ހަމަހަމަ ކަމަށް އަބަދުވެސް އަހަރެމެން ގޮވާލަމުއެވެ. ކަންކަމުގައި ތަފާތުކުރުން ނައްތާލަން އަބަދުވެސް އަހަރެމެން ވަކާލާތު ކުރަމުއެވެ. ސަބަބަކަށް ވަނީ އަހަރެމެން ދަސްކުރި ދެލިގަނޑުގައި އެކަން އެގޮތަށް ލިޔެފައި ވުމެވެ. ޒަމާން ތަރައްގީވެ، ވިސްނުމާ ހިޔާލު ކުރުން މިއަދު އަހަރެމެން ދޫކޮށްލައިފިއެވެ. އަބަދުވެސް ކަންކުރަނީ ބަޔަކު ކަން ކުރާ ގޮތަކަށެވެ. ނުވަތަ ތަނަކު ލިޔެފައިވާ ގޮތަކަށެވެ. އަމިއްލަ ވިސްނުމުން ވިސްނާ، އަމިއްލަ ހިޔާލުން ހިޔާލުކޮށް އިންސާފު ކުރުމަކީ އަދު ނެތް ކަމެކެވެ. ހަމަހަމަ ކަމަށް ގޮވާލާ ވަކާލާތުކުރާ މީހުންވެސް ހަމަ އެފަދައެވެ. އެމީހުންވެސް ދެކެން ބޭނުންވަނީ ދެލިގަނޑާއި ސީދާ އަމަލުގައި ހަމަހަމަ ވާތަނެވެ. މަދުވަނީ ބުއްދި އާއި ވިސްނުމެވެ.

އާދޭހެވެ! އަހަރެމެންގެ އިސްލާމް ދީނަކީ ހަގީގަތުގައި ހަމަހަމަ ދީނެކޭ ނުބުނެވޭނެެެއެވެ. ނަމަވެސް މި ދީނުގެ ހުރިހާ ކަމެއްގައި އޮތީ އަދުލުވެެރިކަމާއި އިންސާފެވެ. އެހެނީ ހަމަ ގައިމު ތަފާތު ދެ ކަމެއްގައި ނުވަތަ ތަފާތު ދެ އެއްޗަކަށް އެއް ހުކުމެއް ނުވަތަ ހަމަހަމަ ހުކުމެއް ނުހިންގޭނެތީއެވެ. އެ ތަފާތު ދެ ކަމެއް ނުވަތަ އެއްޗެއްގެ މައްޗަށް ހިންގޭނީ އަދުލުވެރިކަމުގެ ހުކުމެވެ. އިންސާފުގެ ހުކުމެވެ. އެންމެ އާދައިގެ މިސާލަކަށް ބަލާލަމާ ހިނގާށެވެ. ދުވާލާ ރޭގަނޑެވެ. މުޅިން ތަފާތު ދެ ވަގުތެކެވެ. އެއް ގޮތް ވަނީ ހަމަ އެކަނި ވަގުތަކަށް އެ ދެ ހާލަތު ވާތީއެވެ. އެއް ވަގުތަކީ ދުވާލުގެ ވަގުތެވެ. އަނެއް ވަގުތަކީ ރޭގަނޑުގެ ވަގުތެވެ. ކަން އެހެން ހުރުމާއި އެކު، އެ ދެ ވަގުތަށް ހަމަހަމަ ހުކުމެއް އިންސާނުންނަށް ގާއިމު ކުރެވިދާނެ ހެއްޔެވެ! ހަމަ ގައިމު ނުވާނެއެވެ. ނަމަވެސް އިންސާނު ތަރުތީބު ކުރި އިންސާނީ އުސޫލުން އެ ދެ ވަގުތަށް ހިތަނީ އަދުލުވެރިކަމާއި އިންސާފުވެރި ކަމާއި އެކުގައެވެ.

ސިއްހީ ދާއިރަށްވެސް ބަލާލަމާ ހިނގާށެވެ. ހަސްފަތާލަކަށެވެ. ބަލި މީހުން އަބަދުވެސް ފަރުވާކުރަން ވަދެއެވެ. ބަލި މީހާގެ ބަލި ހާލަތަށް ރިއާޔަތްކޮށް ފަރުވާކުރެވެއެވެ. ހާލު ބޮޑު ނުވަތަ އެމަޖެންސީ މީހުންނަށް ވަގުތުން ފަރުވާ ކުރެވެއެވެ. އާންމު ބައްޔެއްނަމަ ކިޔުގައި ޖެހިގެން އެތައް ވަގުތަކާއި ދުވަހެއް ހޭދަވެއެވެ. މިއީ އަޅެ ހަމަހަމަ އުސޫލެއް ހެއްޔެވެ! ތަފާތެވެ! ތަފާތު ކުރަނީ އަދުލުވެެރިވެ، އިންސާފު ވުމަށްޓަކައެވެ. މިއީ ތަފާތުކުރުން ގެންގުޅުމެއް ނޫނެވެ. މިކަމާ ވަކާލާތުކޮށް، ސިއްހީ ހިދުމަތުގައި ތަފާތުކުރުން ގެންގުޅޭކަމަށް ބުނެ އަޑުގަދަ ކުރާ ބަޔަކު ނޫޅެއެވެ. އެހެނީ އެއީ ހަމަހަމަ ކަމަށްވުރެ ބޮޑަށް އަދުލުވެރިކަމާއި އިންސާފު، އެކަމެއްގެ މަށްޗަށް ބޭނުންތެރި ކަމެއް ކަމުގައި އެންމެންވެސް ދެކޭތީއެވެ.

އާދޭހެވެ! ސުކޫލު މާހައުލެވެ. ސުކޫލު މާހައުލުގައިވެސް، ބަސްއަހާ ކިޔަމަންތެރި ކުދިންނާއި ބަސްނާހާ ގޮތް ދޫނުކުރާ ވިޔާނުދާ ކުދިން އުޅޭނެއެވެ. މިއީ ކުދިންގެ ކިބައިގައި ހުރި ތަފާތު ކަމެއްކަން އަހަރެމެން އެންމެން ގަބޫލު ކުރަން އެބަ ޖެހެއެވެ. މޫނުމަތީ ޒުވާބުކުރާ ދަރިވަރަކާއި ކިޔަމަންތެރި ދަރިވަރަކީވެސް އިންސާނުން ކަމުގައި ވީނަމަވެސް އެއީ މުޅިން ތަފާތު ދެ ދަރިވަރެކެވެ. އެހެންކަމުން އެ ދެ ދަރިވަރުންނާ ދޭތެރޭ ހަމަހަމަ އުސޫލަކުން ކަން ކުރުމަކީ އިހުސާސްތަކާއި ޖަޒުބާތުތަައް ފުރިހަމައަށް ހުރި އިންސާނަކަށް ކުރެވޭނޭ ކަމެއް ނޫނެވެ. ނަމަވެސް އަދުލުވެރިކަމާއި އިންސާފުވެރި ކަމާއެކީ ކަން ކުރެވިދާނެއެވެ. ކަންކަން ކުރަންވެސް ޖެހޭނީ އެ މަގުންނެވެ. އެހެންކަމުން ސުކޫލު މާހައުލުގައި ދަރިވަރުންނާ ދޭތެރޭ ތަފާތުކުރުން ގެންގުޅެވޭނަމަ، އެ ގެންގުޅެވެނީ ތަފާތު ކުރުމުގެ ނިޔަތަކު ނޫނެވެ. އެއީ ދެކުދިންގެ ދެމެދުގައި އަދުލުވެރި ކަމާއި އިންސާފުވެރިކަމާއި އެކު އިންސާފު ކުރުމަށެވެ.

ހަމަހަމަ ކަމާއި އަދުލުވެރި ކަމަކީ މުޅިން ދެ ކަމެކެވެ. ތަފާތު ދެ އެއްޗަކަށް ނުވަގަ ދެ ކަމަކަށް ހަމަހަމަ ނިޔާއެއް ގެނައުމަކީ އިންސާފުވެރި ގޮތެއް ނޫނެވެ. ނަމަވެސް ތަފާތު ދެ އެއްޗަކަށް ނުވަތަ ކަމަކަކަށް އިންސާފު ލިބި ދާނީ އަދުލުވެރިވެވިގެންނެވެ. އަދުލުވެރިވުމަށް، ހަމަހަމަ ނުވެ ހިނގާ ކޮންމެ ކަމަކީ އިންސާފުގެ މަގަށް ވާސިލްވުމަށް ކުރެވޭ ކަންކަމެވެ. ވިސްނާ ބަޔަކަށް، ވިސްނޭނެއެވެ. ނަމަވެސް ހޯދާ ބަޔަކަށް ނުފެނިދާނެއެވެ. އެއީ މިއީ ދެލިން ލިޔެވިފައިވާ ކަންކަމެއް ނޫނެވެ.