މާބަނޑުވުމަކީ އަންހެނެއްގެ ހަޔާތުގައި ލިބޭނޭ ވަރަށްވެސް ބޮޑު އުފަލެކެވެ. އެކަމަކަށް ކޮންމެ އަންހެނަކުވެސް އެހާމެ ދިގު އިންތިޒާރެއް ކުރާނޭ ކަމެކެވެ. އެމީހުންގެ ހަޔާތުގައި އެއީ ވަރަށްވެސް ތަފާތު ދުވަސްތަކެކެވެ. އަންހެނަކަށް ނޫނީ މިއީ ބުނެދޭން ނުވަތަ ކިޔައިދޭން ފަސޭހަ އަދި ކުޅަދާނަ ކަމެއް ވެސް ނޫނެވެ. މާބަނޑު ދުވަސްވަރަކީ އަންހެނާގެ މިޒާޖަށާއި އުޅުމަށް ބޮޑެތި ބަދަލުތަކެއް އަންނާނޭ ދުވަސްވަރެކެވެ. އެހެންކަމުން މިއީ އަނެކުން ވަރަށްެވެސް ބޮޑަށް ސަމާލުވާން ޖެހޭނޭ ކަމެކެވެ.

"ބަނޑަށް ކިތައް މަސް؟"، "ހާދަ ބޮޑޭ ދޯ؟"، "ކީއްވެ އެހާ ކުޑައީ؟"، "ދެކުދިންތަ؟" މިއީ މާބަނޑު އަންހެނަކާ ދިމައިވުމުން ކޮށްލަން ވަރަށް ބޭނުން ސުވާލު ތަކެކެވެ. އަދި މިއަށްވުރެވެސް ގިނަ ކިތަންމެ ސުވާލެކެވެ. މިއީ އިންސާނީ ޠަބީއަތެކެވެ. ނަމަވެސް މިފަދައިން ސުވާލު ކުރާއިރު ވިސްނާލަން ޖެހޭ ވަރަށްގިނަ ކަންކަން ހުންނާނެއެވެ. 

އެއީ ސުވާލު ކުރެވޭ ރާގެވެ! ކޮންމެ ނިޔަތެއްގައި ބުނި ނަމަވެސް، ބުނެވޭ ރާގަކުން، މާބަނޑު އަންހެނާއަށް ނެގޭ މާނަ ގޯސްވެދާނެއެވެ. ނުވަތަ ކުރެވޭ އިހުސާސް ތަފާތު ވެދާނެއެވެ. އަދި ބައެއް މީހުން ގަސްތުގައިވެސް އެހެން އެސުވާލުތައް ކުރެއެވެ.

އާދޭހެވެ! މާބަނޑު ވުމާއި އެކު، އަންހެނާގެ ރަހިމުގައި ކުއްޖާ ބޮޑުވަމުން އަންނަ އައުމާއި އެކު، މައިމީހާގެ ބަނޑު ބޮޑުވާން ފަށައެވެ. މިފަދަައިން ބަނޑު ބޮޑުވާއިރު، ހުރިހާ އަންހެނުންގެ ބަނޑު ބޮޑުވާނީ އެއް މިންވަރަކަށް ނޫނެވެ. ނުވަތަ އެއް މިނަކަށް ނޫނެވެ. ބަނޑުގެ ބޮޑުމިނާއި ކުޑަމިނަކީ ބައެއް ހާލަތްތަކުގައި ސިއްހީ މައްސަލައަކާއި ގުޅިފައިވާ ކަމެއް ނަމަވެސް، އަނެއްބައި ފަހަރަށް އެއީ އެއްވެސް ސިއްހީ މަސަލައަކާއި ގުޅުމެއް ނެތި، އެ އަންހެނެއްގެ ހަށިގަނޑާއި ގުޅުން ހުންނަ ކަމެކެވެ. އެހެންކަމުން ބަނޑުގެ މިނަކީ އެއްވެސް ހާލެއްގައި "އުނިކަމެއް" ނޫނެވެ. ކޮންމެ ގޮތަކަށް މާބަނޑު އަންހެނާގެ ބަނޑު ބޮޑުވަމުން ދާނަމަވެސް އެއީ ވަރަށް "ލޯބި" ބަނޑެކެވެ.

އިސްވެބުނެވުނު ފަދައިން، މާބަނޑު އަންހެނުންނާއި ކުރެވޭ ސުވާލުތަކުގެ ސަބަބުން ބައެއް ފަހަރަށް އެ އަންހެނާ މާޔޫސްކަމުގެ ތެރެއަށް ދެއެވެ. ބަނޑުގެ މިނާ ބެހޭ ގޮތުން، ބޮޑޭ ނުވަތަ ކުޑައޭ ބުނެ، އިންސާފު ކުރެވޭ އިރު، މާބަނޑު މީހާގެ ހިތަށް އަރާނޭ އެއްޗަކާއިމެދު ވިސްނަން ވާނެއެވެ. މިޒާޖު ތަފާތުވާ ދުވަސްވަރެއް ކަމުން، ފަހަރުގައި ވަރަށް ފަސޭހައިން ހިތުގާ ޖެހޭގޮތްވެދާނެއެވެ. އެހެންކަމުން ތައުރީފު ކުރުމުގެ ގޮތުން ބުނާ ބަހެއް ނަމަވެސް، އޭނާއަށް ހިތްވަރުލިބޭނޭ ރާގެއްގައި ބުނުން ވަރަށްވެސް މުހިންމެވެ.

މާބަނޑު ދުވަސްވަރު، ހާސްކަމާއި މާޔޫސް ކަމަކީ ވަރަށް ފަސޭހައިން ކުރިމަތިވެދާ ކަމެކެވެ. އެހެންކަމުން އެފަދައިން ބުނެވޭ ބައެއް ވާހަކަތަކާއި ކުރެވޭ ސުވާލުތަކަކީ، އެ ސުވާލުތަކެއް ކުރެވޭ ގޮތަކުން މާބަނޑު އަންހެނާގެ ރިހޭ ފައި މައްޗަށް ފޮއެ ވެއްޓުން ފަދަ ކަމަކަށް ވެދާނެއެވެ. އެހެންކަމުން އެންމެ ބުއްދިވެރި ގޮތަކީ، އަންހެނާގެ ބަނޑަށް ބަލާ، ނުވަތަ ބަނޑުގެ "އުމުރާއި" މިނަށް ބަލާ، "އިންސާފުގެ" ބަސް ނުވަތަ ބަހެއް ރައްދު ނުކުރުމެވެ. ކޮންމެފަދަ ހާލެއްގައިވެސް ހިތްވަރު ލިބޭނޭ ގޮތަކަށް ނޫން ގޮތަކަށް ބަސް ނުބުނާށެވެ. އާދޭހެވެ! ކޮންމެ ބަނޑަކީވެސް ހަމަ "ލޯބި" ބަނޑެކެވެ. އެއީ ކޮންމެ މިނެއްގައި، ކޮންމެ ސިފައެއްގައި ހުރި ނަމަވެސް މެއެވެ. މާބަނޑު އަންހެނާ ހިތުގައި ޖެހޭނޭ ފަދަ ބަހެއް، އޭނާގެ ބަނޑާއި އަޅުވައިގެން ދުވަހަކުވެސް ނުބުނެ ވޭތޯ ބަލާށެވެ!