އަބަދުވެސް އިންސާނާ ފެންނަނީ ކޮންމެވެސް ކަމަކައިގެން މަޝްއޫލުވެ އުޅޭ ތަނެވެ. އެއްކަމެއް ކޮށް އަނެއް ކަމެއް ކޮށް އަވަދިނެތިއެވެ. އެކި މީހުން އެކި އެކި ކަންކަމައިގެން އަވަދިނެތި ވާއިރު ހުރިހާ އެއްމެންވެސް އަވަދިނެތިވަނީ އެމީހެއްގެ ދިރިއުޅުން ފުރިހަމަ ކުރުމަށްޓަކައި ކުރާ ކޮންމެވެސް މަސައްކަތަކައިގެންނެވެ. އެކަމުގައި ގޯހެއް ނެތެވެ. އެހެނަސް އެކަމުގެ ސަބަބުން ތިމާ ލޯބިވާ މީހުންނަށް ވަގުތު ނުދެވުމަކީ މައްސަލައެކެވެ.

ދަރިންނާއި އަނބިންނާއި ފިރިންނާއި މައިންބަފައިންނާއި ގާތްތިމާގެ މީހުންނާއި ރައްޓެހި ރަހުމަތްތެރިންނަކީ އެ ބަޔަކާއި އެކު އަހަރެމެން ވަގުތު ހޭދަ ކުރަން ޖެހޭނޭ ބައެކެވެ. އެބަޔަކާއި އޮންނަ ގުޅުން ބަދަހިކުރަން ޖެހޭނޭ ބައެކެވެ. ހާއްސަކޮށް އާއިލީ ގުޅުންތަކެވެ. ނަމަވެސް މި އަވަދިނެތް ދުނިޔޭގައި މިއިން އެއްވެސް ކަމަކަށް އަދު ވަގުތެއް ނުދެވެއެވެ. މިއީ ހިތާމަ ހުރި ކަމެކެވެ.

ނިދާފައި އޮންނަ ދަރިފުޅު، ނިދިން ހޭލުމުގެ ކުރިން އެކުދިންގެ ބައްޕަ ވަޒީފާއަށް ދެއެވެ. އެނބުރި އަންނަނީ އިރުއޮއްސޭ ފަހުންނެވެ. އަނެއްކާ ކޮންމެވެސް ތާކަށް ދެއެވެ. ދެން އަންނަނީ ނިދަން ވުމުންނެވެ. އަނެއްބައި މީހުންނަކީ ގޭދޮށުގައި އުޅުނެއްކަމަކު ވަޒީފާއެއް އަދާ ނުކުރިއެއް ކަމަކު، އަމިއްލަ ވިޔަފާރިއައިގެން އަވަދިނެތިވެ އުޅޭ ބައެކެވެ. އަބަދުވެސް ކޮންމެވެސް މަސައްކަތެއްގައި މަސްއޫލުވެ އުޅެވެއެވެ. އަނބިދަރިންނާއި ގާތުގައި ވީނަމަވެސް، އަނބިދަރިންނަށް ސަމާލުކަން ދެވެނީ މަދު ފަހަރަކުއެވެ. ސަރުކާރު ވަޒީފާއެއްގައި އުޅޭ މީހާވެސް އަބަދުވެސް އޮފީހޭ ވަޒީފާއޭ ޑިއުޓީއޭ ކިޔާތަން ފެނެއެވެ. ހަނދާން ނެތޭ ކަމަކީ މާތް ﷲ އެމީހަކަށް ހަވާލު ކުރި ޑިއުޓީއެވެ.

އަދުގެ ގިނަ ޒުވާން މައިންނަކީ ވަޒީފާ އަދާ ކުރާ ބައެކެވެ. ދަރިން ތިބިއްޔާ މާމަގެ އުނގަށް ދަރިން ލާފާ ނުވަތަ ކޮންމެވެސް ފަރަންޖީއެއްގެ އަތަށް އެ ދަރިން ދޫކޮށްލާފާ ވަޒީފާއަށް ދެއެެވެ. އެނބުރި އާދެވެނީ އެހާ ލަހުންނެވެ. ހަގީގަތަކީ މި ދެންނެވި ފަދަ ދިރިއުޅުމެއްގައި ދަރިންނަށް ދެވޭ ވަގުތު މަދުވާނެކަމެވެ.

މިފަދަ ކަންކަމުން މުޖުތަމައުގެ މަސްލަހަތު އެބަ ގެއްލެއެވެ. ބޮޑެތިވަމުން އަންނަ ދަރީންނަށް މައިންބަފައިންގެ އަޅާލުމާ ތަރުބިއްޔަތު މަދުވެ، އެ ދަރީން މަގުން ކެހިގެން ދާތަން އެބަ ފެނެއެވެ. އުޅުމެއް ގުޅުމެއް ނެތި، އަދަބެއް ސަދަބެއް ނެތި ރިވެތި އަހުލާގުގެ ކަންފުޅެއް ނެތި ދަރިންތައް ވިއްސި ވިހާލިވާތަން އެބަ ފެނެއެވެ. މިއީ މިފަދައިން މައިންބަފައިންނާއި ބެލެނިވެރިންނާއި މަސްއޫލުވެރި ފަރާތްތަކުން އަވަދިނެތިވުމުގެ ނަތީޖާއެވެ.

ޖީލުތަކެއް ފަނާވެ ނުދަނީސް އަވަދިނެތިވުމުން މިންޖުވެ، ތިމާ ލޯބިވާ މީހުންނާއި އެކު ވަގުތުކޮޅެއް ހޭދަ ކުރާށެވެ. ދަރިންނަށް ދޭން ޖެހޭ ލޯތްބާއި ކުލުނާއި އަޅާލުމާއި ތަރުބިއްޔަތު ދޭށެވެ. ބިޒީއޭ އަނެކައްޗެކޭ ނުކިޔާށެވެ. ވަގުތު ދޭން އެދޭ މީހާ ވަގުތު ހޯދާނެއެވެ.