އިންސާނުންގެ ތެރެއިން އެންމެ މާތް އުންމަތަކީ މާތް މުޙައްމަދުގެފާނުންގެ އުންމަތެވެ. އަހަރެމެން މި ނިސްބަތްވަނީ މި އުންމަތަށެވެ. އިސްލާމުންނީ ނުވަތަ މުސްލިމުންނީ އަބަދުވެސް އަހަރެމެންގެ ދީނީ ޝިއާރުތައް އިސްކޮށް ކުރިއަށް ނެރޭ ބައެކެވެ. އަދި އެއްވެސް ގޮތަކުން، ދީނަށް އުނިކަމެއް ނުވަތަ ނުތާހިރު ބަހެއްވެސް ރައްދުވާން އެދޭނޭ ބައެއް ނޫނެވެ. މިއީ މިފަދަ މަތިވެރި ހާދިސާއެކެވެ. ޢުމަރުގެފާނުގެ ހިލާފަތުގައި ހިނގާ ދިޔަ އަސަރުން ފުރިގެންވާ ހާދިސާއެކެވެ. ތަފާތު އެތައް ދަރުސް ތަކަކާއި އެތައް ފޮތްތަކެއްގައި މިވާހަކަ އައިސްފައި ވެއެވެ.

ޢުމަރުގެފާނުގެ ހިލާފަތުގެ ދުވަސްވަރު، މާދުރު ހިސާބަކުން ދަތުރު ކުރަމުން އައި ޒުވާނަކު މަދީނާއަށް އައެވެ. އޭނާ އަކީ މުސްލިމެކެވެ. އަދި އެއީ މުސާފިރެކެވެ. މާނައަކީ ދަތުރުވެރިއެވެ. އަދި އެ ޒުވާނާއަކީ މަދީނާއަށް ބީރައްޓެހި ޒުވާނެކެވެ. ދަތުރު ކުރުމުގައި އެ ޒުވާނާ ސަވާރުވެ އިން ޖަމަލާއި އެކު، ދަތުރުގެ ވަރުބަލިކަން ފިލުވާލުމަށް އެ ޒުވާނާ މަދީނާގެ ރަށްބޭރުގައި މަޑުކޮށްލިއެވެ. މިގޮތަށް މަޑުކޮށްލި މަޑުކޮށްލުމުގައި މި ޒުވާނާއަށް ނިދުނެވެ. އެ ޒުވާނާއަށް ނިދިފައި އޮއްވާ އެޒުވާނާގެ ޖަމަލު، އެ ހިސާބުގައި ހުރި އެހެން މީހެއްގެ ޖަމަލުތަކެއްގެ ކައިރިއަށްގޮސް އެ ޖަމަލުތަކާއި އެކު ބައިވެރިވިއެވެ. އެއާއި އެކު އެ ޖަމަލުތަކުގެ ވެރިޔާގެ ގާތަށް ރުޅި އައިސް، އެ ޒުވާނާގެ ޖަމަލާއި ދިމާލަށް ހިލަގަނޑެއް އެއްލިއެވެ. އަދި އެ ހިލަގަނޑުން އަނިޔާވެ އެ ޒުވާނާގެ ޖަމަލު މަރުވިއެވެ.

ނިދިފާ އޮތް ޒުވާނާއަށް ހޭލެވުމާއި އެކު އޭނާގެ ޖަމަލު ހޯދަމުން ދިޔައެވެ. އޭނާއަށް ފެނުނީ އެ ޖަމަލުގެ މަރުވެފައިވާ މަސްގަނޑެވެ. އެ ޒުވާނާގެ ގާތަށް އައި ރުޅިން، ހިލަ ގަނޑެއް ނަގާ ޖަމަލުތަކުގެ ވެރިޔާއާއި ދިމާލަށް އެއްލިއެވެ. ދެން އޭނާގެ ބޮލުގައި ހިލަގަނޑުން ޖެހި އެ އަނިޔާގައި އޭނާވެސް މަރުވިއެވެ. އެއާއި އެކު އެތަނަށް އައި އިތުރު ދެ ޒުވާނަކު، މި ޒުވާނާ ގެންގޮސް ޢުމަރުގެ ފާނާއި ހަވާލުކުރައްވާފައިފިއެވެ. ފަހުން މި އައި ދެ ޒުވާނުންނަކީ ޖަމަލުތަކުގެ ވެރިޔާގެ ދެ ދަރިންނެވެ.

ޢުމަރުގެފާނުން އެ ޒުވާނާ ކުރެން އެކަން އެކަން ކުރިންތޯ ނުވަތަ ނޫންތޯ ސުވާލު ކުރުމުން އެ ޒުވާނާ އެއްބަސްވިއެވެ. އެއާއި އެކު އޭނާގެ މައްޗަށް މަރުގެ ހުކުމް ތަންފީޒު ކުރަން ހަލީފާ އަމުރު ކުރެެއްވިއެވެ.

މި ޒުވާނާގެ ފަރާތުން އިންކާރު ކުރުމުގެ ގަސްދެއް އަދި ޝައުގެއް ނެތް ނަމަވެސް، އެ ޒުވާނާ އެދުނީ މަރުގެ ހުކުމް ތަންފީޒު ކުރުން ލަސްކޮށްދިނުމަށެވެ. އެހެނީ އެ ޒުވާނާއަކީ ޔަތީމެއް ކަމަށް ވުމާއި އެކު އެ ޒުވާނާގެ ހަގަށް ހުރި ކޮށްކޮއަށް ބައްޕަގެ މުދާތަށް ލިބޭނޭ ގޮތަށް ހަމަ ޖައްސަން އެ ޒުވާނާ ބޭނުން ވާތީއެވެ. ދެން މި ޒުވާނާގެ މި އެދުމަށް ޢުމަރުގެފާނުން ރުހި ގަބޫލު ވިއެވެ. ނަމަވެސް ޝަރުތެއްގެ މަތިންނެވެ. މި ޒުވާނާއަކީ މަދީނާއަށް އައިސް ހުރި ދަތުރު ވެރިއެއް ކަމަށް ވުމާއި އެކު އެހެން ހިސާބެއްގެ މީހެއް ކަމުން ދުރަށް ދަތުރު ކުރާތީ، އެނބުރި ނާދެވިދާނެ ކަމަަށް ނުވަތަ ނައިސްފާނެ ކަމަށް އޭނާގެ މައްޗަަށް މީހަކު ޖާމިނުވާ ގޮތަށް ކުރި ޝަރުތެވެ.

މި ޒުވާނާ އަކީ ދަތުރު ވެރިއެއް ކަމަށްވެފާ، އޭނާ އަކީ މީގެ ކުރިން މަދީނާގެ އަހުލުވެރިން ދެކެފާ ނުވާ ބީރައްޓެއްސެއް ކަމުން، އަސްހާބު ބޭކަލުންނަށް އެ ޒުވާނާއަށް ޖާމިނުވާން ޖެހިލުންވިއެވެ. އެހެނީ އެ ޒުވާނާ ނައިސްފިނަމަ، ދެން މަރުގެ ހުކުމް ހިނގާނީ ޖާމިނުވި ފަރާތަަށް ކަމަށް ވާތީއެވެ.

އެކަކު އަނެކެއްގެ މޫނަށް ސަހާބީން ބަލަމުން ދިޔައެވެ. މި ޒުވާނާ އަކީ ކާކުކަން ނޭނގުމުން ޖާމިނިވާން ޖެހިލުން ވެފާވާ ހާލުގައެވެ. ނަމަވެސް ހަސާބީންގެ ތެރެއިން އެކަކު އަތް އުފުލާލުމަށްފަހު، ތިމަން އެ ޒުވާނާއަށް ޖާމިނުވެދާނަމޭ ދެންނެވިއެވެ. މި ސަހާބީ ބޭކަލަކީ އަބޫ ޟައްރުގެފާނެވެ. އެއާއި އެކު އެ ޒުވާނާއަށް ތިން ދުވަހުގެ މުހުލަތެއް ދިނުމަށްފަހު ފޮނުވާލެވުނެވެ.

ފުރަތަމަ ދުވަސް ފާއިތުވެ ހިނގައްޖެއެވެ. އެއްވެސް ހަބަރެއް ނެތެވެ. ދެވަނަ ދުވަސްވެސް ފާއިތުވެ ހިނގައްޖެއެވެ. ސަހާބީން ކަންބޮޑުވާން ފަށައިފިއެވެ. ތިންވަނަ ދުވަހު ފަތިސް ވަގުތާއި ހެނދުނުގެ ވަގުތު ފާއިތު ވެއްޖެއެވެ. މެންދުރު ވަގުތުފާއިތުވެ އަސުރުވަގުވެ މަޣްރިބު ވަގުތަށް ކުޑަތަންވަނީއެވެ. ހުރިހާ ސަހާބީންގެ ކިބައިން ހާސްކަމާއި ނުތަނަވަސްކަން ފެނިވަޑައިގަތެވެ. އިސާހިތަކު މި ޒުވާނާ އާއި އޭނާގެ ކޮށްކޮ ދުވެފައި އަބޫ ޞައްރުގެފާނުގެ އަރިހަށް އައެވެ. އެއާއި އެކު އެމީހުން ޢުމަރުގެފާނުގެފާނުގެ އަރިހަށް ވަޑައިދަތެވެ.

މި ޒުވާނާ އެނބުރި އައުމާއި އެކު ޢުމަރުގެފާނުން ހައިރާންވެ މި ޒުވާނާއަށް ސުވާލު ކުރިއެވެ. މި ޒުވާނާ ހޯދާ އަތުލުމަށްޓަކައި މީހަކު ނުފޮނުއްވާނޭކަން ޔަގީންވާ ހާލުގައިވެސް އެނބުރި އައީ ކީއްވެތޯއެވެ؟ ޖަވާބުގައި މި ޒުވާނާ ބުނީ މުސްލިމަކު ދޮގުހަދާ އޮޅުވާލައިގެން ކަންކަން ކުރަން ނޭދޭނެ ކަމަށެވެ. އަދި މުސްލިމަކު ހަދާ މަކަރަކުން އަނެއް މުސްލިމު އަޚާ ޤަތުލުވެދާން މުސްލިމަކު ނޭދޭނެއެވެ. މިއީ މި ޒުވާނާ އައި ސަބަބު ކަމުގައި މި ޒުވާނާ ބުންޏެވެ.

ދެން މި ޒުވާނާ ނައި ނަމަ އަބޫ ޟައްރުގެފާނުގެ ބޯ ބުރިކޮށްލެވޭނޭކަން އެނގި ހުރެ، މި ޒުވާނާ އަކީ ކާކުކަން ނޭނގި ހުރެ، މި ޒުވާނާއަށް ޖާމިނުވީ ކީއްވެތޯ އަބޫ ޟަައްރުގެފާނުން ކުރެން ޢުމަރުގެފާނު އެއްސެވިއެވެ. ޖަވާބުގައި އަބޫ ޟައްރުގެފާނު ވިދާޅުވީ މުސްލިމަކު އެހީ އަށް އެދި ދެންނެވުމުން، މުސްލިމުން އޭނާ އަށް އެހީނުވާ ބަޔަކު ކަމުގައި ވާން ނޭދޭތީ އޭނާއަށް އެހީތެރިވީ ކަމުގައެވެ. އަދި އޭނާ އެނބުރި ނައިނަމަ ތިމަންނާ މަރުވެގެންދާނީ ކުށެއް ނެތް ހާލު ޝަހީދެއްގެ ގޮތުގައިކަން ތިމަންނާއަށް އެނގޭތީއެވެ.

މިހިސާބަށް ދިޔައިރު ޢުމަރުގެފާނުން ހުންނެވީ ހައިރާންވެ އަޖައިބުވެފައެވެ. ނަމަވެސް މި ޒުވާނާގެ މަރުގެ ހުކުމް ތަންފީޒުކުރުމަށް ތައްޔާރުވަމުން ގެންދެވިއެވެ. ހަމަ އެވަގުުތު، މީސްތަކުންގެ ތެރެއިން ދެ ޒުވާނަކު ނުކުމެ، މި ޒުވާނާއަށް މައާފަށް އެދުވެނެ. އެ ދެ ޒުވާނުންނަކީ، މި ޒުވާނާ ގޮވައިގެން ޢުމަރުގެފާނުގެ އަރިހަށް އައި ދެމީހުންނެވެ. މަރުވި މީހާގެ ދެ ވާރިސުންނެވެ. ޢުމަރުގެފާނުން އެ ދެ ޒުވާނުންކުރެ، މި ޒުވާނާއަށް މާފަށް އެދުނީ ކީއްވެތޯ ސުވާލު ކުރިއެވެ. ދެން އެ ދެ ޒުވާނުން ޖަވާބުގައި ބުނީ މުސްލިމަކު މާފަށް އެމުން މާފް ނުކުރާ ބަޔަކު ކަމުގައި މުސްލިމުން ވާން ތިމަންނާމެން ނޭދޭ ކަމަށެވެ.

އެހިނދު މުޅި އެ ސަރައްހަދުގައި ވަނީ އުފާވެެރިކަމުގެ އަޑެވެ. އެއްބަޔަކުން އުފަލުން ރޮވޭއިރު، މުޅި ތަނުގައި ވަނީ ތަކުބީރުގެ އަޑެވެ. އާދޭހެވެ! މި ހާދިސާއިން އެނގިގެން މި ދަނީ މުސްލިމަކު، އިސްލާމް ދީނަށް އަދި މުސްލިމުންނަށްވެސް ހުތުރެއް ވެދާނޭ ކަމެއް ކޮށްގެން ނުވާނޭކަމެވެ. ނަމަވެސް އަހަރެމެންގެ މި ޒަމާނުގައި މިކަން އޮތީ މިހެން ތޯއެވެ. އަބަދުވެސް ޣައިރު ދީންތަކުގެ، ކުލަ މަޖަލުގައި ކުލަ ޖެއްސޭ މަންޒަރު މުސްލިމުންގެ ކިބައިން ފެންނަނީ ތަހުޒީބުގެ ނަމުގައެވެ. މިއީ ވިސްނާން ޖެހޭ މުހިންމު ކަމެކެވެ.