މީސް މީޑިޔާގައި ތަފާތު އެކި މަންޒަރުތަކާއި ވީޑިއޯތައް، އޭގެ އަސްލު ނޭނގޭ ހާލުގައިވެސް އާންމު ވަމުން ދެއެވެ. އެހެންކަމުން އެއިން ކޮންމެ މަންޒަރަކާއި ތަސްވީރަކާއި ވީޑިއޯއެއްގެ ހަގީގަތެއް އަހަރެމެންނަކަށް ސާފުކޮށެއް ނޭނގެއެވެ. ކަން އޮތީ މިހެން ކަމުން އެފަދަ ވީޑިއޯތަކާއި ފޮޓޯތަކުގެ ވާހަކަ އާންމުގޮތެއްގައި ދައްކައެއް ނޫޅެއެވެ. ނަމަވެސް މިއީ އެ ވީޑިއޯއެއް ތަކުރާރުކޮށް އެތައް ވިއުގަ އަކުން ހިއްސާކޮށްފައިވާ ވީޑިއޯއެކެވެ. ވީޑިއޯގެ ސައްހަކަމާއި މެދު ހިތުގައި ޔަގީންކަން ނެތް ނަމަވެސް މި ވީޑިއޯއިން ފެންނަ މަންޒަރަކީ އަހަރެމެން ވިސްނާ އެކަމުގެ މައްޗަށް ނަޒަރު ހިންގާލުން މުހިންމު މަންޒަރު ތަކެކެވެ. އެހެންކަމުން މި ވީޑިއޯގެ ވާހަކަ ކުރު ގޮތަކަށް މި ލިޔުމުގައި ހިމަނާލާނަމެވެ.

އެ ވީޑިއޯގައި ފެންނަނީ ޣައިރު މުސްލިމު ފިރިހެނެކެވެ. ކޮންމެވެސް ޣައިރު މުސްލިމު ގައުމެއްގެ މަގެއްގެ މަތީގައި، އެއްވެ ތިބި ބައެއްގެ ކުރިމަތީގައި، ކީރިތި ޤުރުއާނުގައި އަލިފާން ޖަހާ އަންދާލާތަން އެ ވީޑިއޯއިން ފެނެއެވެ. މުސްހަފުގައި ރޯ ކޮށްލުމަށްފަހު ބިންމައްޗަށް އެއްލާލާ މަންޒަރު ފެނެއެވެ. ބައެއް ޣައިރު މުސްލިމުންނީ އިސްލާމް ދީނަށާއި މި ދީނުގެ އަހުލުންނާއި މިސްކިތްތަކާއި ކީރިތި ޤުރުއާނަށް ވަރަށް ނަފްރަތު ކުރާ ބައެކެވެ. އަނެއްބައި ޣައިރު މުސްލިމުންނީ އަގީދާގެ މި ތަފާފު ތަކާއި އެކުގައި ނަމަވެސް އިސްލާމުންނަށާއި މުސްލިމުންނަށް އިހްތިރާމް ކުރާ ބައެކެވެ.

ކޮންމެއަކަސް އެ މުސްހަފުގައި ރޯކޮށް އެއްލާލުމަށްފަހު އެ ފިރިހެންމީހާ އަލިފާނުގެ ކުޅިވަރު ކުޅޭތަން ފެނެއެވެ. ދަނޑިކޮޅެއްގެ އެއްކޮޅުގައި ރޯކޮށް، އަނގައިގެ ތެރެއަށް ބަނގުރާ ފަދަ އަލިފާން އިފާ ދިޔާ އެއްޗެއް އެޅުމަށް ފަހު އެ ރޯކޮށްގެން ހުރި ދަނޑިކޮޅުގައި ހުރި ހުޅުކޮޅަށް ފުމެ ހަދައެވެ. ދެން ފެންނަނީ އެ މީހާގެ އަނގަ ތެރޭގައި އަލިފާން ހިފާ މަންޒަރެވެ. އެހިސާބުން އެ ދަނޑިގަނޑު އެއްލާލާ، އަނގަ އާއި މޫނުމަތީގައި ހުރި ހުޅުގަނޑު ނިވާލަން އޭނާ އަތްކާތަން ފެނެއެވެ. ދެކޮޅު ދެކޮޅަށް ތެޅި ތެޅިފަ ބިންމައްޗަށް ވެއްޓޭ މަންޒަރުވެސް ފެނެއެވެ. އެހިސާބުން އެ ވީޑިއޯ ނިމެއެވެ.

އާދޭހެވެ! ކުރިންވެސް ބުނިހެން އެ ވީޑިއޯގެ ސައްހަ ކަމެއް ޔަގީނެއް ނުކުރެވެއެވެ. ނަމަވެސް އަހަރެމެން މުސްލިމުންނަށް ވީ ހިނދު، މި ވީޑިއޯއިން އިބުރަތް ހާސިލް ކުރަން ޖެހެއެވެ. ކީރިތި ޤުރުއާނަށް އިހާނެތިކޮށް ހިތުމަކީ ފާފައެކެވެ. އެއީ މާތް ﷲ ގެ ކަލާމްފުޅެވެ. އެ އިލާހުގެ ބަސްފުޅުތަކެވެ. މުސްހަފު މޭގައި ޖައްސައިގެން ގެންގުޅުމާއި، ވުޟޫކޮށްގެން މުސްހަފުގައި އަތްލުމާއި، އިށީނދެ އަދި އޮށޯވެ ހަދާ ތަންތަނުގައި މުސްހަފު ނުބޭއްވުމާއި، ބިންމަތީގައި ނު ބޭއްވުމާއި، ކޮޅުފައި ނޭރުމާއި، އުކަ އުކާފައި ނުގެންގުޅުންފަދަ ކިތަންމެ އަދަބެއް އެ މުސްހަފަށް ލިބިގެން ވެއެވެ. ބައުވެ ވީރާނާ ވެއްޖެނަމަ ނައްތާލަން ވެސް އޮންނަނީ އަންދާލައިގެންނާއި ކަނޑު ފައްތައިގެން ކަމަށް ބައެއް އިލްމުވެރިން ވިދާޅުވެއެވެ. އިސްވެ ފާހަގަ ކުރެވުނު ވީޑިއޯގައި، އެ މީހަކު މުސްހަފު އަންދާލަނީ ބައުވެގެނެއް ނޫނެވެ. އިހާނެތިކޮށް ހިތުމާއި ގެއްލުމެއް ދިނުމަށެވެ. 

ވިސްނާށެވެ! އެ ފޮތަށް ގެއްލުމެއް ދިން މީހަކަށް އެ ލިބުނު ގެއްލުން، ނުވަތަ އަނިޔާ ދެކިބަލާށެވެ. މާތް ﷲ ގެ ހުސްޠާހިރުވަންތަ ކަމާއެވެ. އެ ކަލާނގެއީ ހުރިހާ ކަމަކަށް ކުޅަދުންވަންތަ އިލާހެވެ. ވިސްނާ ފިކުރު ކުރާ ބަޔަކަށް ނޫނީ މި ދުނިޔެ މަތީގައި އެއްވެސް މޮޅުކަމެއް ނުވެއެވެ.