މިއީ ބަލި އެނދުގައި އޮތް މަންމައަކު އޭނާގެ ދަރިންނަށް ދިން ނަސޭހަތެކެވެ. ޒަމާންތަކަށް މި ނަސޭހަތުގެ ވާހަކަ އައީ ތާރީހުގެ ތެރެއިން އެކި ގޮތްގޮތަށް ދެކެވެމުންނެވެ. އޭރާއި މިހާރުވެސް އިބުރަތެއްގެ ގޮތުގައި މިވާހަކަ ދައްކާ އުޅެއެވެ. ނަމަވެސް މި ވާހަަކައިން އިބުރަތެއް ލިބުން ވަނީ ވިސްނާ ފިކުރުކުރާ ބަޔަކަށް އެކަންޏެވެ.

"ދަރިފުޅާއެވެ! އަމިއްލަ އެދުން ބޮޑުނުކުރާށެވެ!" ދުނިޔޭގައި އިންސާނުން އުޅޭ އިރު، ތަފާތު މިޒާޖުގެ މީހުންނާއި ދިމައިވާނެއެވެ. ތަފާތު އަހުލާގުގެ މީހުންނާ ދިމައިވާނެއެވެ. އަދި އެފަދަ މީހުންނާއި އެކު އުޅެންވެސް ޖެހިދާނެއެވެ. އެހެނަސް ތިބާއީ އަމިއްލަ އެދުން ބޮޑު މީހެއްކަމުގައި ނުވާނަމަ، އެފަދަ ކޮންމެ ބަޔަކާއި އެކުގައިވެސް ތިބާއަށް އުޅެވޭނެއެވެ. އެހެން ބަޔަކާއި އެކުގައި މާ ބޮޑު މައްސަލަތަކެއް ނުޖެހި އުޅެވޭނެއެވެ. 

އެ މުސްކުޅި މަންމަގެ ވާހައިގައި ވެއެވެ. މާގޭ ލޯބި ދަރިންނޭ! ގޭތެރޭގައި ކުނި ގިނަ ނުކުރާށެވެ. މަގު މަތީގައިވެސް ކުނި ގިނަ ނުކުރާށެވެ. އަވަށްޓެރިޔާ ގެ ގޭގައި ވެސް ކުނި ގިނަ ނުކުރާށެވެ. އަވަށްޓެރިޔާގެ ގޭގެ މަގުދޮށުގައިވެސް ކުނި ގިނަ ނުކުރާށެވެ. ދަރިންނޭ! މީހަކު ކަމަކަށް އެދި އަތުވެއްޖެ ނަމަ، ހުސް އަތާ ފޮނުވާ ނުލާށެވެ. ނުވަތަ މާޔޫސްވެފައިވާ މޫނަކާ އެކު ފޮނުވާ ނުލާށެވެ. އިޖްތިމާއީ ކަންކަމުގައި ފަސް ނުޖެހޭށެވެ. ޖަމާއަތުގެ މަސްލަހަތު އަބަދުމެ އިސްކުރާށެވެ. މަގޭ ހައްގޭ މަގޭ މިންވަރޭ އަބަދު ނުގޮވާށެވެ. އެވެނި މީހެކޭ މިވެނި މީހެކޭ ތުހުމަތު ނުކުރާށެވެ. ތިމާގެ ވާހަކަ އަބަދު ނުދައްކާށެވެ. ދަރިންނޭ! މާދަމާގެ ވާހަކަ ދައްކާށެވެ. ކަލޭމެން ވެސް އަދި މާދަނާ ދެކޭނެއެވެ. އެދުވަހު ކަލޭމެއް އެއްކުޅަ އަމިއްލަ އެދުމަކުން އެއްވެސް ފައިދާއެއް ނުކުރާނެއެވެ. އަނެކާގެ ވާހަކަ ގިނަ ގިނައިން ދައްކާށެވެ. އަނެކާގެ ގޯސް ވާހަކައެއް ނޫނެވެ. އަނެކާގެ ހާލުގެ ދުލުން ގޮވާ ވާހަކަ ތަކެވެ. އެ ވާހަކަ ތަކަށް އިޖާބަ ދޭށެވެ. އެހެން މީހުންގެ ކަންކަން ލަސް ނުކުރާށެވެ. ފަސް ނުކުރާށެވެ. ތިބާގެ އަމިއްލަ ކަންކަން ފަސްކުޅަޔަސް އަނެކާގެ ކަމެއް ނަމަނަމަ ފަސްނުކުރާށެވެ. ތިބާގެ އަމިއްލަ އެދުން ބޮޑު ނުކުރާށެވެ.

ދަރިންނޭ! ފަހަރުގައި އަމިއްލަ އެދުން ބޮޑުނުކޮށް އުޅޭނަމަ، މި ދުނިޔޭގައި ކަލޭމެންނަށް މާ ބޮޑު ތަނަވަސްކަމެއް ނެތިދާނެއެވެ. ނަމަވެސް ހަނދާންކުރާށެވެ. އެއީ މާދަމާއަށް ކަލޭމެން ކުރާ ވަރަށްބޮޑު ހޭދައެކެވެ. މިއަދު އެ އިހުސާސް ކަލޭމެނަށް ނުކުރާނެއެވެ. އެހެންނަމަވެސް އެ އިހުސާސް ކުރެވޭ ދުވަހު، ކަލޭމެން ބުނާނެއެވެ. އެދުވަހު ތިމާގެ އަމިއްލަ އެދުން ބޮޑުނުކުރެވުކަމީ މިއަދުގެ ބާއްޖަވެރި ކަމެވެ.

އާދޭހެވެ! އެއްވެސް ކަމެއްގައި އަމިއްލަ އެދުމައިގެން އުޅޭ މީހަކަށް މާދަމާގެ ބާއްޖަވެރިކަން ލިބެން އޮތީ ކޮން ގޮތަކުން ހެއްޔެވެ؟ އާނއެކެވެ. އެހެން އުޅޭ މީހުންނަށް މި ދުނިޔެމަތީގައި ނުވާނެ ކަމެއް ނޯންނާނެއެވެ. ނުލިބޭނެ އުފަލެއްވެސް ނޯންނާނެއެވެ. އެހެނަސް މާދަމާ އެމީހުންނަށް އޮތީ ކޮން އެއްޗެއްތޯއެވެ. ވިސްނާލާށެވެ. އަމިއްލަ އެދުން ބޮޑުނުކުރާށެވެ! އަމިއްލަ އެދުމައިގެން ފޯ ނުވާށެވެ! އަނެކާގެ ހައްގުތަކާއި އަނެކާގެ އިހުސާސްތައް އަބަދުވެސް ދެކިގެން އުޅޭށެވެ. މާދަމާގެ ބާއްޖަވެރިކަން އޮތީ އޭރުންނެވެ!