ހޮޓާ ތަކާއި ރެސްޓޯރެންޓު ފަދަ ތަންތަނުން ހިދުމަތް ލިބިގަންނަ މީހުންނަނީ ގިނަ އަދަދެއްގެ ބައެކެވެ. ރާއްޖޭގެ ވެރިރަށް މާލެއާއި ހިލާފަށް ރާއްޖޭގެ އެހެން ރައްތަކުގައި މިފަދަ ހޮޓާތަކާއި ރެސްޓޯރެންޓު ތަކުގައި ހިދުމަތް ދެވޭ ގޮތް ތަފާތުވެދެއެވެ. އެ ރަށްތަކުގައި އެކަކު އަނެކަކަށް ކުރާ އިތުބާރާއި އޮންނަ ގާތް ކަމެއްގެ ބޮޑުކަމުން ހާސްބައި ތަފާތުވެދެއެވެ. ތަފާތުވާ މައިގަނޑު އެއް ކަމަކީ އެ ތަންތަނުން ހޯދާ ހިދުމަތްތަކުގެ އަގާއި އެ ހިދުމަތްތަކުގެ އަގު އަދާ ކުރެވޭ ގޮތެވެ.

އާދޭހެވެ! ދައްކަން މިއުޅެނީ ދަރަންޏަށް ބަނޑުފުރާލެވޭ ވާހަކައެވެ. މާލޭގައި އެއީ ކުރަން ފަސޭހަ ކަމެއް ނޫނެވެ. ނަމަވެސް ރާއްޖޭގެ އެހެން ރައްތަކުގައި ހުންނަ ހޮޓާ ރެސްޓޯރެންޓް ފަދަ ތަންތަނުން އެފަދައިން ދަރަންޏަށް ބަނޑުފުރާލެވެއެވެ. މާ އަކީ އަތުގައި އެ ވަގުތު ފައިސާ ނެތަސް، އެފަދަ ތަނަކަށް ގޮސް ކާން ބޭނުންނަމަ ނުވަތަ އެއްޗެއް ބޯލަން ބޭނުންނަމަ އެ ފުރުސަތު ފަހިވެފައި އޮވެއެވެ. މިއީ ހަގީގަތުގައި އަހަރެމެންނަށް ލިބިފައިވާ ވަރަށް ފަސޭހަ ފުރުސަތެކެވެ. ގޭގައި ނުވަތަ އެނޫން ތަނެއްގައިވިޔަސް ބުރަމަސައްކަތެއްގައި އަވަދި ނެތި އުޅެމުންވިޔަސް ސައެއް ބޯލަން ބޭނުން ނަަމަ، އަތުގާ ފޯނު ނެތަސް ރަށްރަށުގައި ހުންނަ ހޮޓާ ތަކުން ހިދުމަތް ލިބެއެވެ. ނަމަވެސް އެއީ ދަރަންޏަށެވެ.

ދަރަންޏަކީ އިސްލާމް ދީނުގައިވެސް ހުއްދަ މުޢާމާލާތެކެވެ. ނަމަވެސް މި މުޢާމަލާތަކީ ފުރިހަމަ ވާން ޖެހޭ މުޢާމަލާތެކެވެ. ފަށައިފިނަމަ، ނިންމަން ޖެހޭނެ މުޢާމަލާތެކެވެ. އިންސާނާގެ މަރު އޭނާ އާއި ބައްދަލު ކުރާ ހިނދު، ފުރިހަމަ ނުވާ ދަރަނީގެ މުޢާމަލާތެއް ވާނަމަ، އެ އިންސާނެއްގެ ކަފުނުގައި އެކޮޅުކޮޅުން އެލުވިފައިވާނޭ ކަމުގެ ވާހަކަ އަކީ އަހަރެމެން ކޮންމެ މުސްލިމަކުވެސްމެ އަޑުއަހާ ފަރިތަ ވާހަކައެކެވެ. އެހެންކަމުން ދަރަނީގެ މުޢާމަލާތައް އިންސާނާ ހުށަހެޅިގަންނަ އިރު، އެ ދަރަނި އަދާކުރުމަށްވެސް ނުވަތަ އެ މިޢާމަލާތް ފުރިހަމަ ކުރުމަށްވެސް ހާއްސަ ސަމާލުކަމަކާއި އަހައްމިއްޔަތު ކަމެއް ދޭން ވާނެއެވެ.

ހޮޓާ ތަކުގައި ބައެއް މީހުންގެ ދަރަނި، އިންތިހާ އަށް ބޮޑުވެފައިވާ ކަމުގެ ވާހަކަ އަކީ އަބަދުވެސް އަހަރެމެން އަޑު އަހާ ވާހަކަ ތަކެކެވެ. އާދޭހެވެ. ދަރަނި އަދާ ކުރާ މީހުންނަކީ ނިސްބަތުން ގިނަ ބައެކެވެ. ދަރަންޏެއް އަދި އޮތަސް އެއީ ގޯސްކަމެއް ނޫނެވެ. ގޯސްވަނީ ދަރަނި އަދާ ނުކުރެވޭނަމައެވެ. ހޮޓާތަކަށް ގޮސް ބަނޑުފުރާ ކާލައިގެން ނުކުމެން ދަނީ ދަރަންޏަށް ޖައްސާލާފައެވެ. އަހަރެމެންގެ ދުލުކުރިން "ޖައްސާލާށޭ" ބުނެފައި ދިޔަނަމަވެސް، އެ ހުށަހެޅެނީ ދަރަނީގެ މުޢާމަލާތަކަށް ކަން އަހަރެމެން ހަނދާން ކުރަން ވާނެއެވެ. އެ މުޢާމަލާތް ފުރިހަމަ ކުރަންވާނޭ ކަން ހަނދާން ކުރަން ޖެހޭނެއެވެ.

ދަރަންޏަށް ބަނޑުފުރާލާއިރު އެ ލިބޭ ހިތްހަމަ ޖެހުމަށްވުރެ، ބޮލު އެޅޭ ޒިންމާ މާ ބޮޑުކަން ހަނދާން ކުރަން އެބަ ޖެހެއެވެ. އެ ޒިންމާ އަދާ ނުކުރެވި ގިނަ ދުވަސް ވުމުން އެ ދަރަނީގެ މަތިން ހަނދާން ނެތިދެއެވެ. އަދި އެ ދަރަނީގެ މަތިން އެ ހިޓާތަކުގެ ހަނދާންވެސް ނެތި ހިނގައިދާނެއެވެ. އެއްބަޔަކު އެ ދަރަނި މަތިން ހަނދާން ނެތްކަމުގައި ވީނަމަވެސް، ހުރިހާ ކަމެއް މޮޅަށް ބައްލަވާ ދެނެވޮޑިގެންވާ އިލާހު އެ ދަރަނީގެ މަތިން ހަނދުމަފުޅެއް ނުނައްތަވާނެއެވެ. އެހެންކަމުން ހޮޓާ ތަކުން ދަރަންޏަށް ބަނޑު ފުރާލައިގެން އުޅޭ މީހުން މިކަންކަމަށް ސަމާލުވާށެވެ. ވިސްނާށެވެ! ތިޔަ ކެވެނީ ދަރަންޏެވެ! އަދާ ކުރަންޖެހޭ ހައްގެކެވެ. 

ދަރަނި އަދާ ނުކުރެވި ހުރުމަކީ އެ ދަރަނި މަތިން ހަނދާން ނެތިދާ ކަމެކެވެ. ހާއްސަކޮށް ކެއިން ބުއިމުގެ މުއާމަލާތްތަކުގައެވެ. އެހެން ކަމުން ދަރަންޏަށް ކާ މީހުންނާއި ބޯ މީހުން، އެ ދަރަނި ނުވަތަ ދަރަނިތައް އަދާކުރުމަށް އަވަސްވެގަންނާށެވެ.