ގިނަ ބަޔަކު އެމީހެއްގެ ބަހަށް ކިޔަވަން ވުމަކީ އެމީހަކަށްިބޭ ވަރަށްބޮޑު ބާރު ވެރިކަމެކެވެ. މި ބާރުވެރިކަން، މާތް ﷲ ގެ އަމުރުފުޅުތަކާއި އެކު، ބައެއް އިންސާނުންގެ ދޫތަކުން ނުކުންނަ ބަސްތަކުގައި ވާކަން އަހަރެމެންނަށް ހާމަވެއެވެ. އިސްލާމްދީނުގައި ކިޔަމަންދެރިކަން ދަސްކޮށްދޭ ފިލާވަޅަކަށްވެސް މިކަން ފުދިގެން ހިނގައިދެއެވެ.

ވިސްނާލާށެވެ! ކޮންމެ ދުވަހަކު ފަސް ފަހަރަށް ގޮވާ ބަންގިއެވެ. އެނގޭހެއްޔެވެ! އެ ގޮވާލެވޭ ފަށުވި އިބާރާތްތަކަށް ކިތައް ކިތައް މީހުން ކިޔަމަންވޭތޯއެވެ. މުޅި ދުނިޔޭގެ އެކި ކަންކޮޅުތަކުގައެވެ. ބަންގީގެ އަޑަށް މިސްކިތްތަކަށް ޖަމާވަނީ ކިތައް ކިތައް މީހުން ތޯއެވެ. ޝަކުވާއެއް ކުރުމެއް ނެތިއެވެ. ހަމަ އެއާއި އެކު ވިސްނާލާށެވެ. ބަންގިއަށްފަހު، ގަމަތް ދެވޭ ހިނދު، ނުވަތަ ސަފަށް ގޮވާލެވޭހިނދު، އެތައް ބަޔަކު ސަފަށް އަރަމުން ދެއެވެ. މައްކާގެ ބިމަށް ވިސްނާލާށެވެ. ސަފަށް ގޮވާލެވުމާއި އެކު، އިޖާބަދީ އެތައް މިލިއަން މީހުން ހިމޭންވެ، ކިޔަމަންވެއެވެ. އިމާމާގެ ތަކުބީރުގެ އަޑާއި އެކު ހަށަމް ބަނދެއެވެ. އިމާމާއަށް ތަބާވެ، ނަމާދު ކުރެއެވެ. އެންމެ ފަހު ރަކުއަތާއި ޖެހެންދެން އިމާމާއި އެކުގައެވެ. އެންމެ އިމާމެކެވެ. އިމާމާއަށް ތަބާވާ މީހުންގެ އަދަދު މިލިއަނުން ގިނައެވެ.

އަދިވެސް ވިސްނާލާށެވެ! ރޯދަ މަހެވެ. ރޯދަ މަހަށް ހަނދު ފެނުނުކަން، ގައުމުތަކުގެ ދައުލަތްތަކުން ހާމަ ކުރުމާއި އެކު ހުރިހާ މުސްލިމުން، އެ މަހު ރޯދަ ހިފައެވެ. ފަޖުރުއްޞާދިގުގެ އަލިކަން ފާޅުވީއްސުރެ، އިރު އޮއްސުމާއި ޖެހެންދެން ކެއިން ބުއިމުން ދުރުވެގެން ތިބެއެވެ. އަދިވެސް ރޯދަ ގެއްލިދާ އެންމެހާ ކަންކަމުން ދުރުވެ ހުރެއެވެ. ރޯދަ މަސް ނިމެންދެނެވެ. ކިހާ ބޮޑު ކިޔަމަންތެރި ކަމެއް ހެއްޔެވެ؟ ކޮންފަދަ ގުދުރަތީ ބާރުވެރިކަމެއް ހެއްޔެވެ؟ ރޯދަ މަހު ފަތިސް ނަމާދު ބަންގި ގޮވަނީ އިމާމު މީހާއެވެ. އެއާއި އެކު އެތައް ބަޔަކު ކެއުންބުއިން ހުއްޓާލައެވެ. އަދި އިމާމާ މަޣްރިބް ނަމާދަށް ބަންގި ގޮވުމާއި އެކު ހަމަ އެ ހުރިހާ އެންމެން ރޯދަ ދޫކޮށްލައެވެ. އަގީދާގެ ކޮންފަދަ ބާރުވެރި ކަމެއް ހެއްޔެވެ؟ ކިޔަމަންތެރި ކަމުގައި ކޮންފަދަ އަޖައިބެއްކަހަލަ މިސާލެއް ހެއްޔެވެ؟

ވިސްނާށެވެ! މި ދުނިޔޭގައި އެފަދަ ބާރުވެރިކަމެއް އޮތީ ކޮން ވެރިއެއްގެ އަތުގާ ހެއްޔެވެ؟ އެމީހެއްގެ ބަހަށް އެތައް އެތައް ބަޔަކު ކިޔަމަން ކުރުމުގެ ބާރު އޮތީ ކާކު އަތުގާ ހެއްޔެވެ؟ ހިޔާލު ތަފާތު ވުމެެއް، ދެބަސް ވުމެއް، ޝަކުވާއެއް ނެތި އެ ކިޔަމަން ކޮށްލަނީ ކިހާ ބައެއް ހެއްޔެވެ؟ ވިސްނާލާށެވެ. މިއީ ކޮންފަދަ އަޖައިބެއް ކަހަލަ ކަމެއް ހެއްޔެވެ؟ މިއީ އިސްލާމް ދީނުގެ ރީތި ކަމާއި ފުރިހަމަ ކަމާއި، އަގީދާގެ ސާފުކަމާއި ކިޔަމަންތެރިކަމުގެ ކޮންފަދަ ފުރިހަމަ މިސާލެއް ހެއްޔެވެ؟ ނުވިސްނާ މީހަކަށް ހަމަ އެކައްޗެއްވެސް ނުވިސްނޭނެއެވެ!