ރަހުމަތްތެރިންނަކީ ކޮންމެ މީހެއްގެ ހަޔާތުގައިވެސް ވަރަށް މުހިއްމު ބައެކެވެ. ރައްޓެހިންނާއި އެކުވެރިންނާއި ހިލާފަށް ރަހުމަތްތެރިންނަކީ ދެގޮތެއްނުވާ ގާތް ބައެކެވެ. އެހެން އިބާރާތަކުން ދަންނަވާނަމަ ރަހުމަތްތެރިންނަކީ ތިބާ އިހްތިޔާރު ކުރި ތިބާގެ ދެވަނަ އާއިލާއެވެ. ނަސްލުގެ ގޮތުންނާއި ނަސަބުގެ ގޮތުން ރަހުމަތްތެރިންނަކީ މުޅިން ތަފާތު ބަޔަކު ކަމުގައި ވެދާނެއެވެ. އެހެނަސް އެއީ ތިބާ އިހްތިޔާރު ކުރި ބައެކެވެ. އެއީ އިހްތިޔާރީ އައިލާއެކެވެ.

އިންސާނުންނަށް ދުނިޔޭގައި އެތައް ކަމެއް ކުރިމަތިވެދެއެވެ. އުފާވެެރި އެތައް ކަމަކާއި ހިތާމަވެރި އެތައް ކަމެކެވެ. ރައްޓެހިންނާއި އެކުވެރިންނަކީ މިފަދަ ކޮންމެ ކަމެއްގައި ތިމާގެ ކައިރީގައި ތިބޭނޭ ބައެއް ނޫނެވެ. އެހެނަސް ރަހުމަތްތެރިންނީ އެއްވެސް ހާލެއްގައި ތިމާ ދޫކޮށްލާނޭ ބައެއް ނޫނެވެ. ރައްޓެހިންގެ އަދަދު ކިތައްމެ ގިނަވިޔަސް، ރަހުމަތްތެރިންނީ ރައްޓެހިންގެ ތެރެއިން ވަކި ބައެކެވެ. އެކުވެރިންނީ އެކުގައި އުޅޭ މީހުންނެވެ. ތަނާ ހަލާތާ މާހައުލުގެ މީޒާނުގައި އެކުވެރިންނަކީ ބަދަލުވެ ދައުރުވާ ބައެކެވެ. އެހެންކަމުން ކޮންމެ މީހެއްގެ ހަޔާތުގައިވެސް ރަހުމަތްތެރިން މި ވަނީ ވަރަށްވެސް މުހިއްމު ބަޔަކަށެވެ.

ތިބާގެ ރަހުމަތްތެރިންނަކީ ކޮން ބައެއްތޯ ކަނޑައަޅާނީ ތިބާއެވެ. އެކަމުގައި އެހެން އެއްވެސް މީހެއްގެ ނުފޫޒެއް އޮވެގެން ނުވާނެއެވެ. އެހެނަސް ދަންނާށެވެ! ރަހުމަތްތެެރިންނަކީ ތިބާ އިހްތިޔާރުކުރާ ދެވަނަ އާއިލާއެވެ. އެހެން ކަމުން އެ އާއިލާގެ މެންބަރުންނަކީ ކޮންކަހަލަ ބައެއްތޯ ތިބާ ދެނެގަންނަން ޖެހޭނެއެވެ. އެ އާއިލާގެ މެންބަރުންގެ ގޮތުގައި ހަދަން ވާނީ ތިބާ އަށް ހެޔޮ އެދޭ އުޅުން ރަނގަޅު ހެޔޮލަފާ މީހުންނެވެ. ނޫންނަމަ އެ ކަމުގައި ހަލާކުވެދާނީ ހަމަ ތިބާއެވެ.

ރަހުމަތްތެރިންނީ އަނެކުންގެ ހާލު ބަލާ ހަދާ މީހުންނެވެ. ހާލު ބެލުމަކީ އަބަދުމެ ގުޅައިގެން ނުވަގަ މެސެޖުކޮށްގެން ނުވަތަ ދިމައިވެގެން ހާލު ބެލުމެއް ނޫނެވެ. ހާލު ބެލުމަކީ "ހާލެއްގައި" ޖެހޭ ކޮންމެ ހާލަތެއްގައި އެމީހަކާއި އެކުގައި ވުމެވެ. އުފާވެރިކަމެއް ކަމުގައި ވީނަމަވެސް މެއެވެ. އަދި ހިތާމަވެރި ކަމެއް ކަމުގައި ވީނަމަވެސް މެއެވެ. އެކުގައި ވުމޭ ބުނެވެނީ "ހާލެއްގައި" ޖެހުމުން ތިމާއަށް ކޮށްދެވެން އޮތީ ކޮން ކަމެއްތޯ އަހާ މީހާއެވެ. ބައްދަލުވާ ހިނދު ސައެއް ދީ ނުވަތަ ކެއުމެއް ދީ ނުވަތަ ކޮފީއަކަށް ގެންގޮސް ކޮފީއެއް ދީ ހަޔާތުގެ ވާހަކަތައް ހިއްސާ ކޮށް ހެދުމެވެ. ހަޔާތުގެ އެކި އެކި ކަންކަމުގައި ލަފާ އަހާ ލަފާ ހޯދާ ލަފާ ދިނުމެވެ. ރަހުމަތްތެރިކަން ބަދަހިކުރަން އެކި އެކި ކަންކަން އިންތިޒާމުކޮށް ތަރުތީބު ކުރުމެވެ. ކުޑަކުޑަ އާއިލާއެއްގެ ގޮތުގައި އެ ގުޅުންތައް ފައްކާކޮށް ވަރުގަދަ ކުރުމުވެ.

އާދޭހެވެ! ތިމާގެ ޠަބައީ އާއިލާ އިހްތިޔާރު ކުރީ ތިބާއެއް ނޫނެވެ. އެއީ ދުނިޔޭގެ ދައުރުވުމުގެ ނިޒާމުން ތަދުބީރުވެފައިވާ ކަމެކެވެ. އެހެނަސް ތިބާގެ ރަހުމަތްތެރިންނަކީ ހަމަ ތިބާ އިހްތިޔާރު ކުރާ ބައެކެވެ. ހަނދާން ކުރާށެވެ! ތިބާ އިހްތިޔާރު ކުރާ މި އާއިލާ އަކީ ތިބާގެ ހަޔާތަށް ބޮޑެތި ބަދަލުތަކެއް ގެނުވާނޭ އާއިލާއެކެވެ. އެހެންކަމުން ރަހުމަތްތެރިންގެ އާއިލާގެ ހިމަނަން ޖެހޭނީ ހެޔޮލަފާ، ހެޔޮ އެދޭ ރަނގަޅު މީހުންނެވެ. އެއީ އިންސާނާގެ ހަޔާތުގައި އުފާވެރި އެތައް ހަނދާނެއް ލިޔެވިގެންދާނޭ ކަމެކެވެ.