ސިޙުރަކީ އަހަރެމެންގެ މި އިސްލާމީ މުޖުތަމައުގައިވެސް މިއަދު އިންތިހާއަށް ގިނަ ބިރުވެރިކަމެކޭ ބުނެވިދާނެއެވެ. ސިޙުރުގެ އުނދަގޫ ޖެހޭ މީހުންގެ އަދަދަކީ އިސްލާމީ ޤައުމަކާއި އަޅާބަލާއިރު ގިނަ އަދަދެކެވެ. ސަބަބަކަށް ވަނީ ސިޙުރު ހަދާ މީހުން ގިނަ ވުމާއި، ސިޙުރު ޖެހުމުގެ ފުރުސަތު ބޮޑު މީހުން ގިނަ ވުމެވެ. އެހެން ކަމުން އާންމުކޮށް ސިޙުރުގެ އަސަރު ފޯރަނީ ކޮންކޮން ބަޔަކަށްތޯ ބަލައިލުން މުހިންމެވެ. މިކަމުގެ މައްޗަށް ބަލާލާ ފަންވަތް މަޖައްލާގައި ޝާއިއުކޮށްފައިވާ ލިޔުމެއްގެ ބައެއް ނަކަލު ކޮށްލާނަމެވެ. އެ ލިޔުމުގައި ވެއެވެ.

" ސިޙުރު ޖެހެނީ ކޮންބަޔަކަށް؟

ސިޙުރަކީ ވަރަށް ގިނަބަޔަކު ޤަބޫލުކުރާ އެއްޗެއް ކަމުގައި ވާތީ، އޭގެ ޙަޤީޤަތް ހޯދުމަށްޓަކައި ސައިންޓިފިކް ދިރާސާތައް ކުރެވިފައިވެއެވެ. އެގޮތުން ކުރެވިފައިވާ ދިރާސާތަކުގެ އަލީގައި، އާއްމުގޮތެއްގައި ސިޙުރުގެ ބަލިތައް ޖެހެނީ ކޮންބަޔަކަށްކަން ތަފާސްކުރެވިފައިވެއެވެ. ސިޙުރުގެ ބަލިތައް ޖެހޭ މީހުންގެ ލިސްޓްގެ އެންމެ ކުރީގައިވަނީ މާތް ﷲ ގެ ޙަޟްރަތަށް އީމާން ނުވާމީހުންނެވެ. އެއަށްފަހު އެބަލިތައް ޖެހޭ މީހުންގެ ތެރޭގައި މިދަންނަވާ މީހުން ހިމެނެއެވެ.

1. އެބައިމީހުންނަކީ މުޖުތަމަޢުގައި އޮންނަ ހަމަޖެހޭ އުޞޫލުތަކާއި ޚިލާފުވެ ޖަމާއަތުން ބޭރުވާ މީހުންނެވެ.

2. އެބައިމީހުންނަކީ ނާއުއްމީދުވާ މީހުންނެވެ.

3. އެބައިމީހުންނަކީ ރުޅިގަދަ ނަފުޞު ކޮންޓްރޯލް ނުކުރެވޭ މީހުންނެވެ.

4. އެބައިމީހުންނަކީ ޞިއްޙަތު ދެރަ ހަށިގަނޑު ނިކަމެތިި މީހުންނެވެ.

5. އެބައިމީހުންނަކީ އަމިއްލަ އެދުމާއިގެން ކުރިއަށްދާ މީހުންނެވެ. އެބައިމީހުންނަކީ ސިޙުރުވެރިންނާއި ގުޅުން ބަހައްޓާ މީހުންނެވެ.

6. އެބައިމީހުންނަކީ ގަދަ ކީރިތިވަންތަ ﷲ ގެ ޙަޟްރަތަށް އުރެދޭ މީހުންނެވެ.

7. އެބައިމީހުންނަކީ ﷲ ގެ ޙަޟްރަތަށް ޚުޝޫޢައްތެރިނުވާ މީހުންނެވެ.

8. އެބައިމީހުންނަކީ ބޮޑާކަމާއި ކިބުރުވެރިކަމުން ކަޅިވެފައިވާ މީހުންނެވެ.

9. އެބައިމީހުންނަކީ މާއްދީ ބޭނުންތަކުގައި ހައްދު ފަހަނައަޅާފައިވާ މީހުންނެވެ.

10. އެބައިމީހުންނަކީ ބަދުއަޚްލާޤީ ޢަމަލުތައް ހިންގާ މީހުންނެވެ.

11. އެބައިމީހުންނަކީ ޒަކާތްދިނުންފަދަ ދީނީ ގޮތުން ކުރަންޖެހޭ ކަންތައްތައް ނުކުރާ މީހުންނެވެ.

12. އެބައިމީހުންނަކީ މުދާތައް މިލްކުގައި ފުނިޖެހިފައި ވާއިރުވެސް އެއިން ފަޤީރުންނަށް ޞަދަޤާތްނުދޭ މީހުންނެވެ.

13. އެބައިމީހުންނަކީ އަޤީދާ ބަލިކަށި މީހުނެވެ.

14. އެބައިމީހުންނަކީ ސުވަރުގެއާއި ނަރަކައަށް އީމާންނުވާ މީހުންނެވެ.

15. އެބައިމީހުންނަކީ މަގުފުރެދިފައިވާ މީހުންނެވެ.

16. އެބައިމީހުންނަކީ ފައިސާއާއި މެދު ދަހިވެތިވެ މުއްބާރުކުރާ ބަޚީލުންނެވެ.

17. އެބައިމީހުންނަކީ އެހެންމީހުންގެ ހައްޤުތައް ނިގުޅައިގަންނަ ޒާލިމުންނެވެ.

18. އެބައިމީހުންނަކީ ހިތްވަރުދެރަ ފިނޑިންނެވެ. 19. އެބައިމީހުންނަކީ ރިބާ ކައިއުޅޭ މަކަރުވެރިންނެވެ.

20. އެބައިމީހުނަކީ މީހަކަށް މާތް ﷲ ދެެއްވާފައިވާ ނިޢުމަތެއް ފެނިއްޖެނަމަ އެނިޢުމަތާ މެދު ނުރުހި އެކަމަށް ނަފްރަތުކުރާ ހަސަދަވެރިންނެވެ.

21. އެބައިމީހުންނަކީ މުޖުތަމަޢުގައި ހަމަނުޖެހުން އުފެދޭފަދަ ވާހަކަތައް ދައްކާއުޅޭ ފިތުނަވެރިންނެވެ.

22. އެބައިމީހުނަންކީ އަމާނާތްތައް އޭގެ އަޙުލުވެރިންނަށް ރައްދުނުކުރާ ޚިޔާނާތްތެރިންނެވެ.

23. އެބައިމީހުންނަކީ މާތް ﷲގެ ޙަޟްރަތާއި އެހެންފަރާތްތައް ބައިވެރިކޮށް ޝަރީކުކުރާ މުޝްރިކުންނެވެ.

24. އެބައިމީހުންނަކީ މުދަލާއި ފައިސާއިން ބޭކާރުގޮތުަގއި ހޭދަކޮށް އިސްރާފްކުރާ މުސްރިފުންނެވެ. "

(ސިޙުރަކީ ކޮބާ؟ އަދި އެއިން ސަލާމަތް ވާނީ ކިހިނެއް؟ - އަބްދުލް މުއީދު ހަސަން - 2008 - ފަންވަތް)

އެހެންކަމުން އިސްވެ ބަޔާންވިފަދަ މީހެއްކަމުގައި ތިމާ ވިޔަ ނުދޭށެވެ. ސިޙުރު ޖެހުމުގެ ފުރުސަތު ކުޑަކުރުމަށް އެ މީހަކު އަމިއްލަ އަަށް އެމީހެއްގެ ރައްކާތެރިކަން ހޯދާށެވެ. އެފަދަ ކަންކަމުން ސަލާމަތްވާނޭ ގޮތްތަކަކީ އިސްލާމީ ދަރުސްތަކާއި ނަސޭހަތްތަކުން ތަކުރާރުކޮށް އަހަރެމެންނަށް އެނގޭ ކަންކަމެވެ.