އިންސާނުންގެ މިޒާޖުގައި އެކި މީހުން ގަޔާވާނީ އެކި ކަހަލަ ކަންކަމަށެވެ. އިންސާނުންގެ ޠަބީއަތް އެކަކު އަނެކަކާއި ތަފާތުވަނީ މި ސަބަބަށްޓަކައެވެ. އެހެންކަމުން އިންސާނުންގެ ތެރޭގައި ތަފާތު މިޒާޖުގެ މީހުން އަބަދުވެސް އުޅޭނެއެވެ. މި މިޒާޖު ވެގެންދަނީ އެމީހެއްގެ ކަންކަން ހަޔާތުގައި ތަރުތީބުވުމަށް ވަރަށް ބޮޑު ބާރަކަށެވެ. ނުވަތަ ބައެއްފަހަރަށް ބޮޑު ހުރަހަކަށެވެ. އެހެންކަމުން އިންސާނާގެ މިޖާޒު އޭނާގެ ނަފްސު ކޮންޓުރޯލު ކުރިޔަ ނުދީ، ނަފްސުން މިޖާޒު ކޮންޓްރޯލު ކުރާށެވެ.

އާދޭހެވެ! އިންސާނުންގެ ޠަބީއަތުގައިވާ ސިފަ ތަކާއި މިޒާޖުތަކުން ކުރެ އެންމެ ރަނގަޅު އެއް މިޒާޖަކީ މަޑުމައިތިރިކަން ކަމަށް ގިނަ މީހުން އެއްބަސްވެއެވެ. ކަންއޮތީވެސް އެހެންނެވެ. އަހަރެމެންގެ އުޅުމާއި ގުޅުންތަކުގެ ގާނޫނު ނުވަތަ އަހަރެމެންގެ ހުރިހާ ކަމެއް އެކަމެއްގެ ތަރަހައިގައި ހިފަހައްޓާ އަހަރެމެންގެ އިސްލާމް ދީން ވެސް ބާރު އަޅަނީ މަޑުމައިތިރި ވުމަށެވެ. އެއްކަމެއް ދެކަމެއްގައެއް ނޫނެވެ. ދީނުގެ ކިތަންމެ އަޅުކަމެއްގައިވެސް އޮތީ މަޑުމައިތިރިވުމެވެ.

މަޑުމައިތިރިކަމަކީ އަމާންކަމެކެވެ. މިއީ ސުލްހައިގެ ރަމްޒެކެވެ. އެހެންކަމުން އަހަރެމެންގެ އުޅުމާއި ގުޅުންތަކުގައި އަބަދުވެސް މަޑުމައިތިރިކަން އިސްކުރަންވާނެއެވެ. މަޑުމައިތިރިކަމާއި އެކު އަންނަ އަނެއް ސިފަ އަކީ ކެތްތެރިކަމުގެ ސިފައެވެ. މަޑުމައިތިރި ކޮންމެ މީހަކީ އަދި ކެތްތެރި މީހަކަށް ނުވެދާނެއެވެ. އެހެންކަމުން މަޑުމައިިތިރިކަމުގެ ސިފަ ފުރިހަމަކުރުމަށްޓަކައި ކެތްތެރިކަން އިސްކުރަން ވާނެއެވެ.

ހިމޭންވެ ހަމަހިމޭން ކަމަކީ މަޑުމައިތިރި މީހާގެ ދިރިއުޅުމުގައި އަމާން ކަމެކެވެ. އަޑުގަދަ މީހާ ރުށް ގިނަ ވާނޭ ބުނާ ފަދައިން އަޑުމަޑު މީހެއްނަމަ، އޭނާގެ ރުށް މަދުވާނެއެވެ. ގިނަމަގުން ހިނގަންޏާ ގިނަ ވެޔޮ އުޅޭނެެއޭ ބުނާފަދައިން މަދު މަގުން ހިނގާނަމަ އުޅޭނެ ވެޔޮވެސް މަދުވާނެއެވެ. ކޮނުނު ކޮނުނުހެން ފަސްގިނަ ވާނޭ ބުނާ ފަދައިން ނުކޮނެ ހުންނަ ނަމަ ފަހެއް ގިނައެއް ނުވާނެއެވެ. އާދޭހެވެ! މަޑުމައިތިރި މީހާގެ އަޑު މަޑުވާނެއެވެ. އެހެންކަމުން އޭނާގެ އެކި އެކި ކަންކަން ނުވަތަ އޭނާގެ ވާހަކަ އެހެން މީހުން އެކި ތަންތަނުގައި ދައްކާލެއް މަދުވާނެއެވެ. މަޑުމައިތިރި މީހާއީ މާ ގިނަ މަގުތަކުގައި ހިނގާނޭ މީހެއް ނޫނެވެ. އެެހެންކަމުން އޭނާއަށް ފާރަވެރިވާ މީހުން މަދުވާނެއެވެ. އޭނާގެ ސަބަބުން އެހެން މީހުންނަށް ވާ އުނދަގޫތައް މަދުވާނެއެވެ. އޭނާއަަށް ކުރެވޭ ކުށްތަކުގެ އަދަދުވެސް މަދުވާނެއެވެ. މަޑުމައިތިރި މީހާއީ ތެޅިފޮޅޭނޭ އަދި މީހުންނާއި ޒުވާބުކޮށް އުޅޭނޭ މީހެއް ނޫނެވެ. އެހެންކަމުން އޭނާގެ އުނި ސިފަތަކާއި އޭނާއަށް ކުރެވިފައި ހުންނަ ކުށްތައް ބޭޒާރުވެ ފަޟީހަތް ވެގެނެއް ނުދާނެއެވެ.

އާދޭހެވެ! ކޮންމެ ހާލަތަކީ މަޑުމައިތިރި ވާންޖެހޭނޭ ހާލަތެއް ނޫނެވެ. ނަމަވެސް ޖުމުލަކޮށް ހުރިހާ ވަގުތަކީ މަޑުމައިތިރި ވަގުތުތަކެއް ކަމުގައި ހަދަންވާނެއެވެ. ތިމާގެ ފަރާތުން އެހެން މީހުންނަށް ތުރާއެއް ނުޖެހޭނީ އޭރުންނެވެ. އަދި އެހެން މީހުންގެ ފަރާތުން އުނދަގުލެއް، ތުރާލެއް ނުލިބޭނީވެސް އޭރުންނެވެ. ވިސްނާށެވެ! ކޮންމެ މީހަކީވެސް މަޑުމައިތިރިކަމަށް ލޯބިކުރާ މީހަކަށް ވާށެވެ! މާ އަޑުގަދަ ނުވާށެވެ. ގިނަ މަގުތަކުގައި ނުހިނގާށެވެ!