ދިރިއުޅުމުގައި މާޔޫސް ކަމާއި މޮޅިވެރިކަން އަބަދުވެސް އިންސާނާއަށް ކުރިމަތިވެއެވެ. އަދި ވަމުންވެސް ހިނގައިދާނެއެވެ. ދުނިޔެ ހިނގާނީ ތޮށަލި ދުޅައަށޭ ބުނަނީ މިފަދަ ސަބަބުތައް މިހެން ހުންނާތީއެވެ. ހަޔާތުގައި ދިމައިވާ މިފަދަ މާޔޫސް ކަންކަމާއި ހިތާމަވެރި ކަންކަމުން އިންސާނާ އަބަދުވެސް މޮޅިވެރިކަމެއްގެ ތެރެއަަށް މޫނު ލާން ޖެހެއެވެ. ނަމަވެސް އެފަދަ ކަންކަމުގައި ފައްސި ވިސްނުމެއް އަބަދުވެސް ގެންގުޅެންވާނެއެވެ.

ދަންނާށެވެ! އަހަރެމެންނީ މުސްލިމުންނެވެ. ވީ ހިނދު އަހަރެމެން އުޅެމުން މި ދަނީ އިމްތިހާނުގެ ގޮވައްޗެއްގައިކަން އަހަރެމެން އެންމެންނަށް އެނގެއެވެ. އެހެންކަމުން އަބަދުވެސް އަހަރެމެންނާ އިމްތިހާނުތައް ކުރިމަތިވާނޭކަން އަހަރެމެން ދަންނަންވާނެއެވެ. އެފަދައިން އަބަދުވެސް ދިމައިވާ މޮޅިވެރި، މާޔޫސްވާންވީ ކަންކަމަކީ އަހަރެމެންނަށް ކުރިމަތިވާ އިމްތިހާނެއްކަން އަބަދުވެސް ދަންނަން ވާނެއެވެ.

އިމްތިހާނުތަކަކީ އެއީ އަހަރެމެން އެއިން ފިލާވަޅު ލިބިގަނެ، ކުރިއަށް އޮތްތަނުގައި އެ ފިލާވަޅުތަކާއި އެއްގޮތަށް އަމަލުކުރަން ޖެހޭނޭ ކަންކަމެވެ. އެއީ އެކަންކަމާއި މާޔޫސްވެ، އަމިއްލައަށް އަމިއްލަ ނަފްސު ކުށްވެރިކޮށް އުޅުން މުޅިއަކުން ރަނގަޅުކަމެއް ނޫނެވެ. ފަހަރުގައި އެފަދަ ކަމެއް މެދުވެރިވަނީ އަހަރެމެން އަމިއްލަ އަށް ކުރާ ނުވަތަ ކުރެވުނު ގޯސް ކަމަކުން ކަމަށް ވެދާނެއެވެ. ކުރެވުނު ކުށެއްގެ ސަބަބުން ކަމަށް ވެދާނެއެވެ. އެފަދަ ހާލަތްތަކުގައި އަމިއްލަ ނަފްސު ކުށްވެރި ކުރެވުމަކީ އިންސާނީ ޠަބީއަތެކެވެ. ނަމަވެސް އެ ހާލަތުގައިވެސަ އިންސާނާއަށް އޮތީ އިންސާނާގެ ވިސްނުމާއި ބުއްދި އިސްކޮށް، ހެޔޮ ވިސްނުން މަތިކޮށް، ފައްސި ވިސްނުމަކުން ވިސްނުމެވެ. އެހެންކަމުގައި ވަނީނަމަ، އެ ކުށަކަށް ތައުބާވެ، އެކުށެއް ދެވަނަ ވަހަރަށް ނޫނީ ދެން އެކުށެއް ނުކުރާން އަޒުމު ކަނޑައެޅޭނެއެވެ. މި ހިސާބުން ހަޔާތުގައި އައު މަންޒިލަކަށް ދިއުމަށް އައު ދަތުރެއް ފެށިގެން ދެއެވެ.

ކަންއޮތީ މިހެންކަމުގައި ވީނަމަމެސް، ނައްސި ވިސްނުމުގައި ކަސިޔާރު ހިލާޔުތައް ގެންގުޅި، އަމިއްލަ ނަފްސު ކުށްވެރި ކުރާނަމަ، ދެން ދުނިޔޭގައި އުޅުމުގެ ބޭނުންތެރިކަން އެމީހެއްގެ ހިތުން ފިލައިދެއެވެ. ޝައިޠާނީ ނުބައި ވަސްވާސްތަކުގައި އެމީހަކު ޖެހި ހިނގައިދާނެއެވެ. އެވެނި މިވެނި ކަމެެއް މިއޮތީ ކުރިމަތި ވެފާތާއޭ، ދެން އުޖާލާކަމެއް ބާއްޖަވެރިކަމެއް މި ހަޔާތުގައި ނުވާނޭ ކަމުގެ ނުބައި އިހުސާސް ކުރެވެން ފަށާނެއެވެ. ކާމިޔާބީއަކީ ތިބާއަށް ހައްގު އެއްޗެއް ނޫންކަމުގެ ނާއުންމީދު ހިތުގައި އަށަގަންނާނެއެވެ.

މިހުރިހާ ކަމަކަށްވެސް އޮތް ހައްލަކީ ހެޔޮ ވިސްނުން އިސްކުރުމެވެ. ފައްސި ވިސްނުން މަތި ކުރުމެވެ. ނުނިޔަތް ނުލުމެވެ. އިމްތިހާނުތަކުން ފާސްވުމެ. އިބުރަތް ހާސިލް ކުރުމެވެ. ހަޔާތުގައި ދިމާވާ އެއްވެސް ކަމަކުން، ދިރިއުޅުމުގެ މާނަ ގެއްލިގެން ދިޔަ ނުދޭށެވެ. ހަޔާތުގެ ބާއްޖަވެރިކަމާއި ކާމިޔާބީ އަތުން ބީވިޔަ ނުދޭށެވެ.