މައިންބަފައިންނަކީ އަހަރެމެން މި ދުނިޔެއަށް އައުމުގެ ސަބަބެވެ. ވީއިރު އެމީހުންނަކީ އަހަރެމެންގެ ހަޔާތުން ބާކީކުރެވޭނޭ ބައެއްނޫނެވެ. މިއީ އަވަށްޓެރި ޕާކިސްތާނުގައި ހިނގާދިޔަ ހާދިސާއެކެވެ. އެ ގައުމުގެ މަޔަކާއި ދަރިއެއްގެ ވާހަކައެވެ. މިއީ އިބުރަތުން ފުރިގެންވާ ވާހަކައެކެވެ.

އެއީ ޒުވާން ފިރިހެނެކެވެ. ދިރިއުޅެމުން ދަނީ އޭނާގެ މުސްކުޅި މަންމައާއި އެކުގައެވެ. އޭނާގެ އުމުރުން 17 އަހަރުގައި އޭނާގެ ބައްޕަ ނިޔާވިއެވެ. އެ އާއިލާގައި ދެން އިތުރު އެހެން މީހަކު ނުހުރެއެވެ. އެ ޒުވާނާ މަތީ ތައުލީމު ހޯދަމުން މިއަދު އެ ދަނީ ކޮލެޖެއްގައެވެ. ވަޒީފާ އަދާކުރަމުން އެ ޒުވާނާ ކިޔަވަމުން ދަނީ ހިތްވަރާއި އެކުގައެވެ.

ކަންކަން ވަރަށް އަމާންކަމާއި އޮމާންކަމާއި އެކު ދަނިކޮށް، އެ ޒުވާނާއާއި ކޮލެޖުން ބައްދަލުވަނީ މުޅިން އާ ރައްޓެހިންތަކެކެވެ. ހަގީގަތުގައި އެ ޒުވާނާ ހަލާކުކުރުވި ބަޔަކީއެއީއެވެ. ބޮޑާކަމާއި ދުނިޔޭގެ ދަހިވެތިކަން އިސްކޮށް ތިބި އެ ރައްޓެހިންހެ ޖާދޫގައި އެ ޒުވާނާ ޖެހުނީ ވަރަށްވެސް އަވަހަށެވެ. އެ ޒުވާނާގެ އާއިލާގައި، އެ ޒުވާނާ އެކަނި ހުންނަކަމީ ލަދުވެތިކަމެއްކަމަށް އެ ރައްޓެހިން ވިސްނަދޭން އުޅުނެވެ. އެކަމުގެ މައްޗަށް އެ ޒުވާނާގެ މައިންބަފައިންނަށް ހަނގާކޮށް ހަދައެވެ. ކަން މިހެން ހުރިނަމަވެސް، އެ ޒުވާނާގެ ހިތުގައި އެ ރައްޓެހިން ހިފާފައި ތިބީ ވަރަށްގަދައަށެވެ. މަންމަ އާއި ބައްޕައާއި ދިމާލަށް ތަފާތު ފާޑު ފާޑުގެ އެއްޗެހި ކިޔަމުން ދާއިރު އެ ޒުވާނާގެ ރުޅި އިސްވަމުން ދިޔައީ އެ ޒުވާނާގެ މަންމަގެ މައްޗަށެވެ. އެ ބަސްތައް ބުނަމުން ދިޔަ ރައްޓެހިންނާ ދިމާލަށް، އެއްޗެކޭ ބުނެ، މަންމައާއި ބައްޕަގެ ދިފާއުގައި އެ ޒުވާނާ އެއްޗެކޭ ނުބުނެއެވެ.

ކަންތައްތައް މުޅިންހެން އެފުށް މިފުށަށް ޖެހެން ފެށިއެވެ. ކުރިން ނުހަނު ލޯބިން އުޅުނު އެ ދެމައިން މިއަދު އަނގައިންވެސް ނުބުނެއެވެ. އެ ޒުވާނާ، އޭނާގެ މަންމަ އަށް ނަފްރަތު ކުރަން ފެށިއެވެ. ރައްޓެހިންގެ ގޮތުގައި އިހްތިޔާރު ކުރި ބައެއްގެ ސުންޕާކަމުންނެވެ. އެ މަންމަ ތަކުރާރުކޮށް ކީއްވެގެންތޯ އެ ޒުވާނާކުރެން އަހަނީ ވޭނާއި ހިތްދަތިކަމުގައި ކަރުނަ އަޅަމުންނެވެ. ނަމަވެސް އެ ޒުވާނާ ކަހާތަން ހިރުވާވެސް ނުލައެވެ.

އާދައިގެ މަތިން އެއީވެސް އެ ދެމައިން ވާހަކަ ނުދައްކާ ހުރި ދުވަހެކެވެ. ކޮންމެވެސް ކަމަކު، ކޮލެޖު ލިޔުންތަކެއް ހޯދަން އެ ޒުވާނާ ގޭގެ ބޮޑު އަލަމާރި ހާވަން ފެށިއެވެ. އެ ޒުވާނާގެ ކޮލެޖު ލިޔުންތަކަކީ އެ ޒުވާނާގެ މަންމަ ފޮރުވާފާ ހުންނަ އެއްޗެހި ކަމުން އެހެން ފަހަރުތަކުގައި އެ މަންމަ އެތަކެތި ހޯދައިދެއެވެ. މިފަހަރު އެ ދެމައިން ވާހަކަ ނުދައްކާތީ، އެ ލިޔުންތައް ހޯދަން އެ ޒުވާނާ އެކަނި، އެ އަލަމާރި ހާވަން ފެށިއެވެ. ނުދަމާ ވަތްގަނޑެއް ނެތެވެ.

އެ ޒުވާނާއަށް ފެނުނީ އެ މަންމަގެ ޑަކްޓަރު ލިޔުންތަކެކެވެ. މަންމަ ދެކެ ހިތްހަމަ ނުޖެހިފައި ހުރި ނަމަވެސް އެ ލިޔުންތައް ކިޔާލުމުގެ ޝައުގު އެ ޒުވާނާގެ އުފެދިއްޖެއެވެ. އެހެނީ މީގެ ކުރިން މަންމަގެ އެފަދަ ލިޔުމެއް އޭނާއަށް ފެނިފައި ނުވާތީއެވެ. އެ ލިޔުމުގައި ވަނީ އެ ޒުވާނާ އުފަންވި ތާރީހުގައި އެ މަންމަ ވެސް އޮޕަރޭޝަނެއް ކޮށްފައިވާ ލިޔުމެކެވެ. އެއީ ސިޒޭރިއަން އާއި އޭގެ އިތުރުން ހިސްޓެރެކްޓޮމީ ނަމަކަށް ކިޔާ އޮޕަރޭޝަނެކެވެ. ހިސްޓެރެކްޓޮމީ ހަދަން ޖެހުނު ސަބަބަކަށް ލިޔެފައި ވަނީ ކުއްޖާ މައިމީހާގެ ރަހިމުގައި އޮވެ، ސިޒޭރިއަން ހެދުމަށް އުޅެނިކޮށް މައިމީހާގެ ރަހިމަށް، އެ ކުއްޖާގެ ފަރާތުން ލިބުނު އަނިޔާ އަކާއި ގުޅިގެން ލޭ މަނާނުވުމުން ކަމަށެވެ. އެ ޒުވާނާއަށް އޭރުގައި ހިސްޓެރެކްޓޮމީ އަކީ ކޮބައި ކަމެއް ނޭނގުނެވެ. ވަގުތުން ފޯނު ނަގާ ގޫގުލްގައި ލިޔެ ހޯދާލިއެވެ. އެ ޒުވާނާގެ ދެލޯ ކަރުނުން ފޯވިއެވެ.

މަންމަ އާއި ދޭތެރޭ އުފެދުނު ރުޅިވެެރިކަމާއި ނަފްރަތަކަށްވީ އާއިލާގައި އެ ޒުވާނާ އެކަނި ހުންނަން ވުމުން އެކަމާ ރައްޓެހިން ކުރި މަލާމާތެވެ. ނަމަވެސް އެކަމުގެ ހަގީގަތެއް އެ ޒުވާނާއަކަށް ނޭނގެއެވެ. މަންމަ ނުބުނާތީއެވެ. ނަމަވެސް އެ ޒުވާނާއަށް މިއަދު ހަގީގަތް އެނގިއްޖެއެވެ. އެ ޒުވާނާ ވިހެއުމުގެ ތެރޭގައި އެ މަންމަގެ ރަހިމަށް ލިބުނު އަނިޔާއެއްގެ ސަބަބުން ރަހިމު ނަގަން ޖެހުނެވެ. އެކަމުގައި އެ މަންމަގެ ކުށެއް ނެތެވެ. އެ މަންމަ ދެކެ ހިތްހަމަ ނުޖެހެވެންވީ ކުޑަނަމަވެސް ސަބަބެއް ނެތެވެ.

އާދޭހެވެ! ތިމާގެ މަންމައާއި ދޭތެރޭ ކުޑަނަވެސް ހިތްބުރަކަމެއް ނުބާއްވާށެވެ. ހިތްހަމަ ނުޖެހިގެން ބަސް ނުބުނާށެވެ. އެކުވެރި ރައްޓެހިންގެ ގޮތުގައި އިހްތިޔާރުކުރާ މީހުންނަކީ ކޮންބައެއްތޯ ރަނަގަޅަށް ބަލާށެވެ. ނުބައި އެކުވެރިންނަކީ އިންސާނާގެ ހަލާކެވެ! މި ދުނިޔޭގައިވެސް އަދި ކިއެއް އާހިރަތުގައިވެސް މެއެވެ.