ބައެއްކަހަލަ ބަލިތަކަކީ އޭގެ ސަބަބުން އަހަރެމެންގެ ނަފްސު އަހަރެމެންގެ ބުއްދީގެ މައްޗަށް ގަދަވެގަންނަފަދަ ބަލި ތަކެކެވެ. މިހެން މި އިޝާރާތް ކުރީ އެފަދަ ބަލިތަކުގެ ސަބަބުން އިންސާނާގެ މިޒާޖަށް ބަދަލު އަންނާތީއެވެ. ސަމާލުކަން ކުޑަވުމާއި ވިސްނުމުގެ ބާރު ދަށްވުމާއި ބަނޑުހައިވުމާއި ރުޅި އައުމާ, މިއީ މިފަދަ ބައެއް ބަލިތަކުގެ ސަބަބުން ދިމާވާ ކަންކަމެވެ. ހަމައެކަނި ނަފްސާނީ ބަލިތަކެއް ނޫނެވެ. ޖިސްމާނީ ބައެއް ބަލިތަކުގެ ސަބަބުންވެސް މިކަންކަން މިހެން ދިމާވެއެވެ. ވީއިރު، އެފަދަ ބައްޔެއް ނުވަތަ ކަމެއް ތަހައްމަލު ކުރާ މީހެއްނަމަ އެކަންކަމުގައި ފަރުވާތެރިވާން ވާނެއެވެ. ނަފްސު ބުއްދީގެ މައްޗަށް ގަދަވެގަތުމުގެ ފުރުސަތު ދީގެން ނުވާނެއެވެ.

ބައެއްކަހަލަ ޖިސްމާނީ ބަލިތަކުގެ ސަބަބުން އިންސާނާގެ ހަށިގަނޑުގެ ހޯމޯން ތަކުގެ ތަރުތީބަށާއި މިންވަރަށް އަންނަ ބަދަލުތަކުން މީހާގެ މިޒާޖު ގޯސްވެ ރުޅި އިސްކުރެވޭތަން އާދެއެވެ. މިއީ އެ މީހަކު ގަސްތުގަ ކުރާ ކަންކަމެއް ނޫނެވެ. ނަމަވެސް ހޯމޯންތަކަށް އަންނަ މި ބަދަލުތަކާއެކު، ބުއްދީގެ މައްޗަށް ނަފްސު ގަދަވަނީ ރުޅިވެރިކަމުގެ މިޒާޖުގައެވެ.

ހިތްހަމަ ނުޖޭ ކަންކަމަކީ ދުނިޔޭގައި އަބަދުވެސް ދިމާވާނޭ ކަންކަމެވެ. އެނޫން ނަމަހީ މިތަނަކަށް ވަގުތީ ދުނިޔެ އޭ ނުކީހެވެ. އާދޭހެވެ! އިސްވެ ދެންނެވި ބައެއް ޖިސްމާނީ ބަލިތައް ތަހައްމަލު ކުރާ މީހުންނަށް ވާ ގޮތަކީ އެމީހުންގެ މިޒާޖު، ހަލަބޮލިކޮށްލުވާލާ ފަދަ ކޮންމެވެސް ކަމެއް އެމީހުންނަށް ކުރިމަތި ވަނީއެވެ. އުފަލެއް، ހިތާމައެއް، ގެއްލުމެއް، ދެރައެއް އަދި މިނޫނަސް ކޮންމެވެސް ކަމެކެވެ. އެކަމުގެ ސަބަބުން އެމީހުންގެ އެ ހަލަބޮލިވާ މިޒާޖުގައި އެމީހުންގެ ނަފްސު ދީލާލަނީއެވެ. ބުއްދީގެ ބޭނުން ކުރުމުގެ ގާބިލުކަން އެހިނދުގައި އެ އިންސާނާގެ ނުހުންނާނެއެވެ.

މިފަދަ މީސްމީހުންގެ އެހީތެރިންނާއި އެކުގައި އުޅޭ އެންމެން މިކަންކަން ދަންނަން ވާނެއެވެ. ގަބޫލުކުރަން ޖެހޭނެ ކަމަކީ އެމަގުން، ފަސޭހަ ކަމާއެކު އެ މީހަކު އެ ރުޅި އަންނަނީ އޭނާ އެމަގުން ރުޅި އަންނަން އެދޭތީ ނޫންކަމެވެ. އެކަމުގައި އޭނާގެ ބުއްދީގެ މައްޗަށް ނަފްސުގެ ޖަޒުބާތުތައް ގަދަވެގަންނަނީއެވެ. މިފަދައިން ރުޅި އަންނަ މީހާގެ ކުރިމަތީ އަނެކުން ޒުވާބު ކުރުމަށްވުރެ، އެކަމުގައި ހަނުހުރުން މާ ބުއްދިވެރިވާނެއެވެ. ސަބަބަކީ ދެވޭ ރައްދުގައި ބުއްދި އިސްނުކުރެވޭ މީހާގެ ނަފްސުގެ ޖަޒުބާރުތައް އަނެއްކާވެސް އުތުރޭނެތީއެވެ.

ބައެއް މިފަދަ ބަލިތައް ހުންނަ މީހުން، އެމީހުންގެ ދިރިއުޅުމުގައި އަބަދުމެ އެ ބައްޔެއްގެ ވާހަކަ ދައްކާ ހަދައެވެ. މިއީ މުޅިއަކުން ރަނގަޅު އާދައެއް ނޫނެވެ. ސަބަބަކީ އެފަދަ ބައްޔެއް ހުންނަ މީހާއަށް، ނަފްސުގެ މައްޗަށް ބުއްދި ގަދަ ކުރުމުގެ ގާބިލުކަން ނުގެއްލޭތީއެވެ. މިކަމުގައި އޮތީ އެފަދަ ބައްޔެއް ތަހައްމަލު ކުރާ މީހުންގެ ހިތްވަރެވެ. ތިމަންނާ އަކީ ފަސޭހައިން ކަންކަމާ ރުޅި އާދެވި މިޒާޖު ގޯސްވާ މީހެއްކަން އަމިއްލަ އަށް ގަބޫލު ކުރަން ވާނެއެވެ. އެކަމުގައި އަބަދުމެ އަނެކުން ކުށްވެރިކުރަން ނުހަދާށެވެ. ކަމަކާއި ހިތްހަމަ ނުޖެހި، ރުޅި އާދެވޭނަމަ އެކަމަކާ އަވަހަށް ދުރުވާށެވެ. މިއީ ނަފްސުގެ މައްޗަށް ބުއްދި ގަދަވެގަތުމަށް ފަސޭހަ ވާނޭ މަގުތަކެވެ.

ކަމަކާއި ހިތްހަމަނުޖެހި ނުވަތަ ރުޅި އާދެވިއްޖެނަމަ، އެކަމެއް ވެ ނިމުމުން އެކަމަކާއިމެދު އަމިއްލަ އަށް ވިސްނާލާށެވެ. ދެވަނަ ފަހަރަށް ހަމަ އެފަދަ ކަމެއް ތަކުރާރު ވުނުން އެކަމުގައި ރުޅި އާދެވުމަކީ އެންމެ ރަނގަޅު ގޮތް ނޫންކަން އަމިއްލަ ނަފްސަށް ވިސްނައިދޭންވާނެއެވެ. އަދި އެކަމުގައި އަނެކާގެ ކިބައިން މައާފަށް އެދެން ވާނެއެވެ. ފަހަރުގައި އަނެކާ މައާފަށް އެދެން ޖެހޭފަދަ ކަމަކަށް ވެދާނެއެވެ. އެހެން ނަމަވެސް އެފަދަ ބައްޔެއް ތަހައްމަލު ކުރާ މީހެއްނަމަ ގިނަ ގިނައިން މައާފަށް އެދެން ވާނެއެވެ. އޭރުން އަނެކާގެ ހިތުގައި ތިބާއާއި މެދު ހަމްދަރުދީއެއް އުފެދޭނެއެވެ. އަދި ތިބާ އެ ރުޅިއެއް އެ އަންނަނީ ގަސްތުގާ ނޫންކަންވެސް އެނގޭނެއެވެ.

ގުޅުންތައް ދެމިގެން ދިއުމާއި ބަދަހި ކުރުމުގައި މިފަދަ ބައްޔެއް ތަހައްމަލު ކުރާ މީހެއްނަމަ މިކަންކަމަށް ސަމާލުކަން ދޭންވާނެއެވެ. އަދި މިއީ ބާއްޖަވެރިކަމާއި އުފާވެރިކަމާއެކު ދިރިއުޅުމަށް މުހިއްމު ކަންކަމެވެ.