށު ކައުންސިލުން ހިންގާ ހަރަކާތްތަކާއި ރަށްރަށުގެ ޖަމުއިއްޔާ ޖަމާއަތްތަކުން ހިންގާ އެކިއެކި ހަރަކާތްތަކެވެ. މިއިން ކޮންމެ ހަރަކާތަކީވެސް ރައްޔިރުންގެ ލާބައާއި މަންފާއަށް ކުރެވެމުންދާ ކަންކަމެވެ. މިފަދަ އެކި އެކި ހަރަކާތްތަކުގައި ތަފާތު އެކި ކަންކަން ކުރެވޭނެއެވެ. އެކަންކަމުގެ ސަބަބުން އެރަށެއްގެ ރައްޔިތުން ހިތްހަމަ ޖެހޭ ކަންކަމާއި ހިތްހަމަ ނުޖެހޭ ކަންކަން ހިނގާނެއެވެ. އެއީ ދުނިޔޭގެ އާދައެވެ. ރުހުމުގެ ލޮލަކަށް އައިބެއް ނުފެންނާނޭ ބުނާ އުސޫލުވެސް ޒާތަކަން ތަންފީޒުވަމުންނެވެ.

އިންސާނާގެ ނަފްސުގައި ރުޅިވެރިކަމާއި ދެކޮޅުވެރިކަމުގެ ސިފަ ލައްވާފައި ވަނީ އިންސާނާ ރުޅި އައިސް ދެކޮޅުވެރި ވާކަށް ނޫނެވެ. ނަމަވެސް އެއީ އިންސާނާގެ އިމްތިހާނަކަށް ލައްވާފައިވާ ވަރަށް ހައްސާސީ ސިފައެކެވެ. އިންސާނާއީ އަބަދުވެސް ރުޅީގެ މައްޗަށް ގަދަވެގަންނަން ޖެހޭނޭ މީހެކެވެ. ނަމަވެސް އަބަދުވެސް ވާގޮތަކީ، އެމީހަކާއި ސީދާ ގުޅުން ހުންނަ ކަންކަމުގައި ރުޅި އިސްކުރެވޭލެއް ގިނަ ވާ ކަމެވެ. އެއީވެސް އިންސާނީ ޠަބީއަތެކެވެ.

ރާއްޖޭގެ ރަށްތައް ތަރުތީބުވެ ހިނގަމުން ދަނީ ކުދިކުދި އާބާދީތަކެއްގެ މައްޗަށް ބިނާވެގެންނެވެ. އެ އާބާދީތަކުގައި އެންމެން އެކަކު އަނެކަކު ދަނެ ރަހުމަތްތެެރިންގެ ހާލުގައި ވާ ހާލުގައެވެ. ނަމަވެސް އެ އެކުވެރިކަމާއި އުހުއްވަތްތެެރިކަން ނެތިކޮށްލަނީ ބަޔަކު ކުރާ ކަމަކުންނެވެ. ނުވަތަ ބަޔަކު ހިންގާ ހަރަކާތަކުންނެވެ. އެ ހަރަކާތަކުން އަނެކާއަށް ކިތައްމެ ބޮޑު ގެއްލުމެއް ލިބުނަސް ކަހާތަން ހިރުވާވެސް ނުލާ އިންސާނާ ހުރެއެވެ. އަނެކާއީ ތިމާ ދަންނަ ގާތް ރަހުމަތްތެރި ނުވަތަ އާއިލީމީހެއް ކަމުވައި ވިޔަސްވެސް މެއެވެ. ގިނަ ފަހަރަށް ދުރު މީހުންނަށް ކިތަންމެ ބޮޑު ވޭނަކާއި ތުރާލެއް ޖެހި، ބޮޑު ތަކުލީފެއް އެ ރަށެއްގައި އުފުލަން ޖެހުނަސް އަޅާކަހާވެސް ނުލާ މީހުން އުޅެއެވެ. "އަލް މުސްލިމް އަޙުލް މުސްލިމް" ގެ ޝިއާރު އެއްގޮތަކަށްވެސް ހިތުވައި ނުހިނގާ ހާލުގައެވެ.

ކޮންމެ އަކަސް އަނެކާއަށް ކަމަކުން ތުރާލެއް ވޭނެއް ލިބި ބޮޑު ތަކުލީފެއް އުފުލަމުންދާއިރު، ތިބާ ދުރުގައި ބަލަން ހުރީ އިއްޔެއެވެ. އެކަމާ އަޅާނުލާ، ބަހެއް ނުބުނެ ހުރީ އިއްޔެއެވެ. ނަމަވެސް މިއަދު، އެ ތުރާލާ ތަކްލީފު ތިބާގެ ގޮވަތި ތެރެއަށް ވަނުމުން، ތިބާއަށް ވުރެ ވަކި އަޑުބާރު މީހަކު ނެތެވެ. ތިބާއަށްވުރެ ވަކި ބަސް ހުތުރު މީހަކު ނެތެވެ. އިއްޔެ އަޅާނުލާ ހުރި އަނެކާއަށް ވަކިން އޯގާތެރި އިހުސާންތެރި މީހަކު މިއަދު ތިބާނޫނީ ނެތެވެ. އެ ތުރާލެއްގެ ސަބަބާއި އެކަމުގައި ބައިވެރިވާ އެހެންމީހުންނަށް މިއަދު ގޮވާފަ ނުގޮވާނޭ އެއްޗެއް ނެތެވެ. އާދޭހެވެ! ހަަމަ އެހާލުގައި އިއްޔެ، ތިބާ ދަންނަ އެހެން މީހަކު ވިއެވެ. ނަމަވެސް އެއީ ރަށުގެ ވަކި ބަޔަކު ނުވަތަ ރަށަށް ހެވެއް އެދިގެން ރަށުގެ ތަރައްގީއަށް ބަޔަކު ކުރާ ކަމަކަށް ވީތީ ބަސް ނުބުނެ ހުރީއެވެ. ހިތާމައަކީ އެކަމުގެ ސަބަބުން އުނދަގުލާއި ތުރާ ތިބާއަށް ޖެހުމުން، އެއީ ބަލައިގަންނަ ކަމަކަށް، އެއީ ބޭނުންވާ ތަރައްގީއެއް ކަމަކަށް ނުވިއެވެ. އެއީ ފަނާކުރުމުގެ ވިސްނުން ކަމުވައި ވެސް ވެއްޖެއެވެ. އެ ހަރަކާތަކީ ވަގުތުން ވަގުތައް ހުއްޓަން ޖެހޭ ވިޔާނުދާ ހަރަކާތަކަށް ވެއްޖެއެވެ. 

އާދެހެވެ! ތިބާ ރުޅިއައީ ތިބާއަށް އޭގެ އުނދަގޫ ޖެހުނީމައެވެ. ތިބާގެ އެކުވެރިޔާއަށް، ތިބާ ދަންނަ ރަށު މީހާއަށް އެ އުނދަގޫ ޖެހިގެން އުޅުނު އިރު ތިބާ ރުޅިއެއް ނާދެއެވެ. މިއީ ދުނިޔޭގައި ކަންވާ ގޮތެވެ. ވަމުންދާ ގޮތެވެ. އަދި މާދަމާވެސް ވާނޭ ގޮތެވެ. ސަބަބަކީ ގިނަ އިންސާނުންނަކީ ގަދަކަން ދައްކަން ބޭނުން ވުމުގެ ސަބަބުން، ރުޅީގެ މައްޗަށް ނަފުސު ދީލަމުންދާ މީހުންނެވެ. ކަން އޮތީ މިހެން ނަމަވެސް އަބަދުވެސް ހެޔޮގޮތާއި ސުލްހައަށް އިންސާނާ ލޯބި ކުރަން ވާނެއެވެ. އިންސާފަށް ތާއީދު ކުރަންވާނެއެވެ. ރުޅީގެ މައްޗަށް ގަދަވެ ގަންނަން ވާނެއެވެ. އަނެކާގެ ހާލަށް އިހްތިރާމް ކުރަންވާނެއެވެ. މޭބޮޑުކޮށް ގަދަކަން ދައްކައިގެން ނުވާނެއެވެ.