ތަޢުލީމަކީ އެ އެއްޗެއްގެ މައްޗަށް މުޅި އިންސާނާގެ ނަފުސު ލެނބިދާ އެއްޗެކެވެ. އެމީހަކަށް ލިބިހުރި ޢިލްމަކުން، އެމީހަކު މަޢުރިފާކޮށް ދެނެގެންފި ކޮންމެ ކަމަކީ އެމީހެއްގެ ހަޔާތުގެ މިސްރާބު ބެހެއްޓުމުގެ މައިގަނޑު އަސާސެވެ. އެހެންކަމުން ކޮންމެ މީހަކަށްވެސް ލިބިފައިވާ ތަޢުލީމަކީ މިފަދަ ހެޔޮވިސްނުން ތަކުން އިންސާނާގެ ވިސްނުމާ ހިޔާލު ތަނަވަސްކުރުވާ ޢިލްމަކަށް ވާން ޖެހޭނެއެވެ. ނަމަވެސް އަދުގެ ތަޢުލީމީ ނިޒާމުގައި، ބޮޑެތިވަމުން އަންނަ ކުދީންނަށް ފޯރުކޮށްދެވޭ ޢިލްމަކީ ވަރަށްބޮޑަށް، މަންޖަހެއްގެ ތެރޭގައި ގައިދު ވެފައިވާ އެއްޗަކަށް މި ވަނީ ވެފައެވެ. އެ މަންހަޖުގެ ބޭރުން ކުއްޖާއަށް ވިސްނުމުގެ ހިޔާލުވެސް ކުއްޖާއަށް ނުދޭ ކަހަލައެވެ.

މަދަރުސާއަށް ދަރިވަރުންނާއި މުދައްރިސުން ދަނީ ޢިލްމު ހޯދާ ލިބިގަތުމަށާއި ޢިލްމު ފޯރުކޮށްދިނުމަށެވެ. އެއްވެސް މުދައްރިސަކަށް އޭނާގެ އަމިއްލަ ޢިލްމެއް ދަރިވަރުންނަކަށް ފޯރުކޮށް ދިނުމެއް ނޯވެއެވެ. މުޅިން ވެސް ބުނެދީ ކިޔައިދޭން ޖެހެނީ މަންހަޖުގައި އޮތް އެއްޗެއްގެ ދެލިގަނޑާއި ކުލަގަނޑެވެ. އާދޭހެވެ! ތަޢުލީމީ ނިޒާމު، ގައިދު ކުރެވިފައި އޮތުމުން، ދަރިވަރުންގެ ވިސްނުމާ ހިޔާލުވެސް ވަނީ ގައިދު ކުރެވިފައެވެ. މަދަރުސާގައި ސުވާލާއި ޖަވާބު ކިޔައިދޭ އުސޫލަކީ މުޅިން ރަނގަޅު އުސޫލެއް ނޫނެވެ. އެހެނީ ސުވާލާއި ޖަވާބު ކިޔައި ދިނުމުން، ދެން އެ ސުވާލަކާއި މެދު އެ ދަރިވަރަކު އިތުރަށް ވިސްނާނޭ ފުރުސަތެއް ނުލިބޭނެއެވެ. އެ ދަރިވަރަކު އެ ސުވާލެއްގެޖަވާބު އެ އޮތް ގޮތަކަށް ދަސްކޮށް ގަބޫލުކޮށްގެން ހުންނާނެއެވެ. ނަމަވެސް އެ ސުވާލަކާއި މެދު ވިސްނުމުގެ ފުރުސަތު ދަރިވަރުންނަށް ދެވޭނަމަ، އެ ދަރިވަރުން އެސުވާލަކާއި މެދު ވިސްނާނެއެވެ. އަދި އެ ދަރިވަރުންގެ އަމިއްލަ ހިޔާލުތައް ތަނަވަސް ކުރާނެއެވެ.

ތަޢުލީމީ ދާއިރާގައި ތަފްސީލުކޮށްދިނުމާއި ބުނެދިނުމަކީ އެންމެ މުހިންމު އެއް ކަމެވެ. ނަމަވެސް އެ ތަފްސީލެއް ދިނުމުގެ ކުރީން ސުވާލުތަކެއް ކުރުން ވަރަށް ވެސް މުހިންމެވެ. އެހެނީ އެ ސުވާލުތަކުގެ ސަބަބުން އެ މައުލޫޢަކަށް ދަރިވަރުންގެ ސިކުނޑި ހުޅުވާލެވި ދަރިވަރުން އަމިއްލަ އަަށް އެ މައުލޫޢަކަށް އިންސާފު ކުރެވެން ފަށާނެއެވެ. އެއާއި އެކު ތަފާތު އެކި ހިޔާލުތައް އުފަން ވުމާއި އެކު އުފެއްދުންތެރި ވިސްނުންތަކެއް ތަރުތީބުވާނެއެވެ. މިއީ ހަގީގަތުގައި ތަޢުލީމީ ޖީލެއް ބިނާކުރުމުގައި ވަރަށްވެސް މުހިންމު ކަމެކެވެ.

ވަރަށް އާދައިގެ މިސާލަކަށް ޖެހިލާނަމެވެ. ގަހަކީ ކޮބާ ހެއްޔެވެ؟ މުދައްރިސް މަދަރުސާއަށް ގޮސް، ދަރިވަރުންނަށް ގަހަކީ ކޮބާތޯ ސުވާލު ކުރުމާއި އެކު މުދައްރިސް އެ ސުވާލުގެ ޖަވާބު ދެއެވެ. ގަހަކީ ގަހުގެ ދިރުންތަކުގެ ތެރެއިން ބޮޑެތިކޮށް ހެދޭ ވައްތަރުގެ ދިރުންތަކެއް ކަމަށް މުދައްރިސް ބުނެފިއެވެ. އެހިސާބުން ދަރިވަރަށް މަޖުބޫރުވީ ގަހުގެ ތަފްސީލުގައި މުދައްރިސް މި ދެއްވި ޖަވާބު ދަސްކުރާށެވެ. އިމްތިހާނުގައި ގަހުގެ ތައާރަފުގައި ލިޔަން މި ޖެހެނީ މުދައްރިސް މި ބުނި އެއްޗެކެވެ. އާދޭހެވެ! ދެން މި ވާ ގޮތަކީ އެ ގަހާއި މެދު، ދަރިވަރު ދެން އިތުރަކަށް ނުވިސްނައެވެ. ދަރިވަރުގެ އަމިއްލަ ހިޔާލެއް އެ ގަހުގެ މައްޗަކަށް ނުކުރެއެވެ. މަންހަޖުގައި އޮތް ޖަވާބު މުދައްރިސް ދެއްވީތީ އެ ޖަވާބުގައި ގައިދުވީއެވެ.

ނަމަވެސް ގަހުގެ ތައާރަފުގައި ދަރިވަރުންގެ ހިޔާލު ހޯދުމަށް މުދައްރިސް ފުރުސަތު ދޭނަމަ، ނުވަތަ ތަޢުލީމީ މަންހަޖުގެ ފުރުސަތު ދޭނަމަ، ގަހުގެ ތައާރަފުގައި ވަރަށް ތަފާތު ޖަވާބުތައް އުފެދިގެން އަންނާނެއެވެ. ރަނގަޅު ޖަވާބާއި ނުބައި ޖަވާބެވެ. މި ރަނގަޅު ޖަވާބުތައް މަސްހުނިވެ އަދި މާ ފުރިހަމަ ޖަވާބެއް ނެރެވިދާނެއެވެ. ދެން މިހިސާބުން މަންހަޖުގައި ގައިދު ނުވެ، ދަރިވަރުންވެސް ދެއްވީ ރަނގަޅު ޖަވާބުކަމުން އެއީވެސް އިމްތިހާނުގައި މާކުސްދެވޭ ރަނގަޅު ޖަވާބަކަށް ވާން ޖެހޭނެއެވެ. ގަހަކީ ފަތާއި ކޯޅިއާއި އަފި އަތްޕާއި ގަސްގަނޑު ހުންނަ އެއްޗެކޭ ބުނެވިދާނެއެވެ. ގަހަކީ ހިޔާ ލިބޭ އެއްޗެކޭ ބުނެވިދާނެއެވެ. ގަހަކީ މޭވާ އަޅާ އެއްޗެކޭވެސް ބުނެވިދާނެއެވެ. ކިތަންމެ ޖަވާބެކެވެ. މަންހަޖުގައި ނެތީތީވެ، އެ ޖަވާބު ނުބައި ކުރެވިގެން ނުވާނެއެވެ.

އާދޭހެވެ! ދަރިވަރުންނަށް ތޮށިގަނޑުން ބޭރަށް ވިސްނުމުގެ ފުރުސަތު ދޭން ވާނެއެވެ. އަދި އެ ދަރިވަރުން އެ ދޭ ޖަވާބުތައް މަންހަޖުގައި ނެތަސް، ރަނގަޅުނަމަ، ރަނގަޅުކަމަށް ބަލައިގަންނަން ވާނެއެވެ. ނޫންނަމަ ތަޢުލީމީ ނިޒާމު ކުރިއަރައިގެން ނުދާނެއެވެ. މަންހަޖުގައި ގައިދު ނުވެ، ތޮށިގަނޑުން ބޭރަށް ވިސްނުމުގެ ފުރުސަތު ދޭން ވާނެއެވެ. އުފެއްދުންތެރި ހިޔާލުތައް ބިނާކުރެވޭނީ އޭރުންނެވެ. ދަރިވަރުންގެ ބޮލުން "ޅަ" ވިސްނުން ފިލާނީ ވެސް އޭރުންނެވެ.