އިންސާނުން ކުރާ ކުށްތަކަކީ އެހެން އިންސާނުންނަށާއި ނުވަތަ މުޅި ދުނިޔެއަށް ހާމަވާ ކުށްތަކެއް ނޫނެވެ. ކޮންމެވެސް ސަބަބަކަށްޓަކައި އެމީހުންގެ ބައެއް ކުށްތައް ވަނީ ވަންހަނާ ވެފައެވެ. އެފަދައިން އިންސާނާ ކުރާ ނުވަތަ ކުރެވޭ ބައެއް ކުށްތައް އެފަދައިން ހާމަވެ އާންމު ނުވުމުން އެކަމުގެ މާނަ އަކީ އެ ކުށެއް ރައްދުވާ މީހާގެ ކިބައިން މައާފަށް ނޭދި ދޫކޮށްލުމެއް ނޫނެވެ. ނުވަތަ ތައުބާ ނުވެ ދޫކޮށްލުމެއް ވެސް ނޫނެވެ. އެފަދަ ކުށްތަކުގައި އިންސާނާ ފަލީހަތްނުކުރައްވާ ދޫކޮށްލައްވާފައި އެ ވަނީ ކޮންމެވެސް ހިކުމަތަކަށްޓަކައެވެ.

މި ލިޔުމުގައި މި ބަލާލަނީ ތުރުކީގެ ވިޔާފާރި ވެރިއަކަށް ދިމައިވި ހަގީގީ ހާދިސާއެއްގެ ވާހަކައެވެ. މިއީ އިސްވެ ބުނެވުނު ފަދަ ކުށަކަށް، އެ ކުށް ކުރެވުނު މީހާ މައާފަށް އެދުނު ރީތި ގޮތުގެ ވާހަކައެވެ. ތުރުކީގެ އެ ވިޔަފާރި ވެރި އަކީ އާދައިގެ ކަންމަތީ ފިހާރައެއް ހިންގާ މީހެކެވެ. އެއްދުވަހަކު އޭނާ ނިދާ ހޭލާ، ގެއިން ބޭރަށް ނުކުތް ވަގުތު، ގޭގެ ދޮރުމަތީގައި އޮތް ސިޓީ އުރައެއް ފެނުނެވެ. އެއީ އާންމުކޮށް ތުރުކީގައި ސިޓީފަދަ ތަކެތި ބަހާ އުޅޭ ގޮތެއްވެސް ނޫނެވެ. ނަމަވެސް އެފަދައިން ސިޓީއުރައެއް އޮތުމުން އެކަމާ އެ ވިޔަފާރިވެރިޔާ ހައިރާންވިއެވެ.

ކޮންމެއަކަސް އެ ސިޓީއުރަ ނަގާ އެ ކަނޑާލިއެވެ. އޭގައި ހުރި އެއްޗެއް ބަލާލިއެވެ. އެ ސިޓީ އުރައިވަނީ ފައިސާއެވެ. އޭގައި އޮތީ އެއްހާސް ލީރާގެ ދެ ގަނޑާއި ސަތޭކަ ލީރާގެ އެއް ގަނޑެވެ. އެ ވިޔަފާރި ވެރިއަށް އެގޮތަށް ފައިސާ ދޭން ޖެހޭ މީހަކު ހުރި ކަމެއް ނުވަތަ އެއްވެސް ގޮތަކުން ދަރަނިވެރިވެފައިވާ މީހަކު ނެތެވެ. އަދި ފައިސާގެ އެހީ އެ ވިޔަފާރި ވެރިޔާއަށް ބޭނުން ނުވާނޭކަން އެ ސަހަރުގެ އެއްމެނަށްވެސް އިނގޭނެއެވެ. ވީ އިރު އެ ސިޓީ އުރައިގެ ހަގީގަތް ހޯދުމަށް އެ ވިޔަފާރިވެރިޔާ ޝައުގުވެރިވިއެވެ.

ހުސް ސިޓީ އުރައިގެ ތެރެއަށް ފައިސާތައް އަނބުރާ ލާން ސިޓީއުރަ ފޭކޮށްލި ވަގުތު، ސިޓީ އުރައިގެ ތެރޭގައި އިތުރު ކަރުދާސްކޮޅެއް އޮތެވެ. އޭނާ އެ ކަރުދާސްކޮޅު ނަގާ ހުޅުވާލާ، އޭގާ ލިޔެފައިވާ އެއްޗެއް ކިޔާލިއެވެ. އޭގައި ލިޔެފައި އޮތެވެ. "ތިބާގެ ފިހާރަގަނޑުން، އަހަރެން ކުޑައިރު، އަހަރެންގެ ބައްޕަ އާއި އެކު ވަރަށް ގިނައިން، ވަގަށް އެއްޗެހި ނެގީމެވެ. އަހަރެމެންނަކީ އޭރު މަގުމަތިވެފާ ތިބި ފަގީރުން ތަކަކަކީމެވެ. މިއަދު އަހަރެންގެ ބައްޕަ ދުނިޔެއަކު ނެތެވެ. އެކަމުގައި އަހަރެންގެ ބައްޕައަށާއި އަހަންނަށް މާފުކޮށްދޭށެވެ!" މިފަދައިންނެވެ.

އެ ލިޔުންކޮޅު ކިޔާލުމާއި އެކު އެ ވިޔަފާރި ވެރިޔާއަށް އޭނާގެ ވިޔަފާރީގެ ކުރީކޮޅު، ވީނުވީ ނޭނގި ބައެއް މުދާ ގެއްލިފައި ހުރިކަން ހަނދާންވިއެވެ. އެކަމުގެ ސަބަބަކީ އެ ސިޓީ އުރައިގެ ވެރިޔާކަން މިއަދު އެ ވިޔަފާރި ވެރިޔާއަށް އެނގުނެވެ. އޭނާ ވަނީ އެ ސިޓީ އުރައިގެ ވެރިފަރާތަށާއި އޭނާގެ ބައްޕައަށް މައާފަށް އެދޭކަން މީސްމީޑިޔާގައި އާންމު ކޮށްފައެވެ. އެހެނީ އެއީ ކާކު ކަމެއް ކަން އޭނާއަށްވެސް ނޭނގޭތީއެވެ. އަދި އެ ވިޔަފާރިވެރިޔާ ވަނީ އެ މީހަކާ ބައްދަލުކުރުމަށްވެސް އެދޭ ވާހަކަ ހިއްސާ ކޮށްފައެވެ.

މައާފަށް އެދުމަކީ ލަދުވެތި ކަމެއް ނޫނެވެ. އެއީ ވަރަށް ފުރިހަމަ ހިތްވަރެކެވެ. ނަމަވެސް މައާފަށް އެދުން ލަސް ނުކުރާށެވެ. ގެއްލިއްޖެ ވަގުތަކީ އަނބުރާ ލިބޭނޭ އެއްޗެއް ނޫނެވެ. ތައުބާ ވީނަމަވެސް މީހެއްގެ ހައްގަކަށް އަރައިގަނެފައިވާނަމަ، އެ މީހަކު މައާފު ނުކުރާގާ ހިނދަކު، އެ ކަމެއް މައާފުވެގެނެއް ނުދެއެވެ. އެހެންކަމުން އެމީހުންގެ މައާފު ހޯދަށް އަވަސްވެ ގަންނާށެވެ. ލަދު ނުގަންނާށެވެ!