ދަރިންނަކީ އަބަދުވެސް އެމީހުންގެ މައިންބަފައިންގެ ކުރިމަތީގައި ޅަ ދަރިންތަކެކެވެ. އިސްކޮޅުން ކިތަންމެ ބޮޑުވީ ކަމުގައި ވިޔަސް، ހަށިގަނޑުން ކިތަންމެ ބިޔަވިޔަސް، އަދި މާލީގޮތުން ކިތަންމެ ތަނަވަސްވެފާ ވީ ނަމަވެސް މެއެވެ. އަދި އެ ދަރީންގެ ހަޔާތުގައި އެ ދަރީންނަށް ދިމާވާ ހުރިހާ ދައްޗަކާއި ތުރާލެއްގައި އެ ދަރިންނާއި އެންމެ ގާތްކޮށް އުޅެދޭނެ ފަރާތަކީވެސް ޝައްކެއްނެތް ގޮތުގައި އެ ދަރީންގެ މައިންބަފައިންނެވެ. ވީއިރު އެ މައިންބަފައިން އެ ދަރިންނަށްޓަކާ ކުރާ އުންމީދާއި ދެވޭ ހިތްވަރަކީ އެ ދަރިންގެ ހަޔާތުގައި ވަރަށްވެސް އަގުބޮޑު އެއްޗެކެވެ.

މައިންބަފައިން ވާން ވާނީ އަބަދުވެސް، އެމީހުންގެ ދަރިންނަށް ހިތްވަރުދޭ ބަޔަކަށެވެ. އެކުދިން ކުރާ ކޮންމެ ކަމެއްގައެވެ. ގޯސް ނުވަތަ ވިޔާނުދާ ކަންކަމުގައި ހަގީގަތުގައި ދޭންވީ ހިތްވަރެވެ. ކޮންގޮތަކަށް ތޯއެވެ؟ އެފަދަ ވިޔާނުދާ ކަންކަމުގައި ދޭންވީ ހިތްވަރަކީ ހެޔޮމަގަށް އައުމަށް ދެވޭ ހިތްވަރެވެ. އެދަރިންނަށް ކުރެވޭ ކުށްތަކާއި ހެދޭ ގޯސްތަކުން އެކުދިން ދުރުވުމަށް މައިންބަފައިން ދޭ ހިތްވަރަކީ ވަރަށްވެސް ބޮޑު ބާރެކެވެ. ނަމަވެސް އަހަރެމެންގެ ގިނަ މައިންބަފައިންނަށް ވާގޮތަކީ ދަރިން އެފަދަ ވިޔާނުދާ ކަމެއް ތަކުރާރު ކުރާނަމަ، އެކުދިންނާ ދިމާލަށް އަޑު އިސްކޮށް އަތް އިސްކުރެވުމެވެ. "ބުނާ އެއްޗެއް ދުވަހަކުވެސް އަޑެއް ނީވޭނޭ..." ، "ދުވަހަކުވެސް އިސްލާހެއް ނުވާނޭ..." ، "ދުވަހަކުވެސް ކަމެއް ރަނގަޅަކަށް ނުކުރާނޭ.. ނުވަތަ ނުކުރެވޭނޭ..." މިފަދަ ކިތަންމެ ކިތަންމެ ބަހެއް، މައިންބަފައިން، އެމީހުންގެ ދަރިންނާ މުޚާތަކުބޮށް ބުނެއެވެ. މިއީ ހަގީގަތުގައި ދަރިން އިސްލާހުވާން، ނުވަތަ ކުރިއަށްދާން އެޅޭ ވަރަށްބޮޑު ހުރަހެކެވެ.

އޭގެ ބަދަލުގައި މައިންބަފައިންނަކީ އަބަދުވެސް  ދަރިންނަށް ހިތްވަރުދޭ ބަޔަކު ކަމުގައި ވަނީނަމަ ދަރިން ކުރިއަރާ ދިއުމަކީ ވަރަށް ފަސޭހަ ކަމެކެވެ. މައިންބަފައިން ދަރިންނަޓަކައި ބުނާ ތައުރީފުގެ ބަސްތަކަކީ އޭގެ ރަހަ މީރު މޭވާތަކެކެވެ. މައިންބަފައިން ދަރިންނަށް ދޭ ހިތްވަރަކީ އެ ދަރިންގެ ހަޔާތުގައި ވަރަށް އަގުބޮޑު އެއްޗެކެވެ. މައިވަންތަކަމާއި ބަފާވަންތަކަމުގެ ގުޅުމުގެ ބާރު، މިކަންކަމުން ހާމަވެއެވެ.

މައިންބަފައިންނަކީ އެ ދަރިފުޅު ނެތުމުގެ ތެރެއިން މި ދުނިޔެއަށް އައުމަށް މާތް ﷲ މެދުވެރި ކުރެއްވި ފަރާތެވެ. އެ ދެމީހުންގެ އަތްތިލަ މަތީ އެ ދަރިފުޅު ބޮޑުވަމުން އައިސް މިނިވަން ޝަހުސަކަށް ވީ ހިނދުވެސް، އެ ދަރިފުޅުގެ އުޅުމާ ގުޅުން، ސުލޫކާއި މިޒާޖު އެންމެ ރަނގަޅަށް އެނގޭނޭ އެއް ބަޔަކީ އެ ދަރިންގެ މައިންބަފައިންނެވެ. މައިންބަފައިން ދަރިންނަށް ދޭ ހިތްވަރުގައި ޔަގީންކަމާއި އުންމީދު އެކުލެވިގެން ވެއެވެ. ދަރިންނަށް ކުރެވޭނެ އިހުސާސަކީ މައިންބަފައިންނަށް، އެ ދަރިން ރަނގަޅަށް އެނގޭކަމުގެ އިހުސާސެވެ. ދަރިންނަށް ކުރެވޭނޭ ކަންކަމާއި ނުކުރެވޭނޭ ކަންކަން މައިންބަފައިންނަށް އެނގެއެވެ. ވީއިރު، މައިންބަފައިން ދޭ ހިތްވަރުގައި ވަނީ ޔަގީންކަމެވެ. އިތުބާރެވެ.

ދަރިއެއްގެ ހަޔާތުގައި މަޔަކު ނުވަތަ ބަފަޔަކު ދޭ ހިތްވަރަކީ އޭގެ އަގު ނުކުރެވޭ ފަދަ ބޮޑު ނިޢުމަތެކެވެ. ދަރިންގެ ހަޔާތް ބާއްޖަވެރިކޮށް އުޖާލާކުރުމަށް މައިންބަފައިންގެ ހިތްވަރު ނުހަނު ބޭނުންވެއެވެ. ވީހާހާވެސް ގިނައިންނެވެ.