މީސްމީޑިޔާގައި އާންމުވި ވީޑިއޯއެކެވެ. އެއީ އެފްރިކާގެ ގައުމެއްގެ ފަގީރު އަވަށެއްގެ މަންޒަރެކެވެ. އެ މަންޒަރު ފެނި ހިތަށް، ތަފާފު އެކި އެކި އިހުސާސްތަކާއި ޖަޒުބާތުތައް އަރާ ފައިބަމުން ދެއެވެ. އެއީ އިންސާނުންގެ ބަޔަކު ފުނިޔޭގައި ހަމަ ހަގީގަތުގައިވެސް އުޅެމުންދާ ހާލުބާއޭ ހިތައް އަރައެވެ. އަހަރެމެންނަށް މިއަދު ލިބިފައި މިވާ ނިއުމަތްތަށް ގުނާ އަދަދު ނުކުރެވެއެވެ. އެއީ ފެނުގެ ނިއުމަތުން މަހުރޫމުވެފައިތިބި ބައެއްގެ ހިތްދަތި މަންޒަރެކެވެ.

އެ ވީޑިއޯގައި ފެންނަނީ އިންސާނިއްޔަތަށް މަސައްކަތްކޮށްދޭ، ޖަމުއިއްޔާގެ އެހީތެރިކަމާއެކު، އެ އަވަށަށް ފެނުގެ ބައުޒަރެއް ގާތްކުރާ ތަނެވެ. އެ ފެން ބައުޒަރު ގާތްކުރުމާއި އެކު ވަށަ ވަށައިގެން މީހުން ދުވެފާ، އެކަކަށްވުރެ އަނެކަކު ކުރިން، މަރަށް ފުރާނައަށް ދުވެފާ ދާ ފަދައިން އެ ބައުޒަރާ ދިމާލަށް ދެއެވެ. ވަކި ޖިންސެއް ނެތެވެ. ވަކި އުމުރެއްވެސް ނެތެވެ. ފިރިހެނުންނާއި އަންހެނުންނެވެ. ބޮޑެތި މީހުންނާއި ކުޑަކުދިންނެވެ. ކޮންމެ މީހަކުވެސް، އެމީހަކަށް ހިފުނު "ކަންވާރެއް" ހުފައިގެންނެވެ. ފެން އަޅާށެވެ. އެތިބަ ކުޑަކުދިންވެސް، އެކުދިންގެ އިސްކޮޅަށް ބުރެ ބޮޑެތި ހުސް ހަންހަން ހިފައިގެން ދުވެފާ ދެއެވެ. އެއްބަޔަކު ވެއްޓޭ މަންޒަރުވެސް ފެނެއެވެ. ވެއްޓުނަސް ތެދުވެ، ފެންއަޅަން ގެންދާ ސާމާނުކޮޅު ހިފައިގެން އަނެއްކާ ދުއްވައިގަނެއެވެ.

ފެންނަ މަޒަރާއި އެ ވީޑިއޯ ކިޔާ އެއްޗެއްގެ ތަރުޖަމާއިން އެނގޭ ގޮތުގައި އެ ބައުޒަރުގައި ހުރި ފެނުން، އެ ބައުޒަރުގެ ކައިރިއަށް ދިޔަ މީހުންގެ މުހުތާދުތަކުން ފުދިގެން ދާނީ ގާތްގަނޑަކަށް 55 އިންސައްތައެވެ. ދެން ބާކީ ތިބޭ މީހުންނަކީ ހުސް އަތާ އަންނަން ޖެހޭނޭ މީހުންނެވެ. އެއީ އެމީހުން ބުއިމަށް ހޯދާ ޖަމާކުރާ ފެނެވެ. ބުއިމަށާއި ކެއްކުމަށެވެ. ފެނަކީ ހަމަ އެކަނި ބުއިމަށާއި ކެއްކުމަށް ބޭނުންކުރާ އެއްޗެއް ހެއްޔެވެ؟ ފެނުން އިންސާނިއްޔަތަށް އަސާސީ އަދިވެސް ކިތަންމެ ހިދުމަތެއް ހުރެއެވެ. އެ ވީޑިއޯގައި ބުނާގޮތުން، އެ އަވަށުގެ މީހުންނަށް ފެން ލިބޭ ކޯރުގަނޑެއް އޮވެއެވެ. ނަމަވެސް އެއީ ނަޖިސް ފެނުގެ ކޯރެކެވެ. ކެމިކަލާއި މަޑާއި ކިސަޑާއި ކުންޏާއި އަދިވެސް އެނޫން ހަޑި ކިތަންމެ އެއްޗަކުން ތަޣައްޔަރުވެފައިވާ ކޯރެކެވެ. އެ އަވަށުގެ މީހުން އެ ފެން ބޭނުން ކުރަނީ ހަމަ އެކަނި ނަޖިހުން ތާހިރުވާށެވެ. ފެންވެސް ނުވެރޭހާ އެ ފެނުގެ ނަޖިސްކަން ބޮޑެވެ.

ވީޑިއޯ އިން ފެންނަ ގޮތުގައި އެއީ ވަރަށް ފަގީރު އަވަށެއްގެ ބައެކެޗެ. ލައިގެން ހުންނަ އަންނައުނު ބާވެ ކިލާވެފައެވެ. މީހުންނާއި ކުޑަކުދިންގެ މޫނާއި ގައިގަވެސް ހިރަފުހާއި ކިލާގަނޑުގަނޑު ހުރެއެވެ. ސާފު ފެނުގެ ނިއުމަތުން މަހުރޫމުވުމުން، ދެން ފެންވެރޭނޭ ގޮތެއްވެސް ނޯންނާނެތާއެވެ! މިއީ ވެސް އަހަރެމެން ކަހަަލަ، އިހުސާސްތަކާއި ހިއްސުތައް ސަލާމަތުން ހުރި ބަޔަކު މި ދުނިޔޭގައި އުޅޭ ހާލެވެ.

ވިސްނާށެވެ! ފިކުރު ކުރާށެވެ! އަހަރެމެންނަށް ލިބިފައިމިވާ ސާފު ފެނުގެ ނިއުމަތަކީ ޝުކުރުވެރިން ވަރަށްވެސް އައުލާކަން ބޮޑު ނިއުމަތެކެވެ. ހަޔާތުގެ ކޮންމެ ސާއަތެއްގައިވެސް އެ ނިއުމަތަށް ޝުކުރުވެރި ވާން ވާނެއެވެ. އެ އިލާހު އަހަރެމެންގެ ކިބައިން، ފެނުގެ ނިއުމަތް ނިގުޅައިގަނެފިނަމަ، އަހަރެމެން އުޅެން ޖެހޭނޭ ހާލު އިހުސާސްކޮއްލަ ބަލާށެވެ. މީގެ އަހަރުތަކެއް ކުރިން ރާއްޖޭގެ ވެރިކަން ކުރާ މާލެއިން ފެން ކެނޑުނު ހާދިސާ ހަނދާން ކޮށްލާށެވެ. ޖެހުނު ހާލު ވަޒަން ކޮށްބަލާށެވެ!