މީސްމީޑިޔާގައި ދައުރުވާ ކޮންމެ ވީޑިއޯ އަކާއި ކޮންމެ ފޮޓޯ އަކީ އޭގެ ސައްހަކަން ކަށަވަރު ކުރަން އުނދަގޫ އެއްޗެއްސެވެ. މި ލިޔުމުގައި މި ހިމަނާލަނީ މިފަދައިން މީސްމީޑިޔާގައި އާންމުވި ވީޑިއޯއެއްގެ ވާހަކައެވެ. އިސްލާމްދީނުގެ އެކި އެކު ޝުއޫރުތައް ކުރިއަރުވާ ދީނީ ޕޯސްޓް ތައް ހިއްސާކުރަމުން އަންނަ މީސްމީޑިޔާގެ މަންސައެއްގެ އޮޅިއެއްގައި ހިއްސާކޮށްފައި އޮތް ވީޑިއޯއެވެ. އެ ވީޑިއޯ ހިއްސާކުރަމުން އެއީ ހަގީގީ ހާދިސާއެއް ކަމަށް އޭގައި ބުނެފައި ވެއެވެ.

އެ ވީޑިއޯގައި ފެންނަނީ ކޮންމެވެސް އަރަބި އިސްލާމީ ގައުމެއްގެ މިސްކިތެއްގެ ތެރޭގައި ފިރިހެނުންތަކެއް ޖަމާއަތް ހަދައިގެން ޤުރުއާން ކިޔަވަން ތިބޭ ތަނެވެ. އިރުކޮޅެއްގެ ތެރޭގައި ދެން އެ ވީޑިއޯ އިން ފެންނަނީ މިސްކިތުގެ ދޮރު ހުޅުވާ މީހަކު މިސްކިތައް ވަންނަ ތަނެވެ. އޭނާ ހުރީ މަސްތުގެ ހާލުގައެވެ. އެވަގުތު މިސްކިތުގެ ދޮރު ދޮށުގައި ތިބި މީހުންނާ އެ މީހަކު ޒުވާބު ކޮށް އަތް އުކައުކާ ވާހަކަ ދައްކަމުން ދިޔައެވެ. އެ މީހަކަށް ކޮޅަށް ހުރެވެނީ ކިރިޔާއެވެ.

މިސްކިތުގައި އެވަގުތު ތިބި މީހުންނާއި ޤުރުއާން ކިޔަވަން ތިބި މީހުންވެސް ތެދުވެގެން އެ މީހާ ކައިރިއަށް ދާތީ ފެނެއެވެ. އަދި އެމީހާ މިސްކިތުން ބޭރު ކުރަން މަސައްކަތް ކުރާތީވެސް ފެނެއެވެ. ނަމަވެސް އެތަނުން އެކަކު އޭނާގެ އަތުގައި ހިފާ މިސްކިތުގެ ތެރެއަށް ގެންނަން މަސައްކަތް ކުރާތަން ފެނެއެވެ. އެއާއި އެކު ދެންތިބި މީހުން ކުރެން މަޑުކުރުމަށް އިޝާރާތް ކުރުމަށްފަހު، މަސްތުގެ ހާލުގައި ހުރި މީހާ ގޮވައިގެން މިސްކިތުގެ ތެރެއަށް އެމީހަކު ވަނެވެ. އެއީ އެ މިސްކިތުގެ އިމާމެވެ. 

ދެން އެ ވީޑިއޯގައި ފެންނަނީ މަސްތުގެ ހާލުގައި ހުރި މީހާގެ މަސްތުގެ ހާލު ފިލާގޮސްފައިވާ ހާލުގައި ހުރެ ވުޟޫ ކުރާތަނެވެ. އެއަށްފަހު ދެން ފެންނަނީ އެ އިމާމާގެ ފަހަތުގައި މައުމޫމުވެ ނަމާދެއް ކުރާ ތަނެވެ. އެ ނަމާދުގާ އިމާމާ ކުރީ ދެ ރަކުއަތް ކަމުން ސުންނަތް ނަމާދެއް ކުރީ ކަމަށް ބެލެވެއެވެ. އެ ނަމާދުގެ ފުރަތަމަ ރަކުއަތުގައި އެ މީހާ ސަޖިދައަށް ދިޔަ ގޮތަކަށް ނުތެދުވިއެވެ. ނަމަވެސް އިމާމާ ނަމާދު ކުރިއަށް ގެންދިޔައެވެ. ވީޑިއޯ ކުރަމުން ދިޔަ މީހުން އެކަމާ ހައިރާންވެގެން އެ މީހާ އާއި ދިމާލަތް އަތުން އިޝާރާތްކޮށް ވާހަކަ ތަކެއް ދައްކާތީ ފެނެއެވެ. ނަމަވެސް އިމާމު ނަމާދު ކުރަމުން ދިއުމުން އެމީހުން އެ މިހާއަކާ ގާތެއް ނުވިއެވެ.

ސަލާމް ދިނުމާއި އެކު އިމާމު މީހާ އޭނާގެ ގައިގާ ކޮށްޓާލާ ގޮވާލާ ހެދިއެވެ. ހަބަރެއް ނުވެއެވެ. އެއާއި އެކު ވީޑިއޯ ކުރި މީހުންނާއި ދެންވެސް މިސްކިތުގައި ތިބި މީހުން އޭނާގެ ކައިރިއަށް ދިޔައެވެ. އެހިސާބުން އެ ވީޑިއޯ ނިމެއެވެ. އެ ވީޑިއޯ އާންމު ކުރަމުން ލިޔެފައިވަނީ މަސްތުގެ ހާލުގައި އައި އެ މީހާ، އެ ނަމާދުގެ ސަޖިދާގައި އޮށްވާ ނިޔާވީ ކަމަށެވެ. މަސްތުގެ ހާލުގައި ނަމާދާ ގާތްވުން ވެސް ވަނީ އިސްލާމް ދީނުގައި ނަހީ ކުރައްވާފައެވެ. އެހެންކަމުން އިސްވެ ދެންނެވިހެން ވީޑިއޯއިން ފެންނަ ގޮތުގައި އޭނާ ވުޟޫކުރަން ފެށީ އޭނާގެ މަސްތުގެ ހާލަތު ފިލާ ދިއުމުންކަމަށް ބެލެވެއެވެ. ދަންނަވަން މިއުޅޭ ވާހަކަ އަކީ މާތް ﷲ ވަގު ފުރައްދަވައިފި އަޅަކަށް ތެދުމަގު ދައްކަވާނޭ ހަމަ އެކަކުވެސް ނުވާނޭ ވާހަކައެވެ. އަދި އެކަލާންގެ ތެދުމަގު ދައްކަވައިފި އަޅަކު މަގު ފުރެއްދޭނޭ މީހަކު ނުވަނޭ ވާހަކައެވެ.