ގޭމު ކުޅުމާ ވީޑިއޯ ބެލުމާއި، ފަންނިއްޔާތުގެ ތަފާތު އެކި މަންސަތަކުގައި އަދުގެ ޅަ ޖީލު މިދަނީ ޖެހެމުންނެވެ. މޯބައިލް ފޯނުތަކާއި ލެޕްޓޮޕްތަކާއި އަދި މިނޫންވެސް މިފަދަ ފަންނިއްޔާތުގެ ވަސީލަތްތަކުގައެވެ. މި ތަކެއްޗަށް އެ ކުދީން ދޯޅަ ވުމާއި މި ތަކެއްޗަށް ދެވިހިފުމުގެ ނަތީޖާއަކީ އިޖްތިމާއި ގުޅުންތަކާއި ކަންކަމުގައި މި ކުދިން ބީރައްޓެހިވެގެން ދިއުމެވެ. މިއީ މިފަދަ ހަގީގީ ހާދިސާއެކެވެ. ޔޫޓިއުބުގައި މަޝްހޫރު ކުރު ފިލްމު އުފައްދާ "ޑަރމެން" ގެ ވީޑިއޯއަކަށް މީހަކު ކޮށްފައި އިން ކޮމެންޓެއްގެ ދަށުން އެމީހަކު ލާފައި އިން ލިންކެއްގައި އިން ވާހަކައެކެވެ.

ތުރުކީގައި އުޅުނު އުމުރުން 16 އަހަރުގެ ފިރިހެން ކުއްޖެއްގެ ވާހަކައެވެ. އެ ކުއްޖާގެ މައިން ބަފައިން އެ ކުއްޖާއަށް އެ ކުއްޖާ ބޭނުން އެއްޗެއް ފޯރުކޮށްދީ އުޅެއެވެ. ގޭގައި ގޭމު ކުޅޭނޭ ރަނގަޅު މާހައުލެއްވެސް ގާއިމު ކޮށްފައި ހުއްޓެވެ. އެ ކުއްޖާގެ ެައަބަދުމެ ކަމަކީ ގޭމުކުޅުމެވެ. މައިންބަފައިން ބައެއް ފަހަރަށް ނުގަބޫލު ނަމަވެސް އެ ކުއްޖާ ބުނަމުން އައީ މިއީ އާމް ދަނީ ހޯދޭނޭ މަގެއް ކަމުގައެވެ. ތެދެކެވެ. އެ ކުއްޖާ އެމަގުން ފައިސާ ހޯދަން ފެށިއެވެ. އެކަމުގައި ބެލެނިވެރިން އެއްބާރުލުން ވެސް ދެމުން ދިޔައެވެ.

އެކުއްޖާ ފަހުން ފަހުން އައިސް މިސްކިތައް ނަމާދަކަށް ނުދެއެވެ. ނަމަވެސް ރަނގަޅެވެ. ނަމާދުތައް ކުރެއެވެ. ގޭގައެވެ. ހުކުރު ދުވަހު ހުކުރަށް ދަނީ ދާ ހިތަކުން ނޫނެވެ. މީހުން ގިނަ ތަންތަނަށް ދާހިތް ނުވަނީ އެވެ. އެކަނި އިންނަން ބޭނުން ވަނީއެވެ. ގޭމު ކުޅެން ގިނައިރު އެކަނި އިންނާތީއެވެ. އެ ގޮތް އެކުއްޖާއަށް މާ ހިތްހަމަ ޖެހެއެވެ.

އަނެއްކާވެސް ދުވަސްތަކެއް ފަހެވެ. ހުކުރު ނަމާދަކަށް އެކުއްޖާ ނުދެއެވެ. ގެއިން ބޭރަށްވެސް ނުކުންނަނީ ސުކޫލަށް އެކަންޏެވެ. އެ ތަނުގައި ވެސް ވީއަވަހަކަށް ނިންމާފައި ގެއަށް އާދެވޭތޯ ބަލައެވެ. މީހުންނާއި އެކީ އެކުވެގެން ކަމެއް ކުރުމުގެ ރޫހެއް ޝައުގެއް ނުހުރެއެވެ. އަބަދުވެސް ބޭނުން ވަނީ އެކަނި ވާށެވެ. ބައެއް ޣައިރު މުސްލިމުން ބުނެދެނީ އެކަނި އެހެން އުޅުމާ އިޖްތިމާއީ ގުޅުންތަކުން ދުރުވުމަކީ މައްސަލައެއް ނޫން ކަމުގައެވެ. އެ ކުއްޖާގެ މައިންބަފައިންވެސް އެކަން އެގޮތަށް ގަބޫލު ކުރިއެވެ. ނަމަވެސް ހާލަތާއި އިހުސާސްތައް ބަދަލުވީ އެއްމެ ދުވަހަކުންނެވެ.

އެއީ އެ ގެއަށް އެ އާއިލާ މީހުން ޒިޔާރަތް ކުރި ދުވަހެކެވެ. އެ ކުއްޖާގެ މާމައާއި ކާފަ އާއި ބޮޑުދައިތައިންނާއި ބޮޑެބޭބެއިންނާއިންނާއި އެމީހުންގެ ދަރީންނާއެވެ. އެ ގޭތެރޭގައި ވަނީ އެ އާއިލާގެ އެންމެންގެ ހިނިތުންވުމާއި އުފާވެރިކަމުގެ ހިނިތުންވުމެވެ. ނަމަވެސް އެއްކަލަ ކުއްޖާ އެކަމާ އެެއްގޮތަކަށްވެސް ހިތްހަމައެއް ނުޖެހުނެވެ. ސަބަބަކަށް ވަނީ މީހުން ގިނަ ވުމެވެ. އެ މާހައުލު އެ ކުއްޖާއަށް ކަމު ނުދިޔައީއެވެ. ނަމަވެސް މީގެ ކުރިން އެ ކުއްޖާއަކީ އެހެން އުޅުނު ކުއްޖެއް ނޫނެވެ. އެމީހުން އެ ގެއަށް އައުމުން ބޮޑުބޭބެއިންނާއި ނުލާހިކު ސަކަރާތްޖަހާ އުޅުނު ކުއްޖެކެވެ. ނަމަވެސް މިއަދު މުޅިން ތަފާތެވެ.

ކޮޓަރިއަކުން ނުނިކުމެވެ. ގިވީމާ އަންނަނީ ރުޅިއެވެ. ލަދެއްނެތި، މާމައާއި ކާފައަށް އަޑުއިވޭވަރަށް، މީހުން ގިނައޭ އެކުއްޖާ ބުނަމުން ދިޔައެވެ. އެ ކުއްޖާގެ މައިންބަފައިންނަށް ރެއަކާލީ އެހިސާބުންނެވެ. އެކުއްޖާ އިޖްތިމާއީ ކަންކަމުން މުޅިންހެން ބަރީއަވެ، އެކަނި އެކަހެރި، އުޅުމެއްގައި، އަމިއްލަ ދުނިޔެއެއް ބިނާކުރަމުން އައުމުގެ ނަތީޖާއެވެ. އާދޭހެވެ. އެ ކުއްޖާ ފައިސާ ހޯދައެވެ. ނަމަވެސް އިޖްތިމާއީ އެއްވެސް ގުޅުމެއް އެކުއްޖާގެ ކިބަޔަކު ނެތެވެ. މީހުންނާ ކުރިމަތިލުމުގެ އެއްވެސް އުރައްޕަތެއް ނެތެވެ. 

އާދޭހެވެ! އަދުގެ ބެލެނިވެރިން މިކަމާއި ވިސްނާށެވެ. ގޭމުވެސް ކުޅެން ވާނެއެވެ. ޓީވީ ވެސް ބަލަން ވާނެއެވެ. ނަމަވެސް އިޖްތިމާއި ކަންކަމާއި އިންޖިތިމާއީ ގުޅުންތަކުން އެކުދިން ދުރުވިޔަ ނުދޭށެވެ. ގެއިން ބޭރަށް ނެއްލާށެވެ. މީހުންނާއި އެކީ ގުޅިގެން އުޅެން ދަސްކޮށްދޭށެވެ.